InfoHub Logo

شاۋدىربايەۆا گۇلنار يمانعالي قىزى،
بەينەۋ ليسەيىنىڭ جوعارى ساناتتى
تاريح جانە قۇقىق نەگىزدەرى ءپانى ءمۇعالىمى،
ديرەكتوردىڭ تاربيە ءىسى جونىندەگى ورىنباسارى
ماڭعىستاۋ وبلىسى بەينەۋ اۋدانى

اقمىشتا تۋىپ، اقش-تا جۇلدە العان

ءامين اعانىڭ اتىن بالا كەزىمنەن ەتىپ ءوستىم. اكەم يمانعالي «ءبىزدىڭ ءامينجان ايدى اسپانعا شىعاردى عوي» دەپ وتىرسا، انام جىبەك «جەلاياق بالا ءبىزدىڭ اۋىلعا قاشان كەلەر ەكەن» دەپ قاينىسىنىڭ جولىن توساتىن. سول كەزدە مەنىڭ كوز الدىما ەرتەگىدەگىدەي تاۋسوعار، كولتاۋسارلارمەن اتى قاتار اتالاتىن جەلاياق ەلەستەيتىن. اكەمنىڭ جازۋ ۇستەلىنىڭ جوعارعى جاعىنداعى سورەدە جيناۋلى تۇراتىن م. ءابدىحالىقوۆتىڭ «جەلاياق بالا» كىتابىن قايتا-قايتا پاراقتايتىنمىن. «قارا ءتۇستى جۇيرىكتەردى» ارتقا تاستاپ جۇيتكىپ كەلە جاتىرعان ءامين اعانىڭ سۋرەتىنە قاراي وتىرىپ، ماقتانىشقا بولەتىنمىن. كىشكەنتاي جۇرەگىممەن قازاقتىڭ اتىن دۇنيە جۇزىنە تانىتقان ءامين اعاما بار جاقسىلىقتى تىلەيتىنمىن.
مەكتەپتە ۇستازدىق قىزمەت اتقاراتىن اكەم 1969 جىلدىڭ جازعى ەڭبەك دەمالىسىن الىپ، سول كەزدەگى سام ورتا مەكتەبىنىڭ ديرەكتورى، ءوزىنىڭ جان جولداسى ەكىبايەۆ جانبوز اعا ەكەۋى الماتىعا جولعا جينالدى، «ءامينجانعا بارىپ قايتامىز، بۇرىنعى جەڭىستەرىن ايتپاعاننىڭ وزىندە سوڭعى جىلدارداعى تابىستارى مولايدى ەمەس پە؟ بيىل مەكتەپ بىتىرگەن بايبولدى دا ( جاكەڭنىڭ ۇلى) الا كەتەمىز، وقۋعا اپارامىز، ءامين اعاسىنا تاپسىرامىز، باس-كوز بولىپ ءجۇرسىن» دەگەنى ءالى ەسىمدە. ول جىلى مەن 1-سىنىپتى ءتامامداعان ەدىم. الماتىعا كەتكەن جولاۋشىلاردىڭ جولىن اسىعا توسۋدامىز. ءبىر كۇنى ولار دا ورالدى. اكەم دە، جاكەڭ دە كوڭىلدى. بايبول اعا كازپي-دىڭ دەنەشىنىقتىرۋ ءپانى مۇعالىمدەرىن دايىندايتىن فاكۋلتەتىنە وقۋعا تۇسكەن. اكەم شابادانىنان بازارلىقتارمەن بىرگە قىزىل جىبەك ماتادان تىگىلگەن، جيەگىن قارا اتلاسپەن كومكەرگەن، الدىڭعى ەتەگىندە بىزگە بەيمالىم ارىپتەرمەن جازىلعان جازۋى بار ادەمى شاپاندى شىعارىپ، الدىمىزعا تارتتى. بۇل شاپاندى ءامين اعا جاپونياداعى جەڭىستى كۇندەرىنەن ەستەلىك رەتىندە مەنىڭ اكەمە، اعاسى يمانعاليعا سىيعا تارتۋ ەتىپتى.

