InfoHub Logo

Ustaz ben shákirttiń aıtysy /"Aıqyn" gazetiniń betterinen/

Buryndary aqyndar aıtysý úshin ár tustan kelip, bir jerge jınalyp, óner kórsetetin. Keıin oılaryn qaǵaz betine túsirip, qarapaıym hat arqyly sóz almasatyn. Gazet betinde de aıtystyń kórigi qyzǵan sátter az bolmady. Endi elektrondy aqparattyq tehnologıalar damyǵan tusta ǵalamtordyń kómegimen elektrondy poshta arqyly aıtysý jáne uıaly telefondy paıdalana otyryp sms-aıtys júrgizý dástúrge ene bastady. Biz búgin belgili aıtysker aqyndar Serikzat Dúısenǵazın men Jandarbek Bulǵaqovtyń ustaz ben shákirt retinde oı jarystyryp, sóz qaǵystyrǵan sms-aıtysyn oqyrman nazaryna usynyp otyrmyz.

Serikzat:
Jandarbek, tura almaýshy eń taǵat taýyp,
Bıikke júrgen ulsyń talaptanyp.
Kózdi ashyp-jumǵansha tórt jyl ótti,
Ushaıyn dep jatyrsyń qanat qaǵyp.

Jandarbek:
Bul jerde bilim deıtin kók teńiz bar,
Babalar bizge salyp ketken iz bar.
Tórt jylda úmitińiz aqtaldy ǵoı,
Aıtyńyz, maǵan qandaı ókpeńiz bar?

Serikzat:
Biri ediń aıtys qýǵan seriniń sen,
Sabaqqa kóp kelýge erinýshi eń.
Tańda ǵana týatyn Sholpan qusap,
Sesıanyń kezinde kórinýshi eń.

Jandarbek:
Osylaı qıyn endi sógetiniń,
Qaı jerde boldy sizge bóget iniń?
Sesıanyń kezinde kórinsem de,
Sabaqty kimnen, aǵa, kem oqydym?

Serikzat:
Shákirtim, astamsý ǵoı bul degeniń,
Mynany este saqta, júldegerim:
Sen túgil, danalar da solaı aıtqan,
Áli de bilgennen kóp bilmegeniń.

Jandarbek:  
Árıne, bilgennen kóp bilmegenim,
Maqsatym – bilim izdeý kúnde meniń.
Tek qana qazaǵymnyń ózine tán
Óneri ólmesin dep júrgen edim.

Serikzat:
Júre ber óner úshin aman bolyp,
Oqysań, qalmaısyń ǵoı jaman bolyp.
Men úshin shyqsań boldy Otan úshin
Qyzmet eter bilikti maman bolyp.

Jandarbek:
Ustazym, raqmet tilegińe,
Buıyrsa, qyzmet etem uly elime.
Aman bolsam, eshqashan daq salmaspyn
Jumyr jer syıatyndaı júregińe!

---