InfoHub Logo

كول جاعالاپ كەلە جاتقان ءبىر تۇلكى سول ماڭدا جۇرگەن تىرناعا جولىعىپ، جولداس بولىپتى. ءبىر كۇنى جايىلىپ ءجۇرىپ، جاقىنداپ قالعان سوڭ تۇلكىنىڭ ىنىنە كەلىپ كىرىپتى. بۇلاردىڭ ىزىنە اڭشى تۇسكەن ەكەن، ول دا ىنگە كەلىپتى. سونان سوڭ ەندى ەشقايدا كەتپەيسىڭ دەپ، تۇلكى ءىنىنىڭ اۋزىن قازا باستايدى. ءبىراز تومەنىرەك تۇسكەن سوڭ، تۇبىنە ەركىن جەتەدى-اۋ دەگەن كەزدە، ىنگە شىبىق سالىپتى. شىبىق ىندەگى تۇلكى مەن تىرنانىڭ دەنەلەرىنە ءتيىپ، وسقىلاپ زىقىسىن شىعارعان سوڭ، تىرنا ءبۇرىسىپ وتىرعان تۇلكىگە:

         – الپىس امال تۇلكىدە، الپىس ەكى امال ادامدا دەۋشى ەدى، سول امالىڭنىڭ بىرەۋىن جاساپ، قۇتقارساڭشى. ايتپەسە، ولەمىز! – دەپتى. سوندا قالشىلداعان تۇلكى:

         – امالىم قۇرىدى! – دەپتى ءبۇرىسىپ.

         شىبىقتىڭ قىسىمىنان ولەتىن بولعان سوڭ، تىرنا بىلاي دەپتى:

         – ولاي بولسا، مەنىڭ ءبىر امالىم بار. سونى قولدانىپ كورەيىن. ءساتى تۇسسە، قۇتىلىپ كەتەرمىز.

         – وندا سول امالىڭدى تەزىرەك ىستە! – دەپتى، تۇلكى ساسقالاقتاپ. تىرنا ءوز امالىنىڭ قالاي قولدانىلاتىن ءتاسىلىن تۇلكىگە تۇسىندىرە باستايدى.

         – مەن ولگەن بوپ، ءىننىڭ اۋىز جاعىنا بارىپ جاتايىن. اڭشى قولىن سوزىپ، مەنى سۋىرىپ الادى دا سەنىڭ جەمتىگىڭ ەكەن دەپ، ءارى قاراي تاستاي سالادى. سول كەزدە مەن تىراۋلاي قيقۋلاپ، ۇشا جونەلەمىن. اڭشى تاڭدانىپ، جالت قارايدى مەن جاققا. سول زاماتتا سەن ىننەن اتقىپ شىق تا زىتا بەر.

         وسىنى ايتىپ، تىرنا ءىننىڭ اۋىز جاعىنا بارىپ جاتادى. اڭشى شىبىعىنا ەشتەڭە ىلىنە قويماعان سوڭ، قولىن سالىپتى. ىشكەرىلەتە سوزعان ەكەن، قولىنا تىرنا ىلىگىپتى. اڭشى سۋىرىپ الىپ قاراسا، موينى بىلق-سىلق ەتەدى. ولگەن تىرنا ەكەن عوي دەپ ارت جاعىنا تاستاي سالىپتى. سول كەزدە تىرنا تىراۋلاي جورعالاپ، قيقۋلاي ۇشا جونەلىپتى. اڭشى قاپ دەپ، ارتىنا جالت بۇرىلعان مەزەتتە تۇلكى دە ىننەن اتىپ شىعىپ، قالىڭ بۇتانىڭ اراسىنا قويىپ كەتىپتى.

         ءسويتىپ، تىرنانىڭ تاپقىرلىعىنىڭ ارقاسىندا تىرنا دا، تۇلكى دە اڭشىنىڭ قولىنا تۇسپەي، امان قۇتىلىپ كەتكەن ەكەن.

---