ءامين اعا 1937 جىلى 12 اقپاندا ماڭعىستاۋ تۇبەگى شايىر اۋىلىندا اقمىش قونىسىندا ەلەمەس اتامىزدىڭ شاڭىراعىندا دۇنيەگە كەلگەن. اتا-بابالارى كاسپييدىڭ جاعاسىنداعى قالامقاس، قاراجانباس دەگەن جەرلەردى مەكەندەگەن. ەلەمەس اتا اقمىشتا قونىس تەۋىپتى. ءامين اعانىڭ قىستىڭ ناعىز قاھارلى كەزىندە ومىرگە كەلۋىن كەيىنگى ءومىر جولىنداعى جانقيارلىق ەڭبەگى، قايتپاس قايسارلىعىمەن بايلانىستىرار ەدىم. ءامين اعانىڭ ءومىر جولىنا ۇڭىلسەك، بالالىق شاعى سوعىستىڭ وتىنە، ەلدىڭ ابدەن تارىعىپ، قينالعان كەزىنە ءدوپ كەلىپتى. مەكتەپكە كورشى اۋىلعا 7-8 شاقىرىم جەرگە جاياۋ قاتىناپ وقيتىن. سالت ات، اربا-شانا كولحوزدىڭ شارۋاسىنان بوسامايتىن.
كەشكە مەكتەپتەن ۇيگە جالعىز قايتادى. قاراڭعىدا قارشاداي بالا ەكى اۋىلدىڭ اراسىندا بەزىلدەپ جۇگىرەدى ەكەن. الايدا ءوزىنىڭ اياق دۇبىرىنەن شوشىنىپ جىلاعان كۇندەرى دە از بولماعان. «ۇيدەن الىپ شىققان ازىق-تۇلىگىمىزدى جارتى جولعا كومىپ كەتىپ، قايتاردا تاۋىپ الىپ، جۇرەك جالعايمىز» دەيدى ءامين اعا. ەكى اۋىلدىڭ اراسىندا قىسى-جازى قۇستاي ۇشىپ جۇرگەن كۇندەرى كەيىن الەمگە تانىمال جۇيرىك بولۋىنا سەپتىگىن تيگىزدى دەسە دە بولعانداي. سەبەبى تازا اۋادا جۇگىرگەن ادامنىڭ تىنىسى كەڭ، دەنەسى شىمىر، ءوزى ءتوزىمدى بولادى ەمەس پە؟

بالا ءامين ساباققا العىر، زەرەك بولعان. اجەسى ماقپالدىڭ باۋىرىندا وسكەن ول كىشكەنتايىنان اۋىز ادەبيەتىنە جاقىن بولىپتى. تالاي قيسسالاردى جاتقا سوعىپتى. اتاسى تۇياق پەن تۋىسى مۇلىكباي، اجەسى ماقپال كىشكەنتاي امينگە «قوبىلاندى»، «ەدىگە»، «ەر تارعىن» جىرلارىن جاتقا وقىتىپ، وزدەرى سول تاقىرىپتا اڭگىمە قوزعايدى ەكەن. اتالارى مەن اجەلەرىنىڭ ادامگەرشىلىك، ىزگىلىك، باتىرلىق تۋرالى تۋرالى اڭگىمەلەرىن ەستىپ، حالىق اۋىز ادەبيەتىمەن سۋسىنداپ وسكەن ءامين اعانىڭ ەسەيگەن شاعىندا ادەبيەت پەن تاريحقا قىزىعۋى، ونەر مەن ادەبيەت سالاسى وكىلدەرىمەن ەتەنە ارالاسۋى، سىيلاسۋى زاڭدى قۇبىلىس ەدى.
بالالىق شاعىن سوعىس ۇرلاعان جاس ءامين بۇعاناسى ەرتە بەكىپ، ەڭبەككە ەرتە ارالاستى. الايدا قازاقتىڭ جاقسىسى مەن جايساڭدارىن جايپاپ جىبەرگەن زۇلمات جىلدارى دۇنيەگە كەلگەن ءامين اعانى نۇرلى بولاشاق كۇتىپ تۇر ەكەن. ونىڭ الدىندا سول كۇندەرگە جەتۋ ءۇشىن تاعدىردىڭ ءتۇرلى كەدەرگىلەرىنەن سۇرىنبەي ءوتۋ مىندەتى تۇر ەدى. ەلەمەس اتا دا بالاسىنىڭ جاس كەزىندە اتاعى الىسقا كەتىپ، ايتۋلى دودالاردان جۇلدە الادى دەپ ويلاماعان شىعار. ءامين اعانىڭ بالا كەزىندە سپورتپەن شىنداپ اينالىسۋ مۇمكىن ەمەس ەدى. ەسكى-قۇسقى كيىمدەردەن دوپ جاساپ تەۋىپ، كوشەنىڭ قۇمىن كوككە شىعارعاننان باسقا امال بولمادى. ءبىراق بويى ۇزىن بولماسا دا قيمىلى شيراق جىگىتتىڭ دەنە شىنىقتىرۋ ءپانى بويىنشا جەتىستىكتەرى مول ەدى.

