اقتابان
كىشكەنتاي عانا قاپ-قارا كۇشىك بولاتىن. ءىنىم ەكەۋىمىز كورشىمىزدىڭ كوراسىنا ءتۇسىپ، ۇرلاپ اكەلگەنبىز. ءار اياعىنا بىرەۋ ايالاپ اپپاق ەتىك كيگىزگەندەي ەكەن. اتىن اقتابان قويدىق. ول ءبىزدىڭ ۇيدە قالدى. ەركە. اياعىڭا وراتىلىپ، سوڭىڭنان قالمايدى. كىشكەنتاي يت جۇرەگىنە قۋانىش تولىپ، قاشان كورسەڭ دە ارسالاڭداپ جۇرگەنى. سودان كەيىن مەن مەكتەپ ءبىتىرىپ، اۋىلدان كەتتىم. ول تۋرالى مۇلدە ۇمىتقانمىن. جازعى دەمالىسقا كەلگەنىمدە مامام “اقتابان قاۋىپ الماسىن. تومەن ەتەكتىنى كورسە جىنى بار. اۋلاق ءجۇر” دەگەن. اۋلادا بايلانىپ جاتىر ەكەن. ءداۋ قاپ-قارا توبەت بولىپتى. سۇستى-اق. اقىرىن جاقىنداپ “اقتابان” دەدىم. قۇيرىعى قوزعالىپ بارىپ باسىلدى. مەن ەركىنسىپ جاقىنداي ءتۇستىم. ارت جاعىمنان جەتكەن شەشەم “ويباي، جولاما. ءبىر جەرىڭدى جۇلىپ الادى. جىندى عوي بۇل” دەپ شىر-پىرى شىقتى. اۋىل اراسىندا ايەلدەردى قاۋىپ ابدەن زارەزاپ قىلعانى كورىنىپ تۇر. اقتابان تاراپىنان ەشبىر جاقتىرماۋشىلىق بايقاماعاننان كەيىن مامامدى زار قاقتىرىپ قويىپ، قاسىنا جاقىنداپ باسىنان سيپادىم. ول قاپقان جوق! ءتىپتى شالقاسىنان ءتۇسىپ، كوزىن جۇمىپ سيپاي ءتۇس دەگەندەي بولادى. اپام دا اڭ-تاڭ، مەن دە اڭ-تاڭ. كوزى ەندى اشىلعان كۇشىك كەزىندە ەسىندە قالدىم با ەكەن الدە؟ “ءبىزدىڭ ءۇيدىڭ ادامى ەكەنىڭدى يىسىڭنەن تانىعان عوي” دەيدى ءىنىم ماساتتانىپ. “جاقسى يت — قۇت”. ول ءبىزدىڭ ءۇيدىڭ ءبىر مۇشەسىنە اينالدى. تەك مىسىق تۇراقتاتپايدى. باس سالىپ، مىلجالاپ ءولتىرىپ تاستايدى. نە جىنى بار ەكەنىن كىم ءبىلسىن. ءبىز مىسىقتى جاقسى كورەمىز. ون ەكى جىل ىشىندە تالايى ءوتتى عوي. كەيبىر اقىلدىسى، امالىن تاۋىپ، امان قالادى. تۇيسىگى بوس، اقىماقتاۋلارىنىڭ اجالى — اقتابان. بىردە اۋىلعا بارعانىمدا، ۇيدەگى اق مىسىقتىڭ اقتاباندى ابدەن مازاق قىلعانىنا كۋا بولدىم. قاقپانىڭ كىشكەنتاي تەسىگىنەن كوشەگە ءوتىپ كەتىپ، كەرىلىپ تۇر. ماڭعاز. ۇيقىلى-وياۋ كەيىپتە. بەر جاعىندا ىزادان جارىلىپ كەتەردەي بولىپ اقتابان ءجۇر الاسۇرىپ. تەسىكتەن وتە الماي قور بولىپ ءجۇر. جونىمەن كەتەر مىسىق جوق. ۇزاق تۇردى. مۇمكىن بارلىق اعايىندارىنىڭ كەگىن وسىلاي العان شىعار... مامام “وسى يت ەمەس، ادام” دەپ ءجيى ايتاتىن. اقتابان ءبارىن تۇسىنەتىن. ۇيدە قايعى بولسا، ونىڭ دا ۇنجىرعاسى ءتۇسىپ، تاماققا تابەتى شاپپاي قالادى. قالادان كەلەردە ءارقايسىمىزدىڭ اقتابانعا ارنايى بازارلىعىمىز بار. كوزدەرى. كوزدەرى باز ءبىر ادامنىڭ كوزىنەن ماعىنالىراق، تەرەڭىرەك ەدى. سويلەپ تۇراتىن. سول اقتابان ءولىپ قالدى. ون ەكى جىل ءجۇرىپ، ءۇيدى قورىپ، بارلىعىمىزدى جاقسى كورىپ. بايقۇس اقتابان...
You Might Also Like
-
سىرتتا جاڭبىر جاۋىپ تۇر. تەرەزەگە جاقىنداپ دالاعا قارادىم. كۇڭگىرت الەم. تومەن قاراي ءتونىپ قاتۋلانعان اسپان. جاڭبىر. ءاربىر تامشىسىنىڭ ءوز ءۇنى، ءوز تىلەگى بار ءتىرى جاڭبىر. ۇستى-ۇستىنە توگىلگەن سايىن ك...
-
ۇلكەن قالاداعى ساۋلەتتى سارايلاردىڭ تاساسىنداعى ەسكى ۇيدە قالتىلداپ ارەڭ قوزعالاتىن، اپپاق جۇقا شاشى جەلكەسىن جاپقان قاريا تۇرادى. ونىڭ جالعىز سارى الا مىسىعى بولاتىن. جۇمساق ءجۇنىنىڭ مىج-مىجى شىعىپ...
