InfoHub Logo

 Búgin Almatyda M. Áýezov atyndaǵy akademıalyq drama teatrynda matematıka, fızıka jáne ınformatıka pánderinen HII Halyqaralyq  Jáýtikov olımpıadasynyń jabylý rásimi bolyp ótti.

Jyl saıynǵy dástúrli saıysqa bıyl álemniń 17 elinen quramynda 413 oqýshy bar 63 komanda qatysty. Bul Jáýtikov olımpıadasy tarıhynda rekordtyq kórsetkish. Al Qazaqstannan barlyǵy bul halyqaralyq saıysqa 138 oqýshy qatysty.  

Al, halyqaralyq ádil qazylar alqasy quramynda  Qazaqstan, Reseı, Bolgarıa, Ázerbaıjan, Armenıa, Grýzıa, Belorýssıa, Ózbekstan sekildi 8 eldiń ǵalymdary jumys istedi.

Sarapshylardyń aıtýynsha, olımpıada suraqtary byltyrǵy jylmen salystyrǵanda áldeqaıda kúrdelirek boldy. Sondyqtan naǵyz ıntellektýaldy daryndy balalar ǵana olımpıadanyń jeńimpazdary atandy.

«Olımpıada óte joǵary deńgeıde ótti. Eshqandaı oqys oqıǵalar bolǵan joq. Tapsyrmalardyń kúrdeliligi de joǵary dárejede boldy. Jalpy, qatysýshylardyń 45 paıyzy júldeger atandy. Qazaqstandyq oqýshylar 191 medaldiń 48-in jeńip aldy. Bul jaqsy kórsetkish», - dedi óz sózinde osy olımpıadanyń úılestirýshisi, Jáýtikov atyndaǵy Respýblıkalyq mamandandyrylǵan daryndy balalarǵa arnalǵan fızıka-matematıka orta mektep-ınternaty dırektorynyń orynbasary Arqat Dolaev.  

Sonymen, eki kúnge sozylǵan olımpıadanyń qorytyndysy boıynsha úzdik 7 komanda anyqtaldy. Olarǵa olımpıada demeýshileri baǵaly syılyqtar usyndy. Eń úzdik komanda Gran-prı ıesi atandy. Jekeleı birinshilik boıynsha 38 altyn, 57 kúmis jáne 96 qola medal sarapqa salyndy.   

Komandalyq saıysta Gran-prı júldesin Máskeý qalasynyń №1329-shi mektep komandasy jeńip aldy. Byltyr Gran-prı Jáýtikov atyndaǵy RFMSH  komandasynyń enshisine tıgen bolatyn. 

Birinshi orynǵa Bolgarıanyń Sofıa qalasynan kelgen matematıka gımnazıasynyń komandasy ıe boldy. Ekinshi oryndy Mınsk qalasynyń (Belarýs) memlekettik ýnıversıteti janyndaǵy lıseı komandasy men Reseılik Máskeý memlekettik ortalyǵy janyndaǵy arnaıy ǵylymı oqý ortalyǵynyń komandasy bólip aldy. Al úshinshi oryndy Erevan (Armenıa) memlekettik ýnıversıteti janyndaǵy A. Shagınán atyndaǵy fızıka-matematıka mektebi, RF Chelábi qalasyndaǵy №31-shi lıseı komandasy jáne Serbıanyń Belgrad kalasynan kelgen matematıka gımnazıasynyń komandalary bólisti. Marapattalǵan ár komandanyń múshelerine baǵaly syılyqtar tabystaldy. Al, Gran-prıge ıe bolǵan jeńimpaz komanda múshelerine noýtbýk tapsyryldy.

Al, jeke birinshilikte 38 qatysýshyǵa altyn medal tabys etildi.  Olardyń úsheýi - qazaqstandyq oqýshylar, (RFMM-dan 1 oqýshy). 57 kúmis medaldyń - 13-in (onyń ishinde 2-ýi RFMM-niń enshisinde) jáne 96 qola medaldiń - 32-sin qazaqstandyq oqýshylar jeńip aldy (olardyń - 12-si RFMM oqýshylary).

Sonymen, jalpy 191 medaldyń - 48-i qazaqstandyq oqýshylarǵa buıyrdy (olardyń ishinde RFMM-ne 15-i tıesili). Júldeli bolǵan barlyq qatysýshylarǵa maqtaý gramotalary men baǵaly syılyqtar tabys etildi.

Aıta ketelik, Olımpıada QR Bilim jáne ǵylym mınıstrliginiń, «RFMM túlekteri qoǵamdyq qory,  «Daryn» Respýblıkalyq ǵylymı-praktıkalyq ortalyǵy jáne Almaty qalasy ákimshiliginiń qoldaýymen ótti. 

---