ءامين اعا 1954 جىلى شاحتا ورتا مەكتەبىن بىتىرگەن كەزدە ەلەمەس اتانى سوعىستان قالعان ەسكى جارا مازالاپ اۋىرىپ ءجۇر ەدى. ءوزىنىڭ اۋىرعانىنا قاراماستان بالاسىنىڭ بولاشاعىن ويلاعان اتامىز جيعان-تەرگەنىن ءامين اعانىڭ قالتاسىنا سالىپ، وقۋعا اتتاندىرادى. ءامين اعا 17 جاسىندا اتىراۋ پەداگوگيكالىق ينستيتۋتىنىڭ فيزيكا-ماتەماتيكا فاكۋلتەتىنىڭ ستۋدەنتى اتاندى. كوپ ۇزاماي ەلەمەس اتانىڭ دەنساۋلىعى تۇزەلىپ، ءامين اعانىڭ كوڭىلى ورنىنا تۇسەدى. ول ينستيتۋتتا جاقسى وقيدى. ۇزدىك ستۋدەنتتەرگە بەرىلەتىن 35 سوم ستيپەنديانى تۇراقتى الىپ تۇردى. ول كەزدە ورتاشا وقيتىنداردىڭ ستيپەندياسى – 22 سوم بولاتىن.
سول جىلى اتىراۋعا ماماندىعى دارىگەر، ءوزى جەڭىل اتلەتيكادان رازريادتى سپورتشى انجەليكا ميحايلوۆنا كۋليكوۆا قىزمەتكە كەلەدى. ول كەلگەن بويدا ستۋدەنتتەردەن جۇيرىكتەر توبىن قۇرىپ، اقىسىز جاتتىقتىرۋ باستايدى. ءبىرىنشى كۋرس ستۋدەنتى ءامين اعا دا كۋليكوۆانىڭ قاراۋىندا جاتتىعۋ توبىنا ەنەدى. 1954 جىلى بوزبالا ءامين 100 مەترگە جۇگىرۋدە 12،3 سەكۋند ناتيجەمەن اتىراۋ قالاسىنىڭ چەمپيونى اتانادى. كۋليكوۆانىڭ شاكىرتتەرى 1956 جىلى الماتىدا وتكەن قازاقستاننىڭ ءبىرىنشى سپارتاكياداسىندا اتىراۋ وبلىسىنىڭ نامىسىن قورعايدى. وسى سىندا ءامين تۇياقوۆ بەسىنشى ورىنعا يە بولدى. بۇل باسەكەدە 1-2 قازاق جەلاياعى عانا جارىسقا شىعادى.

