InfoHub Logo

جانازاعا بارا جاتقان ەكى مولدا بىرىنە-بىرى بىلگىشتىگىن كورسەتكىسى كەلىپ، ءدىني اڭگىمەلەردى كەزەكتەسىپ ايتا بەرىپتى. سوزدەن ءسوز شىعىپ، ءبىرى بۇحار مولدالارىن، ەكىنشىسى ۋفا مولدالارىن ماقتايدى. اقىرى ءسوز ارتى كەرىسكە سوعىپ، توبەلەسكە اينالادى. ەكەۋىنىڭ توبەلەسىنە كەلە جاتقان مۇسا دەگەن جىگىت تاپ بولادى.

تاياق جەڭكىرەگەن مولدا مۇسانى كورگەننەن-اق:

— قىرىقتىڭ ءبىرى قىدىر دەپ ەدى، وڭ نيەتىمە اللانىڭ جىبەرگەن ادامى بولارسىڭ. ءادىل تورەلىگىڭدى ايت، ساعان جۇگىنەمىز. سىنا، كۇناھار مولدا بۇحار مولدالارىن بالاعاتتاپ، دىنگە ءتىلىن تيگىزدى، — دەپ قاقساي باستاعاندا، ەكىنشى مولدا دا قاراپ قالمايدى. ول دا ءوز ءسوزىن قۋاتتاي ءتۇسىپ، انا مولدانى جامانداپ:

— ۋفا مولدالارى ەڭ قۇدايعا بەرىلگەن مولدالار ەدى، ولاردى جامانداۋ قۇدايعا ءشۇبا كەلتىرگەندىك، — دەپ مۇڭىن شاعا باستاپتى.

مۇسا از ويلانعان بولىپتى دا:

— «بۇل ءبىر كۇنقاتپا» دەگەن قيىن داۋ ەكەن، سوندا دا سىزدەرگە ءادىل تورەلىك بەرمەي بولماس. ءبىراق ايتقانىما كونەسىڭدەر، — دەپ ءسوزدى ابدەن ءپىسىرىپ الىپتى.

ەكى مولدا جارىسا سويلەپ:

— ە، باسە، «بىتەر ءىستىڭ باسىنا جاقسى كەلەر قاسىنا» دەگەن، ايتقانىڭا كوندىك، نە ىستەسەڭ دە ەركىڭدەمىز، — دەپ اللا اتىمەن انت ەتىپتى.

جىگىت كۇبىرلەپ، بىردەڭە ايتپاق كىسىدەي از وتىرىپتى دا:

— مەن ويلانىپ بولعانشا، سەندەر اناۋ قىرعا شىعىپ، بەرى قاراي جۇگىرىپ كەلىڭدەر، — دەپ شىجىپ تۇرعان ىستىق كۇندە ءبىر جۇگىرتىپ الادى. سونان كەيىن قارا تەرگە مالىنعان ەكى مولدانى كۇنگە قارسى وتىرعىزىپ قويىپ، باسىنداعى سالدەلەرىن الىپ، جالاڭباس قالدىرادى. سويتەدى دە:

— ايتتىم عوي بۇل كۇنقاتپا دەگەن قيىن داۋ، ءالى ويلانۋ كەرەك. مەن دە ءوز اتىما ءمىنىپ، سەندەردىڭ اتتارىڭدى جەتەكتەپ، انا قىردىڭ باسىنا بارىپ كەلەمىن. سەندەر وسىلاي قوزعالماي وتىرا بەرىڭدەر، — دەپ، اتىنا مىنەدى دە:

— بۇحاردىڭ مولدالارى ايۋان، ۋفانىڭ مولدالارى ارام. ويلانۋ كەرەك دەدىم عوي، ويلانىپ كەلەيىن، — دەپ شاۋىپ كەتەدى.

سول كەتكەننەن جىگىت تە، مولدانىڭ اتتارى دا، سالدەلەرى دە قايتپايدى. جىگىتتى كۇتىپ ۇزاق وتىرعان مولدالار شولدەپ ولەتىن بولعان سوڭ، تاتۋلاسادى. جىگىتتى قىردىڭ استىندا وتىرعان شىعار دەپ كەلسە، جىگىت جوق. ونىڭ «كۇنقاتپا داۋ» دەگەن سوزىنە مولدالار ەندى تۇسىنەدى.

جىگىتتىڭ بۇل قۋلىعى ەلگە تاراپ، سودان ول «مولدانى الداعان مۇسا» اتانىپ كەتىپتى.

---