InfoHub Logo

Muǵalim - mekteptiń júregi. Ár adam balasyn bilimge shaqyryp, tárbıelep ósirgen muǵalimderdiń eńbegi eshqashan ólmeıdi. Alaıda zaman damyǵan saıyn tek shákirttiń qabiletine qaraı talap qoımaıdy, endigi jerde muǵalimderdiń de ádistemelik álemin ózgertpek. Ol qalaı?

HHİ ǵasyr bilim men ǵylymnyń ǵasyry, sondyqtan adam balasy bir salanyń ǵana mamany bolyp qalmaý kerek. Iaǵnı siz ámbebap bolýyńyz kerek. Bul talap muǵalimder qaýymyna da qatysty, dep jazady massaget.kz.

Sonymen HHİ ǵasyrdyń muǵalimi qandaı bolý kerek?

1. Táýekelshil

Jańa ǵasyrdyń muǵalimi kez kelgen aýyrtpalyqty ózine qabyldaı otyryp, táýekelge barýǵa daıyn bolý kerek. Onyń boıyndaǵy osynaý qasıeti ózgelerge úlgi bolady. Muǵalim uǵymynyń ózi ózgege úlgi bolýǵa úıretedi.

2. Psıholog

Muǵalim tek bilim berip qana qoımaı, aldynda otyrǵan ár shákirttiń psıhologıasyn zertteý kerek. Toptan bólek, ár shákirtpen jeke-jeke jumys jasaý basty talap. Óıtkeni árkimniń qabileti ártúrli. Al toptyq jumys kezinde birin kem, birin artyq kórmegeni abzal.

3. Bilikti pedagog

Pedagog sóziniń ózi tárbıe men ustaz uǵymyna etene jaqyn. Biraq muǵalimniń ózi bilikti ári saýatty pedagog bolǵany durys. Shákirtke túrli ádister arqyly tárbıe berý, bilim sýymen sýsyndatý eń mańyzdy dúnıe.

4. Kóshbasshy

Búgingi tańda muǵalimderge tek qana sabaq berip, leksıa oqýmen shektelýi shákirtti qanaǵattandyra almaıdy. Muǵalim óziniń uıymdastyrýshylyq qabiletimen qosa sol ortada kóshbasshy bola bilý kerek. Qoǵamdy sońynan ertýge qaýqarly, isine berik ári tıanaqty bolǵany jón. Kóshtiń basyn bastaý árıne qıyn, degenmen bul jańa damyǵan dáýirdiń talaby.

5. Zamanaýı tehnologıany ıgreý

Klasıkalyq kitaptyń, qalam men qaǵazdyń dáýreni ótip bara jatqany shyndyq. Degenmen kitaptyń qundylyǵyn aıta otyryp, oǵan shákirtti qyzyqtyrý úshin búgingi muǵalimniń basty maqsaty zamanaýı ınfraqurylymdardy, tehnıkany meńgerý kerek. Sonyń ishinde kompúterdiń ishki júıesin, ofıstik baǵdarlamalardy, elektrondy taqtalardy ıgerý arqyly jańa zamanǵa beıim jastardyń kóńilin aldandyra da, sabaqty qyzyqty ótkize de alady.

6. Rýhanı baı bolý kerek

Qaı eldiń bolmasyn muǵalim dárejesin kóterip júrgen jan rýhanı qundylyqqa baı bolý kerek. Ol sol eldiń ulttyq bolmysy men tabıǵatyn bala boıyna tereń sińirýge, otansúıgishtikke tárbıeleýge taptyrmas qural. Ustazdyń jan dúnıesi rýhanı tálimge toly bolsa, shákirttiń de odan alar ilimi dalaǵa ketpek emes.

7. Ámbebap muǵalim

HHİ ǵasyrdyń kez kelgen adam balasyna qoıar talaby osy. Degenmen árbir adamǵa qalam ustatyp, árip úıretýshi muǵalimniń ámbebap bolýy áldeqaıda mańyzdyraq. Muǵalimniń ámbebaptyǵy jan-jaqty bilimdi, bilikti, tartysqa tússe tarpańdap shyǵyp, dodaǵa tússe báıgeni bermes, shákirtke túrli ádistemelik quraldar arqyly jaǵdaı jasasa onda ol bir ǵana muǵalimniń emes, bir mekteptiń, bir eldiń abyroıy bolar edi.

8. Intellıgent

Muǵalimniń taǵy bir qyry ózin ustaýy, kıim kıisi, júziniń jarqyn beınesine deıin kórinip turýy kerek. Árbir sózge saýatty, árbir isine jaýapty mádenıetti, ıntelegentti tulǵa bolýy kerek. Óıtkeni qazir qoǵamda jastar ár áreketten úlgi alýǵa asyǵady. Al kózin ashqan kúnnen bastap, úlken ómirge qadam basqanǵa deıingi úlgi tutary - muǵalim. Endeshe onyń ıntellektýaldy qabileti asa mańyzdy.

Sannan sapaǵa sapar shegý jolyndaǵy muǵalimniń jańa ǵasyrǵa berer jaýaby daıyn bolý kerek. Óıtkeni talaby kúshti qoǵamnyń aǵysy qatty. Al sol aǵysqa qarsy shákirtti daıyndaý taǵy da muǵalimniń eńbegi.

Qaı ǵasyr bolmasyn, muǵalimniń orny taqtan bıik!

---