InfoHub Logo

Tanymal prodúser Baıan Alagózova «KeshYOU» tobynyń burynǵy múshesi Móldir Áýelbekova týraly kólemdi málimdeme jasap, ánshige qatysty ókpe-renishin ashyq aıtty.

Bul týraly Infohub.kz aqparat agenttigi habarlaıdy.

Konsertke qatysýdan bas tartý sebebi

Prodúserdiń sózinshe, Móldir Áýelbekova buǵan deıin «KeshYOU» tobynyń 20 jyldyq konsertine qatysatynyn aıtyp, ózine jyly qarym-qatynas bildirgen. «Móldir kelip, maıysyp kúlip: “Ustazym, árıne kelemin. Men sizge razymyn” dep aıtqan bolatyn», – dedi Baıan Alagózova.

«Baıan bizdi sheshindirdi» degen sózderge jaýap

Ánshiniń «Baıan bizdi sheshindirdi» degen málimdemesine qatysty prodúser renishin jasyrmady. «Ol alǵash kastıngke óte qysqa shortymen, kindigi kórinip turatyn top kıip kelgen. Keıin “Men shyn máninde ıbaly, ınabatty edim, Baıan bizdi sheshindirdi” degen sózderin estigende qatty uıaldym. Bul jerde uıat bolatyn eshteńe joq edi», – dedi prodúser.

Baıan Alagózova jeli qoldanýshylaryna Móldirdiń burynǵy obrazdaryn qarap shyǵýǵa keńes berdi. «Jaı ǵana qyzdardan Móldir alǵash kelgen kezde ne kıip júrgenin surańyzdarshy. “Sýperstar” jobasynda da qysqa beldemshemen óner kórsetken. Al qazir “Men sol joba arqyly tanyldym” deıdi. Negizi ony teledıdardan eki-aq ret kórsetti», – dedi ol.

«KeshYOU» – Móldirdiń eń úlken mektebi

Prodúserdiń aıtýynsha, Móldir Áýelbekovanyń shyǵarmashylyq jolyndaǵy eń úlken mektep «KeshYOU» jobasy bolǵan. «Móldir, sen 22 jyldan beri ártis emessiń. Sen 22 jyldan beri “KeshYOU”-dyń burynǵy solısisiń. Naǵyz ártiske tán bilim men qasıettiń bárin osy topta júrip úırendiń», – dedi Baıan Alagózova.

Sonymen qatar ol ánshiniń potensıalyn kórip, arnaıy «Ǵashyq júrek» fılmin túsirgenin de aıtty.

Jeke ómirdegi qıyndyqtar men syltaýlar

Baıan Alagózova Móldir Áýelbekovanyń toptan ketkennen keıin qaıta habarlasqanyn da eske aldy. «Móldir ketkennen keıin kezdesýdi surady. Kezdesken kezde kózderi muńǵa tolyp turdy. Jeke ómirinde de, shyǵarmashylyǵynda da bári keri ketip jatqanyn aıtty. Keıin “Meni jeke ánshi retinde alyńyz” dep ótindi. Biraq men “Seni jeke ánshi retinde ala almaımyn” dedim», – dedi ol.

Prodúserdiń sózinshe, osydan keıin ánshi densaýlyǵyna baılanysty túrli syltaý aıtqan. «Sodan keıin ótirik qan qysymy kóterilgendeı keıip tanytty. Jedel járdem kelgen kezde eshqandaı qan qysymy joq ekenin aıtty. Keıin aıaǵymdy shyǵaryp aldym dedi. Konsertterge shyqpaý úshin túrli áreket jasady. Meniń kózimshe ǵana aqsańdap júretin», – dedi Baıan Alagózova.

Ustazyna jasaǵan qıanaty

Sondaı-aq ol Móldir Áýelbekovany ustazy Baǵym Maqsatqyzyna qatysty da synǵa aldy. «Ol bes jyl boıy úıinde turǵan, asyn ishken ustazy Baǵym Maqsatqyzynyń artyna qanjar suqty. Baǵym Maqsatqyzy áli kúnge deıin sol aýyrlyqpen ómir súrip júr. Jany aýyrǵandyqtan dári qabyldaıdy», – dedi prodúser.

Ázirge Móldir Áýelbekova bul málimdemege qatysty pikir bildirgen joq.