InfoHub Logo

جاقسىقىلىش، جامانقىلىش شورا حاننىڭ بالاسى دەسەدى. تۇرسىنبيكە—اسان قايعىنىڭ قىزى، اباتتىڭ قارىنداسى دەسەدى. اعايىندى ەكى جىگىت شورا حاننىڭ بالاسى جاقسىقىلىش پەن جامانقىلىش تۇرسىنبيكەگە عاشىق بولىپتى. ەكى ورتا تەلەگەي تەڭىز سۋ بولعاندىقتان، عاشىقتار بىر-بىرىنە قاۋىشا الماپتى. ەكى جىگىت اتپەن جاعالاپ، كۇندىز-تۇن ءجۇرىپتى. تۇرسىنبيكە باۋ قامىستان شوم بايلاپ، سالى اعىزىپ، ورتاعا شام جاعىپ، بەلگى بەرىپ سۋعا تۇسكەن كورىنەدى. سالىنى ارمان-بەرمەن جەل ايداپ اعىزا بەرىپتى. جامانقىلىش، جاقسىقىلىشتىڭ اتتارى تەرەڭ سۋعا تۇسپەي، سالىداعى تۇرسىنبيكەگە قاۋىشا الماپتى. سالىنى جەل ايداپ، تاۋدىڭ ەتەگىنە كەلىپ قايىرلاپ توقتاپ قالىپتى. قاسىندا جولداسى جوق تۇرسىنبيكە كۇزگى قارا سۋىقتا جاۋراپ، سالى ۇستىندە ءولىپتى. جامانقىلىش تۇرسىنبيكەگە قاۋىشۋعا انت ەتىپ، اتتى كەشتىرىپ جاقىنداي ءتۇسىپ كەلگەنىمەن ءبىر جەتىدەي سۋ ۇستىندە ارمان-بەرمەن وتە الماي ىلديعا ءتۇسىپ كەتىپ، سۋ جۇتىپ ولەدى. جاقسىقىلىشتا اتتى ءدۇزدىرىپ، كەشتىرىپ كەيىن قايتپايدى. بۇل باتىس بەتتى جاعالاپ جولدى ۇزارتىپ الىپ، بۇل دا سۋ جۇتىپ ولەدى.

ابات باتىر قارىنداسى تۇرسىنبيكەنىڭ وسىنداي حالگە دۋشار بولعانىن سەزىپ، اتىن ءمىنىپ، نايزاسىن سۋعا بويلاتىپ بيىك-بيىكتى جاعالاپ، وتكەلدەن-وتكەلگە اتتى ءدۇزدىرىپ ءوتىپ كەلسە، تاۋدىڭ ەتەگىندە سالى قايىرلاپ، ۇستىندە قارىنداسى تۇرسىنبيكە ءولىپ جاتقان ۇستىنەن شىعادى. ءوز باسى شاققا كەلگەن ابات باتىر تۇرسىنبيكەنى اۋىلعا الىپ قايتۋعا مۇمكىندىك تابا المايدى. سول تاۋعا اپارىپ قارىنداسىن جەرلەيدى. سول تاۋ «تۇرسىنبيكە تاۋى» اتالىپ قالادى.

ەندى تۇرسىنبيكەنىڭ باتىس بەتىن جاعالاپ، اتتى سۋدان كەشتىرىپ، ءدۇزدىرىپ كەلە جاتىپ، تاۋدىڭ ەتەگىندە جاس جىگىت ءولىپ جاتقانىن كورەدى. ابات باتىر ولىكتى جەرلەپ، «جامانقىلىش توبەسى» اتاندىرىپ كەتەدى.

ابات باتىر شارشاپ، سۋ ۇستىندە كۇندىز-تۇن ءجۇرىپ، ەلگە قايتۋعا كىرىسەدى. نايزاسىن سۋعا بويلاتىپ، تايىز جەردى كەشىپ، تەرەڭ جەردەن ءدۇزىپ وتىرادى. تاۋعا جاقىنداپ، ەندى قۇرعاقشىلىققا شىعام دەي بەرگەندە، تاۋدىڭ ەتەگىندە سۇلۋ جاس جىگىت ءولىپ جاتقان ۇستىنەن تۇسەدى. بۇنى دا ابات باتىر قولتىقتاپ اكەلىپ، تاۋ باسىنا جەرلەيدى دەسەدى. بۇل تاۋدى «جاقسىقىلىش تاۋى» اتاندىرىپ كەتەدى. بۇل ءۇش عاشىقتار بىر-بىرىنە قاۋىشا الماي تەلەگەي تەڭىز سۋدان جول تاۋىپ جۇرە الماي، كۇزگى قارا سۋىقتا سۋ ورتاسىنا تۇنەپ ءولىپتى.

---