InfoHub Logo

جۇمىستان قولى بوس، ەرىككەن قالجىڭباس جىگىتتەر بىردە تۇيەبايدىڭ اۋىلىنا كورشىلەس ءبىر ۇيگە جينالىپ، ەت ءپىسىپ، قازان تۇسەيىن دەپ جاتقان كەزدە تۇيەكەڭدى: «كەلىپ تاباقتاس بولسىن، كۇتىپ وتىرمىز»، — دەپ شاقىرادى. ول كەلگەنشە باستىڭ قۇيقاسىن سىپىرىپ، كوزىن ويىپ الىپ، جالاڭاش باس سۇيەكتىڭ ءوزىن عانا قالدىرىپتى. داستارحان جايىلىپ، تاباق كەلگەندە الگى قۋلاردىڭ ءبىرى:

— ويباي-اۋ، مىنا باستىڭ قۇيقاسى قايدا كەتكەن؟ — دەپتى تۇك بىلمەگەنسىپ، سوندا ەكىنشى جىگىت:

— «تۇيە بويىنا سەنىپ جىلدان قۇر قالىپتى» عوي. تۇيەكە، ۋاقىتىندا كەلمەي، باستان قۇر قالدىڭىز، كىنا وزىڭىزدەن، بۇيىرعانى سول شىعار، ىرىم بولسىن، ۇستاڭىز مىنانى! — دەپ جاڭاعى جالاڭاش باستى تۇيەبايدىڭ الدىنا قويىپتى.

وسىنداي ءازىل-قالجىڭنان ابدەن زىقىسى شىعىپ، مەزى بولعان تۇيەباي اقىرىندا قۇرداس-قۇربىلارىن شاقىرىپ، قوي سويىپ، قوناق ەتىپ، بۇرىنعى اتىن وزگەرتىپ، جاڭادان ات قويۋىن ءوتىنىپتى. جولداستارى مۇنى ءبىر اۋىزدان قۋاتتاپ، سەنىڭ اتىڭ مۇنان بىلاي «بوتاباي» بولسىن دەپ ۇيعارىپتى. ءۇي يەسى بۇعان قۋانا ريزا بولىپ، ولارعا العىس ايتىپتى.

قوناقتارى كەتكەن سوڭ تۇيەباي ايەلىنە:

— مەن جۇرتقا مازاق بولعان بۇرىڭعى اتىمدى وزگەرتتىم. الگىلەر ماعان «بوتاباي» دەپ ات قويىپ كەتتى. قالاي ساعان ۇناي ما؟ — دەپ سۇراپتى. سوندا ايەلى:

— بەتىم-اۋ، جۇرت قالجىڭداپ ايتسا، سونىڭ بارىنە سەنە بەرەتىن اشىقاۋىز بەيشارا، بۇگىن بوتا بولساڭ، كەلەسى جىلى تايلاق، ودان ارعى جىلى باياعى تۇيە بولاتىنىڭدى تۇسىنبەدىڭ بە؟! — دەپتى.

— قاپ، الگى قۋلار ەندى بۇرىنعىدان بەتەر ءاجۋلاپ، كۇلەتىن بولدى-اۋ. باسقا جاققا كوشىپ كەتپەسەم بولماس، — دەپ تۇيەباي سوندا سانىن ءبىر سوعىپتى.

---