InfoHub Logo

ءبىزدىڭ مىسىعىمىزدىڭ ءۇش بالاسى بار. باۋىرىن جاڭا كوتەرگەن بالا مىسىقتار سۇيكىمدى-اق.

بىردە مەكتەپتەن كەلسەم، وسى مىسىقتىڭ ەكى بالاسىن بىرەۋلەر الىپ كەتىپتى. ءتىپتى الا مىسىقتىڭ ءوزىن دە قولقالاي كەلگەندەر بولدى.

كورشى اۋىلدا تۇراتىن ءاليا اپاي:

— ۇلكەن مىسىعىڭدى بەرە تۇر، ءۇيىمىزدى تىشقان باسىپ كەتتى، — دەپ اپاما بۇيىمتايىن ايتىپ جاتتى. ارينە، اپام ونىڭ كوڭىلىن جىعا المادى.

العاشقى كۇندەرى بالا مىسىق اناسىن ىزدەپ، مياۋلاۋمەن بولدى. ءوزى جۇدەپ كەتتى.

ارادا ءبىراز كۇن ءوتتى. ءبىز دە ەداۋىر كوندىگىپ قالعانبىز. تاڭەرتەڭگى شايعا وتىرعان بەتىمىز ەدى. ءبىر مەزگىلدە مىسىقتىڭ مياۋلاعان ءۇنى ەستىلگەندەي بولدى. پىرىلداپ جاتقان بالا مىسىق ەسىككە قاراي جان ۇشىرىپ اتا جونەلدى. ەسىكتى شالقايتا اشىپ جىبەردىم. ار جاعىندا ارىپ-اشىپ كادىمگى الا مىسىق تۇر. ول كىرگەن بەتتە بالا مىسىققا قاراي ۇمتىلدى. كادىمگىدەي باۋىرىنا باسىپ، جالاپ-جۇقتاپ جاتىر.

— قايران انا جۇرەك دەسەڭشى؟! زاتى مىسىق دەمەسەڭ، بۇل دا انا. اناعا بالاسىنان قىمبات ەشنارسە جوق ەكەن عوي! — اپام ءبىر ءتۇرلى ەلجىرەي ءۇن قاتتى.

بۇل كەزدە الا مىسىق بالاسىمەن الاڭسىز مارە-سارە بوپ جاتتى.

— اپا، الا مىسىقتى ەندى ەشكىمگە بەرمەيىكشى! — دەدىم مەن انا مەن بالاسىنىڭ قاۋىشقان ءساتىن قىزىقتاپ تۇرىپ.

— جارايدى، كۇنىم، بالاسىنان ايىرماي-اق قويايىق، — دەدى ول. سول كۇننەن باستاپ الا مىسىق پەن بالاسىنىڭ جۇبى جازىلمايتىن بولدى.

---