17 قاراشا - ستۋدەنتتەر كۇنى
ستۋدەنتتىك ءومىر جاستاردىڭ ەڭ كوڭىلدى، اسەرلى، شارشاۋ مەن ۋايىمدى بىلمەي، ىزدەنۋمەن، ۇيرەنۋمەن، تانىسۋمەن، تابىسۋمەن وتەتىن ەرەكشە شاعى. بۇل كەزدە ءبىلىم كەڭىستىگىڭ، كوڭىل كوكجيەگىڭ كەڭەيىپ، ماحاببات پەن عاشىقتىق وتىنىڭ دا ىستىعىنا كۇيىپ، جالىنىنا شارپىلا جۇرەتىن كەز. وقۋ ورداسىندا تالاي دوس تاۋىپ ءازىلىڭ جاراسىپ، قۇربى-قۇرداسپەن كۇلىپ-ويناپ وتەتىن كۇندەر دە كوپ. ستۋدەنتتەر جاستىق كۇش-قۋاتى مەن ەنەرگياسىن، ۋاقىتىن جاڭاشىلدىققا ۇمتىلۋ مەن ءبىلىم الۋعا ارناي وتىرىپ، سونىمەن قاتار ۋاقىتتى قىزىقتى وتكىزىپ، ەستەن كەتپەيتىن كەرەمەت ەستەلىكتەر جاسايدى. ءار كۇن قۋانىشقا تولى بولعانىمەن ەرەكشە وتەتىن كۇندەر دە بولادى.
بۇكىل قازاقستان بويىنشا اتالىپ وتىلەتىن مەرەكەلەردەن بولەك بارشا ستۋدەنتتەر قاۋىمى ءۇشىن ايتۋلى مەرەكە – «ستۋدەنتتەر كۇنى». جاڭا تىڭ يدەيالارعا تولى ستۋدەنتتەر وزدەرىنە ارنالعان بۇل كۇندى ەرەكشە اتاپ وتەتىنى ايتپاسا دا بەلگىلى.
ستۋدەنتتەر كۇنىنىڭ تاريحىن ەسكە تۇسىرەيىك. 1939 جىلى 16 قاراشا كۇنى پراگالىق ستۋدەنتتەر مەن ۇستازدار نەمىس باسقىنشىلارىنا قارسى كوتەرىلىسكە شىقتى. كوتەرىلىستى باسۋ بارىسىندا ستۋدەنت يان وپلەتال قازا تاپتى. بۇل ستۋدەنتتىڭ جانازاسى بۇكىلحالىقتىق قارسىلىققا ۇلاستى. ستۋدەنتتەردىڭ كوتەرىلىسىنىڭ ناتيجەسىندە 1939 جىلدىڭ 17 قاراشاسىندا چەح جوعارى وقۋ ورىندارىن جاۋىپ، 10 ستۋدەنتتى اتىپ، 1200 كوتەرىلىسكە قاتىسقان ستۋدەنتتەرى كونسلاگەرگە جاپتى. ەكى جىل وتكەن سوڭ 1941 جىلى لوندوندا وتكەن ناسيزمگە قارسى ستۋدەنتتەردىڭ حالىقارالىق كەزدەسۋىندە، چەحوسلاۆاك كوممۋنيستى وتتو شلينگتىڭ ۇسىنىسىمەن بۇل كۇندى، قازا تاپقاندار قۇرمەتىنە، جىل سايىن ستۋدەنتتەر كۇنى رەتىندە اتاپ ءوتۋ شەشىمى قابىلداندى.
بۇل كۇن كوپتەگەن ەلدەردەگى ستۋدەنتتەر اراسىندا وتە كەرەمەت تويلانادى. ءار جىل سايىن دۇركىرەپ وتەتىن بۇل كۇنگە 2020 جىلدىڭ بۇل دەرتى دە كەدەرگى ەمەس. ءبىزدىڭ بەلسەندى ستۋدەنتتەرىمىز بۇل جىلى دا وزدەرىنىڭ ءتول مەرەكەسىن قىزىقتى وتكىزبەك. ولار ءار ستۋدەنتتەردى جەكە قۇتتىقتاپ، ولار بىرگە بولماسا دا كونفەرەنسيا ارقىلى جۇزدەسپەك.
قازاقستانداعى جانە الەمدەگى بارلىق ستۋدەنتتەردى ءتول مەرەكەسىمەن قۇتتىقتايمىز!
ءال-فارابي اتىنداعى قازاق ۇلتتىق ۋنيۆەرسيتەتىنىڭ
قازاقستان تاريحى كافەدراسىنىڭ دوسەنتى ت.ع.ك
ءجۇمادىل ماحاببات توقتار قىزى
You Might Also Like
-
قازاقستان رەسپۋبليكاسىنىڭ تۇڭعىش پرەزيدەنت كۇنى 2011 جىلى 10 جەلتوقساندا پارلامەنت سەناتىنىڭ ماجىلىسىندە «مەملەكەتتىك مەرەكەلەر تۋرالى» زاڭناماعا قول قويىلعان ساتتەن باستاپ بەلگىلەنگەنى...
