InfoHub Logo

Zeınet jasyndaǵy mamannyń jumys ornyn bosatpaı ary qaraı jalǵastyra berýin quptaısyz ba?

Qazaqstan qoǵamynda talaı jyldan beri qyzý talqylanyp kele jatqan másele bar: zeınet jasyna jetken mamandardyń qyzmetin jalǵastyra berýi. Biri «tájirıbeli kadrdyń orny tolmas» dese, endi biri «jastardyń jolyn bógeıdi» dep short kesedi. Endeshe qaısysy durys?

Zeınet jasyna kelgen ár qyzmetker – eń aldymen qoǵamnyń aldyndaǵy eńbegin atqaryp, zeınetaqysyn alýǵa quqyly azamat. Ol óziniń kásibı tájirıbesimen, bilimimen úlgi bolýy múmkin. Biraq, máseleniń ekinshi jaǵy bar: jumys ornyn bosatpaı otyrǵan zeınetkerlerdiń kesirinen jas mamandardyń mansapqa joly jabylady. «Jastar jumyssyz, al oryndar zeınetkerlerge berilgen» degen narazylyqtyń astarynda osyndaı shyndyq jatyr.

Bir qarasańyz, búgingi eńbek naryǵynda jańa ıdeıaǵa, tyń serpinge zárý salalar kóp. Jańa tehnologıa men sıfrlyq dáýirge beıimdelgen jastardyń áleýeti zor. Alaıda olardyń qabileti iske qosylmaıdy, óıtkeni oryn bos emes. Bul – elimizdiń kadrlyq saıasatyna úlken kedergi.

Árıne, tájirıbeli mamandy qurmetteý – mindet. Biraq qurmetteý jumys ornyn «ómir boıǵy monopolıaǵa» aınaldyrý degen sóz emes. Zeınetke shyqqan adam óziniń bilimin jastarǵa úıretip, keıingi býynǵa jol kórsetýi tıis. Al orynǵa jabysyp alýdyń qoǵamǵa da, memleketke de paıdasy shamaly.

Suraq týyndaıdy: eger árbir zeınetker «men áli tyńmyn, ornymdy bosatpaımyn» dese, jastar qaıda barady? Bilimdi, biraq jumyssyz qalǵan jastar erteń elden úmit úzse, kim utady?

Demek, ádiletti sheshim – zeınet jasyna jetkender jastarǵa oryn berýi kerek. Qalasa, tájirıbesin bólisetin keńesshi, tálimger retinde qyzmetin jalǵastyrsyn. Biraq negizgi shtatta jastardyń jolyn ashý – ýaqyt talaby.

Óıtkeni eldiń erteńi – búgingi jastardyń qolynda. Al jastarǵa múmkindik berilmegen jerde bolashaq ta bolmaıdy.