InfoHub Logo

اقش بۇگىندە سوعىس اشپاي-اق سوعىس جۇرگىزۋدىڭ شەبەرىنە اينالدى. ۋكراينا مەن ءيزرايلدىڭ سوڭعى شابۋىلدارى — رەسەي مەن يرانعا قارسى باعىتتالعان — بۇل شىندىقتى تاعى ءبىر مارتە دالەلدەدى. قارۋلى كۇش قولدانباي، ۆاشينگتون گەوساياسي قارسىلاستارىن «قولىمەن وت كوسەپ» السىرەتىپ وتىر. بۇل — ءححى عاسىردىڭ جاڭا سوعىس مودەلى.

اقش فۋتۋرولوگى ءارى گەوساياسي ساراپشى دجوردج فريدمان ەكى سوعىستىڭ ۇقساستىعىن اتاپ وتەدى:

ديپلوماتيا ءساتسىز بولعان سوڭ سوققى بەرىلدى. ۆاشينگتون رەسەيمەن دە، يرانمەن دە كەلىسسوز جۇرگىزۋگە تىرىستى. ءبىراق كەلىسىمگە كەلە الماعان سوڭ، «قولشوقپارلارىن» ىسكە قوستى.

شابۋىلدار تىڭشىلىق پەن جاسىرىن وپەراسيالارعا سۇيەندى.

اقش اشىق قاتىسپاسا دا، بارلىعىن باقىلاپ وتىر. ءيزرايلدىڭ يرانعا سوققىسى الدىندا اقش-تىڭ رۇقساتىن العانى رەسمي مويىندالدى. ۋكراينامەن دە تىعىز بارلاۋ الماسۋ ءجۇرىپ جاتقانى بەلگىلى.

ماقسات — ستراتەگيالىق وبەكتىلەردى جويۋ جانە جاۋدى ىشتەن ۇرەيلەندىرۋ.

جاۋاپ رەتىندە – تەك اۋە شابۋىلدارى. ناقتى ءارى سيمۆولدىق جاۋاپ. ءبىراق سوعىستىڭ باعىتىن تۇبەگەيلى وزگەرتپەيدى.

اقش-تىڭ جاڭا ستراتەگياسى — «كليەنت-مەملەكەتتەر» ارقىلى قيمىلداۋ. يزرايل مەن ۋكراينا — سوعىس جۇرگىزۋشىلەر. اقش — قارۋ مەن بارلاۋ بەرۋشى، ءارى ساياسي پارامەترلەردىڭ رەتتەۋشىسى. بۇل مودەل:

اقش-تى ادام جانە رەسۋرس شىعىنىنان قورعايدى؛

الەمدىك ارەنادان بەيتاراپ كەيىپتە كورىنۋگە مۇمكىندىك بەرەدى؛

ءبىراق ناقتى ناتيجەگە جەتۋگە سەپ بولادى — قارسىلاستار السىرەيدى، گەوساياسي تەپە-تەڭدىك بۇزىلادى.

يران: الدىن الا بەلگىلى سەناريي

فريدمان يرانعا سوققىنىڭ الدىن الا بولاتىنىن ايتقان. ونىڭ ويىنشا:

يران يادرولىق قارۋ ءوندىرىسىن جاسىرا المايدى.

يزرايل مەن اقش ول وبەكتىلەردى ىسكە قوسىلعانعا دەيىن-اق جويىپ تاستايدى.

ايماقتا يران اراب الەمىندە تانىمال ەمەس، سوندىقتان ىزىنشە اۋقىمدى سوعىسقا ۇلاسۋ ىقتيمالدىعى از.

رەسەيگە قارسى ۋكراينا شابۋىلى — ناقتى جوسپارلانعان، اۋقىمدى جاسىرىن وپەراسيا بولدى. سىبىرگە درونداردى جىبەرۋ — كۇردەلى لوگيستيكا مەن تەرەڭ دايىندىقتى تالاپ ەتتى. فريدمان ءپۋتيننىڭ ناقتى نە ىستەرىن بىلمەي، كىدىرىپ تۇرعانىن اتاپ وتەدى. ۋكراينا تاراپىنان تاعى قانداي توسىنسىي بولاتىنى بەلگىسىز. بۇل — ماسكەۋ ءۇشىن ەڭ ءقاۋىپتى بەلگى.

فريدمان ايتىپ وتكەندەي، ءداستۇرلى اۋقىمدى سوعىستاردىڭ ءداۋىرى اياقتالۋدا. ورىنباسارلار مەن بارلاۋ، ءدال سوققىلار مەن جاسىرىن وپەراسيالار — بۇگىنگى كۇننىڭ اسكەري دوكتريناسى.

اقش سوعىستى ءوز قولىمەن ەمەس، ءوز مۇددەسىن بولىسەتىن ەلدەردىڭ قولىمەن جۇرگىزىپ وتىر. بۇل – ءقاۋىپسىز، ءتيىمدى ءارى ساياسي جاۋاپكەرشىلىكتەن ارىلتاتىن قۇرال. ءبىراق مۇنداي سوعىستاردىڭ قۇربانى ءبارىبىر ادام.