InfoHub Logo

Qutybastyń jezdesi — Aqan únemi uıqy basyp, tipti at ústinde de qalǵyp júretin bolsa kerek. Qutybas oǵan: «Bul ádetińdi qoımasań, seni peri soǵady» dep qorqytady eken. Sonda da ol qalǵyǵanyn qoımapty.

Bir kúni keshke taman Qutybas tozǵan jalba tonyn aınaldyryp kıip, Aqannyń júretin jolyn tosyp, aýyl janyndaǵy apanǵa tyǵylyp jatady.
Aı sútteı jaryq. Anadaıdan Aqan kórinedi. Syrminez jýas atynyń sylbyr aıaǵyna qaraǵanda ol taǵy da qalǵyp kele jatqan sıaqty. Qutybas salt attyny sál ótkizip jiberip, azdan soń qatarlasa kelip, yńǵaıly jerde atynyń artyna qarǵyp minedi. Selk etken Aqan sasqalaqtap jalt qarasa, artyna jabysyp bir pále otyr. Júregi tas tóbesine shyǵyp, uıqysy shaıdaı ashylǵan Aqan aryq toryǵa jýan qamshyny basyp-basyp
jiberip, «astaprallalap», atynyń jalyn qusha shaba jóneledi. Qutybas onyń moınynan qylqyndyryp qysyp: «Budan bylaı qalǵysań, janyńdy alamyn!» dep erekshe bir daýyspen gúrildep, buıyra sóıledi de, lyp etip attan túsip qalady.

Esinen tana qoryqqan Aqan shapqylaǵan kúıinde úıine jete atynan aýdaryla qulaıdy. Tili de kúrmelip qalady. Kórshiler jınalyp, Aqannyń sup-sur bolǵan betine sý búrkedi. Aqan áreń degende esin jınaıdy.

Erteńine eshnárse bilmegen bolyp jezdesiniń kóńilin surap Qutybas keledi.

Aqan aýyr kúrsinip, aqsarybas aıtyp, qudaıy bermek bolyp berekesi ketip otyrǵanyn aıtady. Qutybas keńkildep kúlip:

— Qudaıyǵa shyǵyndap áýre bolma, ol meniń ásheıin uıqy asharym edi, — degende, Aqan:

— Qap, shyn peri degenim peri soqqyr sen ekensiń ǵoı, qap!.. — dep sanyn bir-aq soǵypty. Bul kápti ekeýmiz ǵana bileıik, aýzyńnan shyǵarma, — dep ólerdegi sózin aıtyp ótinipti.

---