InfoHub Logo

 Dúnıedegi mamandyq ataýlynyń anasy–ustazdyq. Sebebi uly tulǵalarymyzdyń barlyǵy ustazdan tálim alǵan, ustazdyń salyp bergen sara jolynan ótken. Óleń sózdi órnektegen aqyn da, qalamy qaryshtalǵan jazýshy da, ǵylym jolynda túrli jańalyqtar ashyp júrgen ǵalym da ustazdan bilim alǵan. Sondyqtan da jas urpaqtyń jolyn aıqyndap beretin ustazdar qaýymyna úlken qurmetpen qaraý–adamdyq boryshymyz.

Búgingi qoǵamda adamdy adam etetin, adamtaný mádenıetin qalyptastyratyn maman ol – ustaz. Iakı adam tánine jaýapty dáriger bolsa, adam janyn qalyptastyrýshy – ustaz der edim. 

Al muǵalim mártebesi týraly aıtylar dúnıe de, jazylar oılar da bólek. Ustazdyq–barlyq mamandyqtyń asqar shyńy. Ol shyńǵa shyǵý da mártebeli is, kez kelgenniń qolynan kele bermes dúnıe. Ustazdar qaýymynyń mártebesin eshqashan tómendetpeýimiz kerek.

Qazaqtyń uly aǵartýshysy Ahmet Baıtursynov "Muǵalim–mekteptiń jany" dese, Ybyraı Altynsarın "Muǵalim–mekteptiń júregi" dep baǵa bergen eken. Osyndaı myń jyldyq tulǵalardyń sózinen -aq ustazdardyń mártebesi bıik bolǵanyn, bolatynyn da kóre alamyz.

Tuńǵysh Elbasymyz Nursultan Nazarbaev «Bolashaqta eńbek etip, ómir súretinder – búgingi mektep oqýshylary, muǵalim olardy qalaı tárbıelese, Qazaqstan sol deńgeıde bolady. Sondyqtan ustazǵa júkteletin mindet aýyr» degen óz sózinde úlken astarly oı jatyr.

Óskeleń urpaqty oqytatyn  da, bolashaq jastardyń taǵylym tárbıesine de negiz bolatyn da ulaǵatty ustazdarymyz. Balanyń baǵbany bola bilgen ustazdarymyz týraly qudireti kúshti sózderdi aıta bersek danalyq sózdermen tizbektelip, sheksizdikke ulasady. 

Iá, ulaǵatty ustaz dese et júregimiz eljirep turady. Bizdiń de ýnıversıtetimizde teńizden tereń bilimin sarp etip, urpaq tárbıesi jolynda qyzmet etip kele jatqan ustazdarymyz bar. Ol kisilerdiń eren eńbekteri men óz salasyna qosqan ólsheýsiz úlesterin maqtana aıta alamyz. Bizdeı jastardy ult janashyry bolýǵa tárbıelep, myqty maman bolýymyzǵa septigin tıgizip, bilim nuryn júregimizge uıalatyp júrgen Fılologıa fakúlteti, "Qazaq tili men ádebıeti" kafedrasynyń ustazdar qaýymyn kásibı merekelerimen shyn júrekten quttyqtaımyn! Mereılerińiz ústem bolyp, shyǵarmashylyq tabystarǵa jete berińizder! Otbasylaryńyzǵa amandyq, baq-bereke tileımiz!

M.Áýezov atyndaǵy OQMÝ, Fılologıa fakúltetiniń stýdenti Boshan Nesibeli

---