وسى سپارتاكيادادا كوزگە تۇسكەن سپورتشىلاردان قازاقستان قۇراماسى جاساقتالىپ، ماسكەۋدەگى وداقتىق سپارتاكياداعا ازىرلىككە كىرىسەدى. قازاق سپورتىنىڭ باسشىسى ءابدى ارتىقوۆ «قۇرامادا قازاق جاستارىنىڭ بولعانى دۇرىس» دەپ، جەڭىل اتلەتتەر كومانداسىنا ءامين تۇياقوۆتى قوسادى. الماتىعا كەلگەن سوڭ اۋىل بالالارىنىڭ كەز-كەلگەنى ورىنداي الاتىن جۇگىرۋ، سەكىرۋ سەكىلدى جاتتىعۋلارى تانىمال ماماندارعا ۇناعان سوڭ عانا ءامين اعا وزىنەن جاپ-جاقسى جەلاياق شىعاتىنىنا سەنە باستايدى. سول سەنىم اۋىلدان كەلگەن جاس جىگىتتىڭ تىنباي جاتتىعىپ، شەلەكتەپ تەر توگۋىنە ۇلاسقان ەدى. سودان ۇلتتىق قۇراما كسرو حالىقتارىنىڭ سپارتاكياداسى باستالاردان ءبىر اي بۇرىن ماسكەۋگە اتتانادى. ماسكەۋدەگى «ستالين» اتىنداعى ستاديوندا ءبىزدىڭ جەلاياقتار جەرگىلىكتى سپورتشىلارمەن بىرگە جاتتىعۋعا كىرىسەدى. جەڭىل اتلەتيكا كومانداسىندا جالعىز قازاق - ءامين تۇياقوۆ. ون بەس وداقتىق رەسپۋبليكا مەن ماسكەۋ، لەنينگراد (سانك-پەتەربۋرگ) قالالارىنان جينالعان مىقتىلاردىڭ جارىسى ءامين اعاعا قاتتى اسەر ەتتى. ءامين اعا قوسالقى قۇرامدا بولىپ، جارىسقا قاتىسپاسا دا، نەبىر اسەرلى ساتتەرگە كۋا بولدى. مىقتى جەلاياقتاردى كوزىمەن كوردى. ولارمەن بىرگە تەر توكتى. كوپ سپورتشىلارمەن ءتانىس-بىلىس بولدى، ەل كورىپ، جەر كورىپ ەلگە مول اسەرمەن ورالدى. وسىدان كەيىن جانكەشتى جاتتىعۋلار قايتا باستالدى. جەڭىس جولى ءارقاشان دا اۋىر بولعان. ءامين اعانىڭ 100،200 مەتر قاشىقتىقتاعى ناتيجەلەرى ەكى جىلعا دەيىن جىلجىماي قويدى. ايانباي توگىلگەن تەردىڭ ناتيجەسىندە 1958 جىلى 100 مەتر قاشىقتىققا جۇگىرۋدە ءبىرىنشى رازريادتىڭ دارەجەسىنە جەتكەن نامىسقوي جىگىت ودان ءارى دە ايانىپ قالعان جوق. اپتاسىنا تورت-بەس مارتە قارا تەر بولىپ جاتتىعادى. ناتيجەسىندە 1959 جىلى ماڭداي تەرى اقتالىپ، قازاقستان چەمپيوناتىندا 100،200،400 مەتر قاشىقتىقتاردا الدىنا جان سالماي، جەڭىمپاز اتاندى.

1959 جىلدان باستاپ ا. م. كۋليكوۆا جاتتىعۋ جۇيەسىنە وزگەرىس ەنگىزدى. بۇرىن جەلاياقتار قىستا جابىق عيماراتتا جاتتىعۋ جاساسا، ەندى دەنە قىزدىرۋ جاتتىعۋلارى زالدا، ال جۇگىرۋ جاتتىعۋلارى دالادا وتەتىن بولدى. تازا اۋاداعى كاسىبي دايىندىق كوپ ۇزاماي ءوز ناتيجەسىن بەردى. 1959 جىلدىڭ جازىندا ءامين اعا 100 مەتردى العاش رەت10،8، ال 200 مەتردى 21،8 سەكۋندتا جۇگىرىپ ءوتتى. 1960 جىلى رەسەيدە بولعان «بۋريەۆەستنيك» ەرىكتى سپورت قوعامىنىڭ وداقتىق بىرىنشىلىگىندە 100 مەتردى 10،4 سەكۋندتا ارتقا تاستاعان ءامين تۇياقوۆ «كسرو سپورت شەبەرى» اتانۋمەن قاتار، جەڭىس تۇعىرىنا كوتەرىلدى. 200 مەترگە جارىستا دا قازاق جەلاياعى «التىن مەدالدى» ەشكىمگە بەرگەن جوق

