InfoHub Logo

Muǵalim – uly tulǵa. Urpaq tárbıesi, onyń bolashaǵy – ustazǵa baılanysty. Ustaz bolý - júrek jylylyǵyn, meıirim shýaǵyn, adamgershilik ulylyǵyn balanyń boıyna darytý desek, Asyqata kentindegi «№121 Jalpy orta mektebi» komýnaldyq memlekettik mekemesiniń dırektordyń tárbıe isi jónindegi orynbasary Sharıpova Jumagúl Shúkirbaıqyzynyń bul saladaǵy eńbegi zor. 

Jumagúl Shúkirbaıqyzy Eńbek qyzyl tý ordendi «Bólshevık» sovhozy qazirgi Sh.Dildabekov aýyldyq okrýginde 1968 j 2 aqpanynda dúnıege kelgen. S.Qojanov atyndaǵy mektepti 1985j úzdik bitirip, Almatydaǵy Abaı atyndaǵy memlekettik ýnıversıtetiniń qoǵamtaný jáne tarıh fakúltetin bitirgen. Qolyna dıplom alǵan soń jas kóńili  alyp ushyp,  óz júrek  qalaýymen tańdaǵan ustazdyq qadamyn 1993 j Asyqata mektebinde bastap, 1995 – 2001j aralyǵynda Chehov mektebinde qyzmet atqarǵan.

2001 – 2010 jyldary «Jeńis kóp salaly – gımnazıa mektebinde qyzmet isteı júrip, óz isiniń jetik mamany arqasynda 2004 jyldan beri dırektordyń tárbıe isi jónindegi orynbasary  laýazymyna ıe bolǵan.  Jumagúl Shúkirbaıqyzy 2010 jyldan beri «№121 jalpy orta mektebi» komýnaldyq memlekettik mekemesinde óz  qyzmetin jalǵastyrýda. Ustazdyń boıynan salmaqty da sabyrly minezi, bilimdiligi  men baıyptylyǵy, uıymdastyra bilý qabilettiligi men másele qoıýdaǵy talapshyldyǵy aıqyn ańǵarylady.

Bir úıde bir-eki balanyń erkeligin kótere almaı qabaǵyna kirbiń uıalaıtyn ata-anaǵa qarap ár úıdiń erkesi tenteginiń basyn biriktirip árqaısysynyń kóńiline kún uıalatyp  júrgen  Jumagúl Shúkirbaıqyzynyń  bala  tárbıesi dese ishken asyn jerge qoıatyn júreginiń jazıradaı keń, júıkesi bolattaı berik desek artyq aıtqandyq emes.  23jylǵa jýyq eńbek jolynda ustazdyq abyroıy, óz ortasynda ǵana emes aýdan,  oblysqa da keńinen tanymal.

«Adamnyń adamshylyǵy – jaqsy ustazdan bastalady» -dep, Abaı atamyz aıtpaqshy oqýshylardy qazirgi zamanǵa saı tárbıeli bilimdi  etip tárbıeleýde Jumagúl Shúkirbaıqyzynyń  eńbegi erekshe. Bala quqyǵyn qorǵaý jóninde ótkizgen  aýdandyq, oblystyq semınarlary osynyń aıǵaǵy desek qatelespeımiz.

Iá, muǵalimniń jemisi – olardyń talaı jylǵy eńbekteriniń arqasynda ekeni barshaǵa belgili. Ustazymyzdyń aýdandyq, oblystyq  madaqtamalarynda  shek joq. «Bilim berý isiniń úzdigi» ataǵy da jaıdan – jaı berilmegenin, qıyndyǵy men qyzyǵy qatar júretin ustazdyq  joldaǵy eren eńbegi úshin berilgen mártebe ekenine kúmánimiz joq.

Prezıdentimiz N.Á.Nazarbaevtyń «Ustaz ómir boıy oqý kerek »- degen ulaǵatty sózin eske alsaq, Jumagúl apaıdyń da óz sabaqtarynda  ınovasıalyq úrdister men jańa tehnologıa elementterin daryndy balalardy oqytý men tárbıeleýde utymdy qoldanatyn ustazdardyń  biri  ekenine kóz jetkizemiz. Aldyna qoıǵan maqsaty – jańa ınovasıalyq tehnologıalardy paıdalana otyryp bilim sapasyn arttyrý. Ol ózine de ózgege de qatań talap koıa biledi, sol arqyly bıik tabystarǵa qol jetkizedi.

Bilimi tereń oqýshy kez–kelgen jerde óziniń bilimdiligin dáleldeı alady. Ár oqý jylyn jetististiktermen aıaqtaıtyn ustazymyzdyń  shákirtteriniń de jetistikteri jeterlik. 

Muǵalim únemi izdeniste bolyp jańalyqtardan qalyspaýy kerek  - desek bul  jolda da Jumagúl apaıdyń eńbegi orasan. Ol óziniń ótken árbir tárbıege joly is-sharalaryn múlt jibermeı baspasóz betterine jarıalap otyrady. Ondaǵy maqsaty – mekteptiń bedeli men muǵalimniń jańashyldyǵy desek qatelespeımiz. Sondaı aq oblystyq konferensıalarǵa da qatysyp óziniń oı–pikirin qosqan materıaldary jınaq kitapshalaryna engen. 

Jańalyqqa jany qumar Jumagúl Shúkirbaıqyzy ustaz bolýymen qatar ózinen keıingi jas mamandarǵa ulaǵatymen tálimgerligimen ónege bola bilgen tulǵa. Ol árdaıym aqyl keńesin aıtyp is–tájirıbesin úıretýden jalyqpaıdy.

Ómirdiń keńge jaıyp keregesin

Erliktiń jasadyńdar ónegesin.

Urpaqqa bergen úlgi – tálimderiń

Perishte kóńilderde óne bersin - degendeı Jumagúldeı jyly júzdi adamgershiligi mol ómiri ónegeli ustazdar aramyzda júr. Sondyqtan da ustazymyzdyń eńbegine sáttilik  tabys tileıik. Abyroıyńyzdy adal eńbegińizben tabýdan sharshamaı qyzmet ete berińiz degen izgi tilek  aıtamyz.

Sýrette Jumagúl Shúkirbaıqyzy óz áripteterimen

Maqtaral aýdany, Asyqata kenti
«№121 jalpy orta mektebi» KMM-niń
qazaq tili men ádebıeti páni muǵalimi
Týltaeva Perýza

---