InfoHub Logo

بۇرىنعى ۋاقىتتا كەڭ دالادا جۇرگەن التى تۇلكى باس قوسىپ، جولداس بولىپتى. التاۋىنىڭ ىشىندە ءبىر تۇلكىنىڭ قۇيرىعى شولاق ەكەن. ال ۇزىن قۇيرىعى بۇلاڭداعان بەس تۇلكى:

– سەنىڭ قۇيرىعىڭ جوق، شولاقسىڭ، – دەپ، كەلەكەلەپ كۇلە بەرىپتى.

ولاردىڭ بۇل قىلىعىنا ىزالانعان شولاق تۇلكى: «وسى ماقتانشاق بەس تۇلكىنى قۇيرىقتارىنان ايىرىپ، قالاي شولاق قىلسام ەكەن؟ سوندا مەنىمەن تەڭەسەر ەدى»، – دەپ، كوپ ويلانىپتى.

اقىرى، ءبىر امال تابادى دا الگى بەس تۇلكىگە كەلىپ:

– قاشانعى بۇيىعىپ جۇرە بەرەمىز. ءبىر جاقسى ويىن وينايىقشى، ءىشىمىز پىستى عوي، – دەپ، ءوتىنىش ايتىپتى.

– ويناساق وينايىق، سەن باستا، – دەپتى، بەس تۇلكى كەلىسىپ. شولاق تۇلكى الگى ماقتانشاق سەرىكتەرىن ەرتىپ، قالىڭ قاراعايدىڭ ىشىنە الىپ كەلىپتى. سودان كەيىن ويىن شارتىن ايتىپ، بەسەۋىنىڭ قۇيرىعىن بەس قاراعايعا مىقتاپ تاڭىپ تاستايدى دا ءوزى بيىك ءبىر توبەنىڭ باسىنا شىعىپ تۇرادى. باسقا تۇلكىلەر ول حابار بەرگەنشە، كوزدەرىن جۇمىپ تۇرۋعا ءتيىس بولادى. ءبىر كەزدە شولاق تۇلكى جان-جاعىنا ابىرجي قاراپ:

– و، تۋىسقاندار، ساقتانىڭدار! مىنا جاقتا بۇركىت ۇستاپ، تازى ەرتكەن اڭشىلار كەلە جاتىر! – دەپ، ايقاي سالادى دا ءوزى بەلدەن ءارى اسىپ، قاشا جونەلەدى.

سول كەزدە قاراعايعا تاڭۋلى تۇرعان بەس تۇلكى ەسى شىعىپ، تۇرا قاشپاق بولىپ جۇلقىنعاندا، بەسەۋىنىڭ دە قۇيرىقتارى جۇلىنىپ، شولاق بولىپ قالىپتى.

وزدەرى ادەمى قۇيرىقتارىنان ايىرىلىپ، شولاق بولعان سوڭ، سەرىگىن مازاقتاۋدى قويىپتى.

ءسويتىپ، شولاق تۇلكى ءوزىن كەلەكەلەگەن بەس تۇلكىنىڭ دەسىن باسىپ، وزىنە سەرىك قىپ الىپتى.

---