1961 جىلى لەنينگرادتا كەڭەس وداعىنىڭ اسكەريلەر چەمپيوناتىندا 60 مەتردە توپ جارعان ءامين تۇياقوۆ سسكا-عا قابىلداندى. كسرو قۇراماسىنىڭ باس باپكەرى گاۆريل كوروبكوۆ ءاميندى ماسكەۋدەگى سسكا-نىڭ جاتاقحاناسىنا ورنالاستىرىپ، ستيپەنديا تاعايىنداتتى. كسرو-نىڭ ۇلتتىق قۇراماسىندا تۇياقوۆ قىسقا قاشىقتىقتار بويىنشا جاتتىقتىرۋشى، ءبىر كەزدەگى اتاقتى جەلاياق بوريس توكاريەۆتىڭ باسشىلىعىمەن جاتتىعۋعا كىرىستى. ەكەۋى بىردەن ءتىل تابىستى. كەڭەس وداعىنىڭ مىقتىلارىمەن ءبىر قۇرامادا بولۋ، بىرگە جاتتىعۋ ءامين اعانى شىڭداي ءتۇستى. 1962 جىلعى كسرو چەمپيوناتىندا ءامين تۇياقوۆ كوپتەن ارمانداعان بيىگىنە جەتتى. وسى جىلى تامىزدىڭ 13ء-شى جۇلدىزىندا قازاق جەلاياعى 200 مەتردى 21،1 سەكۋندتا جۇگىرىپ ءوتىپ، تۇڭعىش رەت كسرو چەمپيونى اتاندى. 1963 جىلى سول جەتىستىگىن تاعى قايتالادى، كسرو حالىقتارىنىڭ سپارتاكادياسىندا ءامين ەلەمەس ۇلى 200 مەترگە جۇگىرۋدە الدىنا جان سالعان جوق. 1962-67 جىلدار ارالىعىندا ءامين اعا 200 مەترگە جارىسۋدا الەمدەگىڭ ەڭ تاڭداۋلى جۇيرىكتەردىڭ ءبىرى بولدى. 1967 جىلى ول كسرو حالىقتارىنىڭ سپارتاكادياسىندا وسى قاشىقتىقتا ەكىنشى رەت توپ جاردى. ءامين تۇياقوۆتىڭ 1965 جىلى 200 مەترگە جاڭعىرتقان كسرو رەكوردى (20،6 سەكۋند) ءۇش جىل بويى بۇزىلعان جوق. ءامين اعانىڭ 100 مەتر قاشىقتىقتاعى ەڭ ۇزدىك ناتيجەسى-10،2 سەكۋند، بۇل كورسەتكىش سول جىلدارداعى كسرو رەكوردى بولاتىن.ءامين اعا 1965 جىلى الماتىدا بولعان كەڭەس وداعىنىڭ چەمپيوناتىندا وسى ناتيجەمەن كسرو چەمپيونى ەدۆين ءوزوليننىڭ رەكوردىن قايتالادى. الماتىداعى چەمپيوناتتا ول 100 مەترگە جۇگىرۋدە «كۇمىس مەدالگە» يە بولدى. ال، 200 مەتردە كسرو چەمپيوناتىنىڭ «التىن مەدالىن» كەۋدەسىنە تاقتى. جالپى ءامين تۇياقوۆ - 200 مەترگە جۇگىرۋدە كسرو-نىڭ بەس دۇركىن چەمپيونى.

