InfoHub Logo

Bizdiń aqylymyz bulshyqet sıaqty: ony damytý úshin, únemi jattyqtyrý kerek. Al ony qalaı isteý keregin kásipker ári bloger Tomas Oppong aıtyp beredi.

1. Áýesqoı bolyńyz

Meniń erekshe darynym joq. Men tek óte áýesqoı adammyn.
Albert Eınshteın

Siz áýesqoısyz ba? Bárine birdeı sene beresiz be álde máseleniń aqıqatyna jetýge tyrysasyz ba? Áýesqoı bolyńyz, álemniń qandaı ekenin bilińiz.

Ony kúndelikti zattar men qubylystardan bastaýǵa bolady. Mysaly, nanǵa qandaı qospalar qosylatynyn, kompúterdiń qandaı quraýshylardan turatynyn, Jerdiń kólemi men aýdanyn, atmosferanyń neden turatynyn anyqtaýǵa tyrysyńyz. Bul oılanýǵa bolatyn suraqtardyń bir qatar mysaldary ǵana.  

Áýesqoılyq barlyq danyshpandardyń erekshe sıpaty bolǵan. Áýesqoı aqyldan jańa oılar jaqsyraq shyǵady. Sanańyzdy ashyq ustańyz jáne únemi jańa nárseni bilýge daıyn júrińiz.  

2. Qyzmet salańyzǵa qatysy joq kitaptar men maqalalardy oqyńyz

Bilim kókjıegin keńeıtýge tyrysyńyz: ǵaryshtyq saıahattar týraly oqyńyz, qazirgi qyzmetińizge esh qatysy joq antropologıa men genetıkany oqýdy qolǵa alyńyz. 

Áıgili ónertapqyshtardyń ómirbaıandaryn oqyńyz. Jaıly ortańyzdan shyǵyp, álem jaıly tanymyńyzdy keńeıtińiz. Sol kezde sizdiń aqylyńyz tolysyp qana qoımaı, áńgimeńiz de tartymdy bola túsedi.

3. Mıyńyzdy jattyqtyryńyz

Mıǵa arnalǵan durys jattyǵýlar aqyl-oı qabiletin jaqsartady. Dene jattyǵýlary sıaqty, mıdy jattyqtyrý da zerdeniń damýy úshin óte mańyzdy. Qarapaıym jattyǵýlardan bastap, aqyryndap kúrdeli jattyǵýlarǵa kóshińiz.

4. Sportpen aınalysyńyz

Mıǵa ǵana arnalǵan jattyǵýlar jetkiliksiz. «Deni saýdyń – jany saý» dep beker aıtpaǵan ǵoı. Bul máteldi «Deni saýdyń – mıy saý» dep azdap ózgertýge de bolady. Dene jattyǵýlary sizdiń deneńiz úshin ǵana paıdaly emes. Ǵylymı kózqaras boıynsha, ol qannyń mıǵa kóbirek barýyn jáne jańa neırondyq baılanystardy yntalandyratyn aqýyzdardyń shyǵýyn arttyrady.

5. Jańa birnárse úırenińiz

Jańa nárse úırený – mıdy jaqsy yntalandyrady. Stıv Djobstyń stýdenttik jyldary kallıgrafıamen aınalysqanyn esińizge túsirińiz. Ol Stendford túlekteriniń aldynda sóılegen áıgili sózinde: «Eger men kallıgrafıa kýrsyna jazylmaǵanymda, Macintosh-tyń mundaı keremet qaripter garnıtýrasy bolmas edi» degen bolatyn.

Siz qaı bilimińizdiń paıdaly bolaryn eshqashan bilmeısiz. Sondyqtan jańa nárse úırenip júrińiz.

6. Shynymen paıdaly bolatyn blogtardy oqyńyz

Eger siz osy maqalany oqyp otyrǵan bolsańyz, onda maqsatyńyzdyń jartysyn eńserip qalǵanyńyz. Biraq munymen toqtap qalmańyz. Jelide jıi-jıi oqyp turýǵa bolatyn basqa da paıdaly málimetter bar.

Maqalalardy saqtap jáne oqyp júrý úshin Pocket-ti nemese osyǵan uqsas qyzmetterdi paıdalanyńyz. Evernote-de ózińizge qyzyqty materıaldardyń jeke kitaphanasyn jasap qoıyńyz..

7. Jeke blog júrgizip jáne oqyǵan nárselerińiz jaıly áserińizben bólisińiz

Jeke blog júrgizý shyǵarmashylyqqa dem beredi. Bul ózińiz týraly aıtýdyń múmkindigi ǵana emes, óz oılaryńyzdy uıymdastyrýǵa kómek bolady. Eger birnársemen bólisseńiz, bul sizdiń qarym-qatynas daǵdyńyzdy jaqsartady. Blog mıyńyzdy tonýsta ustaýǵa kómektesip, sizdi jasampaz etedi.

Birnárse týraly jazǵan kezde, ony jaqsyraq túsine bastaısyz.

Apta saıyn nemese aı saıyn sol ýaqytqa deıingi oqyǵan eń qyzyqty aqparattaryńyzdan daıdjest (ártúrli aqparattardyń qysqasha mazmuny) jasańyz.

---