200-دەن استام كوللەدج 624 ماماندىق بويىنشا ليسەنزياسىن قايتاردى
ەلىمىزدە 219 كوللەدج 624 ماماندىق بويىنشا 780 بىلىكتىلىك ليسەنزياسىنان ايىرىلدى.
ءبىلىم بەرۋ سالاسىنداعى ساپانى قامتاماسىز ەتۋ كوميتەتىنىڭ حابارلاۋىنشا، مەملەكەتتىك اتتەستاتتاۋعا دايىندىق كەزەڭىندە 219 كوللەدج 624 ماماندىق بويىنشا 780 بىلىكتىلىك ليسەنزيالارىن قايتاردى. سونداي-اق شىعىس قازاقستان وبلىسىندا جەكە كوللەدج جابىلدى.
ايتا كەتەيىك، جىل باسىنان بەرى ەلىمىزدەگى 519 كوللەدجدە مەملەكەتتىك اتتەستاتتاۋ ءوتتى. تالداۋ ناتيجەسى بويىنشا الماتى، استانا قالاسى، قوستاناي، ماڭعىستاۋ، اتىراۋ، شىعىس قازاقستان جانە ۇلىتاۋ، اباي وبلىستارىنىڭ تەحنيكالىق جانە كاسىپتىك ءبىلىم بەرۋ ۇيىمدارىندا جاقسى كورسەتكىشتەر بايقالادى.
دەگەنمەن، ەل بويىنشا ءۇش جۇزدەن استام كوللەدج اتتەستاتتاۋدان وتپەدى. ولاردىڭ دەنى شىمكەنت قالاسى مەن پاۆلودار، قىزىلوردا وبلىستارىندا. باتىس قازاقستان، جامبىل، تۇركىستان، اقمولا جانە اقتوبە وبلىستارىندا كورسەتكىش تومەن.
«باقىلاۋ شارالارى باستالماس بۇرىن ءاقپاراتتىق-تۇسىندىرۋ جۇمىستارى جۇرگىزىلگەن بولاتىن. مەملەكەتتىك اتتەستاتتاۋ تەحنيكالىق جانە كاسىپتىك ءبىلىم بەرۋ سالاسىنداعى ءبىرقاتار پروبلەمالاردى انىقتاپ بەردى. ءقازىر استانا قالاسى، الماتى، جەتىسۋ، جامبىل جانە تۇركىستان وبلىستارىنداعى توعىز جەكە كوللەدجدىڭ قولدانىستاعى ليسەنزياسى مەن ءبىلىم بەرۋ قىزمەتىن جۇزەگە اسىرۋعا ارنالعان ليسەنزياعا قوسىمشالاردى قايتارۋ جۇمىسى جۇرگىزىلۋدە. بۇل كوللەدجدەر ەندى ءبىلىم بەرۋدى توقتاتادى. سونداي-اق ليسەنزياعا قوسىمشاسى بولماسا دا ءبىلىم بەرگەن 10 كوللەدج انىقتالدى»، - دەيدى كوميتەت ءتوراعاسى ەرنۇر داۋەنوۆ.
تالداۋ قورىتىندىسى بويىنشا جۇمىس جوسپارلارى، وقۋ جوسپارىنىڭ پاندەرى مەن مودۋلدەرى بويىنشا وقۋ باعدارلامالارى، وندىرىستىك وقىتۋ مەن كاسىپتىك تاجىريبەدەن ءوتۋ، مەملەكەتتىك جالپىعا مىندەتتى ستاندارتتىڭ تالاپتارىنا سايكەس كەلمەيتىن بازالىق، كاسىپتىك مودۋلدەردى وقىتۋ بويىنشا بۇزۋشىلىقتار انىقتالدى.
ۋاكىلەتتى ورگاندارعا تجكب ۇيىمدارىنا وقۋ جۇمىس باعدارلامالارى مەن جوسپارلارىن ازىرلەۋدە ادىستەمەلىك كومەك كورسەتۋگە قاتىستى ۇسىنىمدار بەرىلدى.
You Might Also Like
-
اقمولا، اتباسار، كوكشەتاۋدىڭ ورتالىعىندا كەڭ بايتاق جاتقان دالا مەن «قاندى قاراعاي» دەگەن بۇرىن اتىعاي، قاراۋىل، قارجاس، التايدىڭ جايلاۋلارى بولىپ ەدى.
-
جەر جۇزىندەگى قاي ۇلتتىڭ بولماسىن ءسالت-داستۇر عۇرىپتارى مەن ءتالىم تاربيەسى ادام بويىندا ىزگى قاسيەتتەر قالىپتاستىرۋعا نەگىزدەلگەن. قوعامداعى سان-سالانىڭ قايسىسىن الساق تا ادامگەرشىلىك قاسيەت الدىڭع...