1965 جىلى كييەۆتە كسرو-اقش جەلاياقتارىنىڭ جەكپە-جەگى ءوتتى. سول سىندا قۇرامىندا ەدۆين وزولين، ءامين تۇياقوۆ، عۇسمان قوسانوۆ، نيكولاي پوليتيكو بار كەڭەس وداعىنىڭ ەستافەتالىق كومانداسى 4/100 مەترلىك باسەكەدە 1964 جىلى وليمپيادا چەمپيوندارى اتانعان اقش جەلاياقتارىنان وزىپ كەتتى. ەكىنشى كەزەكتە جۇگىرگەن ءامين تۇياقوۆ قارسىلاسىن وق بويى ارتقا تاستاپ، عۇسمان قوسانوۆقا تاياقشانى بۇرىن بەردى. ياعني ەكىنشى كەزەڭنەن كەيىن كسرو قۇراماسى العا شىقتى.قوسانوۆ سول ارتىقشىلىقتى ساقتاپ، پوليتيكوعا الدىمەن جەتتى. پوليتيكو كومبە سىزىعىن قيعاندا تابلودا 39،3 سەكۋند ناتيجە جارقىراپ تۇر ەدى. بۇل كسرو-نىڭ جاڭا رەكوردى ەدى. بۇعان دەيىن ەش قۇرامادان ءدال بۇلاي ۇتىلماعان اقش جۇيرىكتەرى امالسىزدان جەڭىلگەنىن مويىندادى. شىنىندا دا وليمپيادا چەمپيوندارىن تىزە بۇكتىرۋ كسرو قۇراماسىنىڭ الەمدەگى مىقتى كوماندانىڭ ءبىرى ەكەنىنە دالەل ەدى. ءامين ەلەمەس ۇلى كەڭەس وداعىندا عانا توپ جارىپ قويعان جوق، ەۋروپا كۋبوگىنىڭ جەڭىمپازى ءارى بىرنەشە مارتە جۇلدەگەرى اتاندى. بۇل دەگەنىڭىز قازىرگى ەۋروپا چەمپيونى دەگەن ۇعىمدى بىلدىرەدى. سەبەبى ول كەزدە ەۋروپا چەمپيوناتى وتپەيتىن ەدى. جەڭىل اتلەتيكادان الەم چەمپيوناتى 1970 جىلداردىڭ ورتاسىنا تامان تۇساۋ كەستى. سوندىقتان ءامين اعانىڭ سپورتتىق اتاقتارىن ايتقاندا ەۋروپا كۋبوگى مەن كسرو چەمپيوناتتارىنداعى جۇلدەلەرمەن ءامين تۇياقوۆ 1964 جىلعى توكيو وليمپياداسىنا كسرو قۇراماسىنىڭ ساپىندا باردى. بارتەنوۆ تۇياقوۆتى جارىسقا قوسقان جوق. سول جىلى كوكتەمدە كييەۆتە بولعان ءىرى باسەكەدە 100،200 مەتردە جەكە- دارا شىققان ءامين تۇياقوۆتىڭ ورنىنا بارتەنيەۆ توكيودا بوريس ساۆچۋكتى جارىس جولىنا شىعاردى. مۇنىڭ تۇپ-توركىنى باس باپكەر مەن سپورتشى اراسىنداعى كوزقاراس قايشىلىعىندا، ءوزارا كەلىسپەۋشىلىكتە جاتىر. ومىردە مۇنداي جاعدايلار بولىپ تۇرادى.

ءامين اعا ۇزاق جىلدار سپورت مەكتەپتەرىندە جاتتىقتىرۋشى، ودان كەيىن قازاقستان ۇلتتىق قۇراماسىندا باس باپكەر بولىپ قىزمەت اتقاردى. ەڭبەگى جەمىسسىز بولعان جوق. شاكىرتتەرى وليمپيادا ويىندارى مەن الەم قۇرلىق چەمپيوناتتارىندا جۇلدە الدى. تۇياقوۆتان ءتالىم العان مامانداردى سپورتتىڭ ءار سالاسىنان كەزدەستىرۋگە بولادى.

