InfoHub Logo

ە-commerce سوڭعى ۋاقىتتاردا قارقىندى دامىپ كەلەدى. ويتكەن ونلاين-ساۋدا قازىرگى تاڭدا الەمدىك ترەند بولىپ سانالادى. ونىڭ وركەندەۋىنە قازىرگى اقپاراتتىق تەحنولوگيالار مەن جاڭا يننوۆاسيالار ءوز اسەرىن تيگىزۋدە. ستاتيستيكالىق مالىمەتتەرگە سۇيەنسەك، الەمدىك ونلاين-ساۋدا 2017 جىلى 17 پايىزعا ارتقان، ونداعى قاراجات - 1،85 ترلن دوللاردى قۇرادى.

Global Ecommerce Report ۇيىمىنىڭ 2017 جىلى جۇرگىزگەن زەرتتەۋى بويىنشا، ازيا-تىنىق مۇحيتى ايماعى الەمدىك ەلەكتروندى ساۋدانىڭ 50 پايىزىن يەمدەنىپ وتىر. اتالعان ايماقتا ونلاين-ساۋدانىڭ دامۋ قارقىنى جىل سايىن 20 پايىزدى كورسەتەدى. الايدا، سولتۇستىك امەريكادا بۇل ساۋدا ءتۇرىنىڭ دامۋ دەڭگەيى 9 پايىزدى قۇرايدى.

ەلەكتروندى كوممەرسياسى دامىعان الپاۋىت مەملەكەتتەرگە كەلەتىن بولساق، ەڭ الدىڭعى ورىندى 681 ملرد دوللارمەن جۇڭگو الادى. ارتىنشا، اقش (438 ملرد دوللار)، ءۇشىنشى ورىن بولسا ۇلىبريتانياعا تيەسىلى (196 ملرد دوللار).

اۋستراليا مەن تۇركيا ەلدەرىندە دە اتالعان ساۋدا ءتۇرى دامۋ ۇستىندە. ەلەكتروندى ساۋدانىڭ ءوسۋ قارقىنى 31 پايىزدان 40 پايىزعا دەيىن ەكەن. ال، وسى ايماقتارداعى ەلەكتروندى كوممەرسيانىڭ دامۋ دەڭگەيى ورتا ەسەپپەن العاندا 17 پايىزدى قۇرايدى.

ەۋروپا مەملەكەتتەرىندە ە-commerce ءجىو-نىڭ 4،91% قۇرايدى. ودان كەيىنگى ورىندى ازيا-تىنىق مۇحيتى ەلدەرى يەمدەنەدى (4،87%). ال، ەڭ جوعارعى كورسەتكىش قىتايعا تيەسىلى (ءجىو – 7،9%)، ءجىو بويىنشا ەكىنشى ورىندى فرانسيا الادى (3،95%).

يندونەزيادا حالىقتىڭ نەبارى 15 پايىزى ينتەرنەتپەن قامتىلعان، ال ونىڭ 29 پايىزى عانا ينتەرنەت-دۇكەندەردىڭ قىزمەتىن پايدالانادى. دەگەنمەن، بۇل ەلدىڭ ەلەكتروندى ساۋداسى جىل ساناپ 24،2 پروسەنتكە ارتۋدا.

حالىقارالىق ەلەكتروندى ساۋدا قورىنىڭ كوورديناتورى سارا لوۋننىڭ (Sara Lone) ايتۋىنشا، الەمدىك ونلاين-ساۋدا نارىعى دامىپ كەلەدى. ونىڭ وركەندەۋى تىكەلەي مەملەكەتتىڭ ەكونوميكالىق ساياساتىنىڭ دۇرىستىعىنا بايلانىستى. بۇعان قوسا، ينتەرنەت قولدانۋشىلار سانى دا ءوسىپ كەلەدى ەكەن. بۇل ءوز كەزەگىندە ەلەكتروندى كوممۋنيكاسيانىڭ دامۋىنا سەرپىن بەرىپ، جاڭا تۇتىنۋشىلار لەگىن قالىپتاستىرادى ەكەن.

Global Ecommerce Report-تىڭ زەرتتەۋىنە سايكەس، الەمدىك تۇتىنۋشىلاردىڭ 53 پايىزى الەۋمەتتىك جەلىلەر ارقىلى ساۋدا جاسايدى. وسى رەتتە Facebook الەۋمەتتىك جەلىسىنىڭ ورنى ايرىقشا. ياعني، تۇتىنۋشىلاردىڭ 46 پروسەنتى ەلەكتروندى ساۋدانى قولدانادى.

