ابەستىك
ولجاستىڭ قالاعا ساپارلاپ كەتكەنىن پايدالانعان جاندوس، اعاسىنىڭ ءۇش كىشكەنتاي قوبديشا اسىعى مەن ەكى قۇلجا ساقاسىن ۇتقىزىپ، ويىننان شارشاپ كەلىپ وتىرعان. قالاي بولدى ءوزى؟ تۇسىنبەي دال... اسىقتى ءتاپ-تاۋىر وينايتىن. الدە، رۇقساتسىز العان سوڭ سولاي بولدى ما؟ «رۇقساتسىز الۋ؟..» ول ۇرلىق قوي؟ «جوق، ۇرلىق ەمەس، — دەدى قالقان قۇلاق قارا بالا. — ولجاس ماعان بوتەن ەمەس... تۋعان اعام... ءارى، ول اسىقتاردى ويناۋ ءۇشىن جينادىق قوي!..»
جاندوس ويلاندى. قانداي امال بار؟ اۋەلگى نيەتى ولجاستى قۋانتىپ، كوپ-كوپ اسىق ۇتپاقشى ەدى، ول جوسپارى ىسكە اسپادى. كەشەلى بەرى ەكى جۇزدەي اسىقتان ايرىلىپ وتىر. ەكى ءجۇز اسىق... از ەمەس...
جاندوسقا بۇل ءىسى ۇنامادى. وزىنە-وزى رەنجىپ، ۇنجىرعاسى ءتۇستى. قالايشا ۇتىلدى؟ الدە، اسىق ويناعان بالالار، وزىنەن ۇلكەن بولعان سوڭ جەڭىلدى مە؟ جىلاعىسى كەلدى. كوڭىلسىز، مەڭ-زەڭ وتىرىپ قالعانىمەن، جىلاي المادى. كوزدىڭ جاسى دا وڭايشىلىقپەن شىقپايدى ەكەن-اۋ... «قالاي بولعاندا دا مەنىكى دۇرىس ەمەس، — دەپ ۋايىمداپ ءجۇردى ول كەشكە شەيىن. — قاتەلىك جىبەردىم...»
جاندوس ەرتەڭىندە دوستارىمەن جيدەك تەرۋگە اۋىلدان ۇزاپ، تالدىبۇلاق سايىنا كەتتى دە، اسىق جايلى ۇمىتىپ ۇلگەردى...
ءبىر اپتادان سوڭ ورالعان ولجاس، اۋلاداعى بالالاردىڭ قولىنان ءوزىنىڭ ەكى ساقاسىن كورىپ، جاعدايدى ءبىلىپ، ۇيگە كەلە سالا جاندوستى ىزدەدى. ءىنىسى اتاسىنىڭ قاسىندا اڭگىمە تىڭداپ وتىر. موپ-مومىن، ءتارتىپتى بولا قالىپتى. «ءبارىن ءبۇلدىرىپ، تۇك بىلمەگەندەي، تىمپيىپ وتىرۋىن قاراشى...»
— سەن مەنىڭ ساقالارىم مەن اسىقتارىمدى ۇتقىزىپ جىبەرىپسىڭ عوي،— جاندوس ءاي-شايعا قاراماستان، جاندوستى قۇلاق شەكەدەن قونجيتتى.
اڭداۋسىزدا تاياق جەگەن قارا بالا، الاشانىڭ ۇستىنە قۇلاي كەتىپ، ايقايعا باسىپ جىلادى. كەرەۋەت ۇستىندە كوزى جۇمۋلى دومالانىپ ۇيقىدا جاتقان اق مىسىق، جاندوستىڭ داۋىسىن ەستىپ، ەلەڭ ەتىپ باسىن كوتەرىپ الدى. وكسىپ جىلاپ جاتقان جاندوستىڭ قاسىنا جەتىپ، ولجاسقا ءبىر، بالالاردىڭ اتاسىنا ءبىر، كەزەك-كەزەك قاراي بەردى. كوزىنەن بالانى اياعانى كورىنىپ تۇر. نەگە ۇردى دەيتىندەي...
— بالام ولجاس! بۇنىڭ نە؟ سەندە انا اق مىسىقتاي دا اقىل جوق ەكەن! قاراشى، مىسىق ەكەش مىسىق تا، جاندوسقا جانى اشىپ، اراشا ءتۇسىپ جاتىر. اسىققا بولا، وزىڭنەن جەتى جاس كىشى ىنىڭە قول كوتەرۋىڭ دۇرىس پا؟ — دەدى اتاسى كەيىپ.
ولجاس اتاسىنان مۇنداي ءۋاجدى كۇتپەسە كەرەك. اق مىسىقتىڭ جاناشىرلىعىنا قايران قالدى. ءوزىنىڭ اشۋ ۇستىندە ابەستىك جاساعانىن ءبىلدى.
You Might Also Like
-
سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى اسقار جۇماعالييەۆ مۇعالىمدەر مەن وقۋشىلارعا ارنايى تاريفتىك جوسپار شىعارۋ ماسەلەسى پىسىقتالىپ جاتقانىن ءمالىم ەتتى.