پرەزيدەنتىمىز نۇرسۇلتان نازاربايەۆ دەنە شىنىقتىرۋ مەن سپورت سالاسىن ۇنەمى نازاردا ۇستاپ، قولداپ كومەكتەسىپ كەلەدى. ەلباسى ««قازاقستان-2050» ستراتەگياسى - قالىپتاسقان مەملەكەتتىڭ جاڭا ساياسي باعىتى» اتتى جاڭا جولداۋىندا: «دەنەشىنىقتىرۋ مەن سپورت مەملەكەتتىڭ ايرىقشا نازارىندا بولۋ ءتيىس. ناق سول سالاماتتى ءومىر سالتى ۇلت دەنساۋلىعىنىڭ كىلتى بولىپ سانالادى» دەگەن. ال ءبىزدىڭ جەلاياق جىگىتتەردىڭ ىشىندە ءامين اعانىڭ دەڭگەيىندە جۇگىرەتىن مىقتىلار بولماي تۇر. ءتىپتى قازىرگىدەي عىلىم مەن تەحنيكا وركەندەگەن زاماندا سپورتشىلارىمىز ءامين اعانىڭ وتكەن عاسىردىڭ 60-جىلدارى كورسەتكەن ناتيجەلەرىنە جەتە الماي ءجۇر. ءامين اعالار قازىرگىدەي جەتىلگەن سپورتتىق توسەنىش ۇستىندە جۇگىرگەن جوق، قازىرگىدەي كەرەمەت ساپالى، اسا ىڭعايلى شيپوۆكا كيگەن جوق. ول كەزدىڭ سپورتتىق مەديسيناسى دا بۇگىنگى دەڭگەيدە ەمەس ەدى. سوعان قاراماستان اسفالت ۇستىندە نەمەسە رەزەڭكە جولداردا قاراپايىم اياق كيىممەن جارىسىپ-اق قازىرگى عىلىم مەن تەحنيكا وركەندەگەن زاماننىڭ جۇيرىكتەرىنەن اسىپ ءتۇستى.ءامين اعا وسىدان 45 جىل بۇرىنعى ناتيجەسىمەن قازىرگى ازيا ويىندارىندا 100 مەتردە ءبىرىنشى،200 مەتر قاشىقتىقتا ەكىنشى ورىندى يەلەنەدى ەكەن. ال ءبىزدىڭ جۇيرىكتەر وسى ەكى قاشىقتىق بويىنشا ازيانىڭ مىقتىلارىن ۇتا الماي ءجۇر.

ەلىمىز ەگەمەندىك العاننان بەرى جەلمەن جارىسقان قازاق جەلاياعىن كورە الماي كەلەمىز. ءامين اعا ۇلتتىق قۇرامانىڭ تىزگىنىن ۇستاعاننان كەيىن ءوز ءىزباسارلارىن قۇم اراسىنان ىزدەپ، شالعاي اۋىلداردى دا ارالاپ كوردى. ەگەمەن ەل بولىپ، وڭ-سولىمىزدى اڭعارا الماي جاتقان تۇستا الىستاعى جاپونيادان كومەك سۇراپ، ساپالى سپورتتىق كيىمدەردى ءتۇپ – قيىرداعى اۋداندارعا جونەلتىپ تۇرعان ءامين اعا ءقازىر قۇرمەتتى دەمالىستا، جارى الما جەڭگەمىزبەن بالالارى مەن نەمەرەلەرىن قىزىقتاپ وتىرعان اقساقال.
ءامين ەلەمەس ۇلى تۇياقوۆ - «زامانىنان وزىپ تۋعان» دەگەن باعاعا لايىق جان. الەمنىڭ نەبىر مىقتىلارىن جولدا قالدىرعان ءامين اعانىڭ ەسىمى قازاق ۇلتىمەن بىرگە جاساي بەرەدى.

پايدالانىلعان ادەبيەتتەر:
1. ماڭعىستاۋ ەنسيكلوپەدياسى. الماتى: «اتامۇرا» باسپاسى، 1997 ج.
2. ينتەرنەت ماتەريالدارى.
3. ءاميننىڭ ساباقتارى. الماتى: «نۇرلى الەم» باسپاسى، 2011ج.

---