ە-كوممەرسياداعى ماسەلەلەردىڭ ءبىرى — سەنىم. ونلاين-ساۋدانى پايدالانۋشىلاردىڭ 42 پايىزى سەنىمنىڭ اتالعان سالا ءتۇرىنىڭ دامۋىنا اسەر ەتەتىنىن ايتقان.

ونلاين-ساۋداداعى الەمدىك ۇزدىك كومپانيالارعا كەلەر بولساق، Amazon.com، Itunes.com، Zappos.com، Ebay.com، Officedepot.com جانە ت.ب.

مىسال رەتىندە وسى كومپانيالاردىڭ 2-نە توقتالا كەتسەك، Amazon.com– حالىقارالىق دەڭگەيدەگى ەڭ ءىرى ينتەرنەت كومپانيا. مۇندا تاۋار ءتۇرىنىڭ بارلىعى بار. ماسەلەن، ساعاتتان باستاپ، كولىك دوڭگەلەگىنە دەيىن الۋعا بولادى. بۇل ۇيىمنىڭ قىزمەتىن پايدالانۋشى الەمدىك مەملەكەتتەر اقش، برازيليا، كاناادا، ۇلىبريتانيا، گەرمانيا، جاپونيا، فرانسيا، پولشا، يسپانيا، ءۇندىستان، جۇڭگو، تمد مەملەكەتتەرى. سونداي-اق، اتالعان مەملەكەتتەردە وسى كومپانيانىڭ فيليالدارى ورنالاسقان. Financial Timesء-تىڭ 2017 جىلعى مالىمەتىنشە، ونىڭ كاپيتاليزاسياسى 506 ملرد دوللاردى قۇراسا، جىلدىق تابىسى 3 ملرد دوللاردى كورسەتىپ وتىر. ال، 2016 جىلى جىلدىق تابىس 600 ملن دوللارعا تومەن بولعان ەدى. ال، Bloomberg Billionaires Index ايتۋىنشا، Amazon نەگىزىن سالۋشىسى  دجەفف بەزوستىڭ جاعدايى 100 ملرد دوللارعا باعالانىپتى.

ال، Itunes.com-نىڭ جارتىسى Apple نەگىزىن سالۋشىسى ستيۆا دجوبسقا تيەسىلى. اتالعان مەكەمە ينتەرنەتتە اۋديو ماتەريالداردى ساتۋمەن اينالىسۋ بويىنشا ەڭ جوعارى كورسەتكىشكە يە. مۇنداعى مۋزىكالار 99 سەنتپەن باعالانادى. الەمنىڭ 600 ملن تۇرعىنى وسى كومپانيانىڭ قىزمەتىن تۇتىنادى ەكەن. بۇل كومپانيا Apple-گە تيەسىلى بولعاندىقتان Appleء-دىڭ جىلدىق تابىسىن كورسەتكەندى ءجون سانادىق. ياعني، 2018 جىلدىڭ ءبىرىنشى جارتىجىلدىعى بويىنشا 83 ملرد دوللاردى قۇرادى.

قازاقستانداعى ە-كوممەرسيانىڭ دامۋى دەڭگەيى دە جىل ساناپ ارتۋدا. ستاتيستيكالىق مالىمەتتەر بويىنشا، ەلىمىزدە 10 ملن. ادام ينتەرنەتتى پايدالانادى ەكەن. 2017 جىلى ق ر ەلەكتروندىق ساۋدا نارىعىنىڭ كولەمى 106،9 ميلليارد تەڭگەنى قۇراعان. ياعني، ول بولشەكتىك تاۋار اينالىمى كولەمىنىڭ 1،2 پايىزىن قۇرادى.  ال، 2018 جىلدىڭ 5 ايىنداعى ەلەكتروندىق ساۋدا نارىعىنىڭ كولەمى 101 ميلليارد تەڭگەنى نەمەسە بولشەك تاۋار اينالىمىنىڭ جالپى كولەمىنىڭ 2،9 پايىزىن كورسەتكەن.

ونلاين-ساۋدا سالاسىندا satu.kz‎، تەحنودوم، kaspi.kz، flip.kz، AliExpress سياقتى ءىرى ويىنشىلاردىڭ قىزمەتى ەلىمىزدە كۇننەن كۇنگە جاندانىپ، سۇرانىسقا يە بولىپ جاتىر.

---