InfoHub Logo

ايبەكتىڭ كوكەسى جاقسى جاڭالىق اكەلدى. جاڭا پاتەر الاتىن بوپتى. «الاتاۋ» شاعىن اۋدانىنان. ءۇشىنشى پودەزد. توعىزىنشى قابات.

سونىمەن ايبەكتەر جاڭا پاتەرگە قونىس اۋداردى. جوعارعى قابات قورقىنىشتى سياقتى. شەشەسى «جازاتايىم قۇلاپ كەتىپ جۇرەرسىڭ» دەپ بالكونعا ءبىر ءوزىن شىعارا بەرمەيدى. ال ايبەككە سالسا بيىكتى مەكەندەۋ قىزىق سياقتى. بارىنەن بۇرىن ارلى-بەرلى قايشىلاسىپ، كوشەدە اعىلىپ جاتقان ماشينەلەر، جاياۋ جۇرگەن كىسىلەر الاقانداعىداي كورىنەدى.

تۇرعىندار كوشىپ كىرگەن سوڭ ليفت قوستى. وعان ەڭ الدىمەن اتاسى قۋاندى. سەبەبى، جيىرما كۇندەي تىسقا شىعا الماي ىلاجسىز قامالعان بولاتىن. تازا اۋانى بالكوننان، جەلكوزدەن جۇتقان. ەندى راقات. توماشاداي ۇيا-ليفتىگە ەنەدى دە، ىپ-ىلەزدە تومەنگە تۇسەدى. دالاعا شىعادى. تاياعىنا سۇيەنىپ، اۋلادا ارى-بەرى اسىقپاي جۇرەدى.

قيۋى قاشاتىن ءىس اياق استىنان ەكەن. ءبىر پودەز- دە تۇراتىن بەس-التى بالا، تۇستەن كەيىن ساباقتان قايتقاندا ءليفتىنىڭ قىزىعىن ابدەن كوردى. كوزدى اشىپ-جۇمعانشا جوعارى كوتەرىلەدى. سوسىن تومەن قۇلديلايدى. ۇلكەندەردىڭ كوبى جۇمىستا. ءاي دەر اجا، قوي دەر قوجا جوق. ليفتەگى كەزەكشىلىك جاسايتىن ورىس ايەلى دە كورىنبەيدى.

بالالار جارتى ساعاتتاي قىزىققا باتتى. تەگىن ويىن تاپقاندارىنا ءماز. ءبىر كەزدە ءجۇرىپ كەلە جاتقان ليفت سىر ەتتى دە، بەسىنشى قاباتتا توقتاپ ەسىك اشىلدى. بالالاردىڭ ەرەسەگى مىرزاش جالما-جان تۇيمەنى باستى. ليفت قوزعالمايدى. كوزدەرى الاقتاپ تۇردى-تۇردى دا، تىم-تىراقاي بەزىپ جونەلدى.

كەشقۇرىم دالاعا بەتتەگەن ايبەكتىڭ اتاسى جىلدام قايتتى. قاباعى قاتۋلى. ءوڭى سىنىق. قۇددى وكپەلەگەن بالاداي. جاق اشپايدى. سويتسە، ليفت توقتاپتى. ىستەن شىققان. جاياۋ تۇسەيىن دەسە قيىن. ءتۇسۋىن تۇسەدى-اۋ. قايىرا جوعارى كوتەرىلۋ قيامەت.

ليفت ءۇش كۇن جۇرمەدى. اتاسى داعدى بويىنشا دالىزگە شىعادا دا، ىلە ورالادى.

ايبەك وكىندى. اعاتتىق جاساعانىن اڭدادى. ولاي ەتپەيدى، ەندىگارى. دوستارىنا ءتۇسىندىرىپ ايتۋى كەرەك.

جۇگىرىپ ۇيدەن شىققان. شاحتاداعى قىزىل تۇيمە جانىپ تۇر. باسىپ ەدى، زىر ەتكەن دىبىس ەستىلىپ، ليفت كوتەرىلىپ كەلە جاتتى.

---