InfoHub Logo

Jońǵarlardan qorqyp jóńkile kóshken jalaıyr eli Shý boıyna jetkende de erý bolyp, toqtamapty. Basqa jurt bastaryna aýyrtpalyq túsken sol shaqtyń ózinde sol mańaıdaǵy Bolat hannyń ordasyna qaıyrylyp ótip jatsa kerek. Eskeldi, Balpyq batyrlar bastaǵan bosqyndar olaı ótpeı, tóteleı tartypty. Muny estigen Bolat han jedel «oqjúırik» degen atyna mine salyp, Eskeldilerdiń jolyn kes-kestep:

— Árýaq attaǵandaı ordaǵa moıyn burmaı qaıda laǵyp bara jatyrsyńdar? — deıdi.

Eskeldi eki ret jótkirinip, aýzyn ashqanda Balpyq batyr:

— Halyqtyń qaıyry bolmasa, han buzylǵanǵa uqsaıdy, qoınaýy qut Qarataý — Nuh paıǵambardyń kemesi toqtaǵan jer emes pe, biz de sonda baryp aıaldarmyz. Sol arada arǵy alshyn, bergi arǵyn, naıman aǵaıyndarmen aqyl toǵytarmyz, sirá! —  deıdi.

— Batyr, jańylyp tursyń-aý, «Hannan qaıyr bolmasa, el buzyldy» demeýshi me edi? — deıdi Bolat han syzdanyp. Osy sátte naızasyn jerge qadaǵan Eskeldi:

—Ýýa, sultan! Ákeń seniń Táýke han — «áz-Táýke» bolyp eldiń aýzyna ilinip, talaı taǵylymdy is atqardy. Úmitin úrim butaǵynan kútip, seniń atyńdy Bolat qoıyp edi, biraq sen bolat emes, boljyr boldyń. Bizdi basynbaǵan kim qaldy, oń búıirińnen Hıýa, Qoqan, Buqar, Samarqan handyqtary qadalyp edi, endi qaq mańdaıdan qalmaqtar soǵyp otyr. Seniń jetkizgen jeriń osy. Balpyq qatelesip turǵan joq, endi halyqtyń óznen qaıyr bolmasa, eldiń azǵany azǵan, tozǵany tozǵan. Seniń bıligiń árisi eki, berisi bir jyldan asa qoımas, ordańdy buzyp, otqa jaq ta, bizdiń kóshke iles. «Kilemge birgisiz alasha bar, hanǵa bergisiz qarasha bar» degen. Tóle bı atam aman bolsa, saǵan da, maǵan da jol tabady, — dep júrip ketken eken.

---