اقتوبەدەگى مەكتەپتەردىڭ 80%-ى ينتەرنەتپەن قامتاماسىز ەتىلگەن
اتالمىش وبلىستا سيفرلاندىرۋ اياسىندا مەكتەپتەرىنىڭ 80%-ى ينتەرنەتكە ەركىن شىعۋ مۇمكىندىگىنە يە بولدى. بۇل جايىندا بۇگىن ۇكىمەتتىڭ كەزەكتى وتىرىسىندا اقتوبە وبلىسىنىڭ اكىمى بەردىبەك ساپاربايەۆ ايتتى.
بۇگىندە وبلىستا 421 جالپى ءبىلىم بەرەتىن مەكتەپ بار. وندا 136 مىڭ بالا وقيدى. وتكەن جىلى وبلىستا 1،2،5،7-سىنىپتار جاڭارتىلعان ءبىلىم مازمۇنىنا كوشتى. بۇگىندە جاڭارتىلعان باعدارلاما بويىنشا 57 821 وقۋشى ءبىلىم الادى. ءبىلىم بەرۋ ۇيىمدارىندا جاڭا باعدارلاما ساتىلاپ ەنگىزىلەتىن بولادى.
«مەكتەپتەردى كومپيۋتەرلەرمەن قامتاماسىز ەتۋ ءۇشىن قوسىمشا بيۋدجەتتەن 650 ملن. تەڭگە كولەمىندە قاراجات ءبولىندى، جىل سوڭىنا دەيىن بارلىق دەرلىك مەكتەپتەر جاڭا كومپيۋتەرلەرمەن تولىقتىرىلاتىن بولادى»، — دەدى وبلىس باسشىسى ب.ساپاربايەۆ.
مەكتەپتەردىڭ وقۋ باعدارلاماسى جاڭارتىلعان مازمۇنعا كوشكەننەن كەيىن وقۋشى ءبىلىمىنىڭ باعالانۋى دا وزگەرەدى.
«وبلىستىڭ 89% مەكتەپتەرى ەلەكتروندى كۇندەلىك باعدارلاماسىنا ەنگىزىلگەن». باعدارلاما مۇعالىمدەردى قاعازباستىلىقتان 50%-عا دەيىن قىسقارتادى، اتا-انالاردىڭ بالالارىنىڭ ساباك ۇلگەرىمىن باقىلاپ وتىرۋىنا، ءبىلىم ساپاسىن جاقسارتۋعا، قالا مەن اۋىلدىڭ اراسىنداعى اراقاشىقتىعىن، مەملەكەتتىك شىعىندى ازايتۋعا مۇمكىندىك بەرەدى»، — دەدى وبلىس اكىمى.
ءبىلىم بەرۋدى تولىق سيفرلاندىرۋ ءۇشىن ەلەكتروندى كۇندەلىكتەردى تولىققاندى پايدالانۋ ماڭىزدى. سونداي-اق ءاربىر وقۋشىنىڭ ءوزىنىڭ جەكە كابينەتى بولادى. وندا بالاباقشادان باستاپ PhD-گە دەيىن بۇكىل اقپارات، اتاپ ايتساق، بارلىق باعالار، وليمپيادالار، پورتفوليو، ديپلوم جۇمىستارى بار مالىمەت ساقتالادى.
سونداي-اق، وبلىستىڭ ءبىلىم سالاسىنداعى ماسەلەلەردىڭ ءبىرى — وقۋلىق ماسەلەسى. قازاقستان رەسپۋبليكاسىندا ءبىلىم بەرۋدى جانە عىلىمدى دامىتۋدىڭ 2016-2019 جىلدارعا ارنالعان مەملەكەتتىك باعدارلاماسىنىڭ ماقساتتى ينديكاتورىنا سايكەس نازاربايەۆ زياتكەرلىك مەكتەپتەرى تاجىريبەسى بويىنشا 2018 جىلى جاڭارتىلعان ءبىلىم بەرۋگە سايكەس 3،6،8-سىنىپتاردىڭ وقۋلىقتارى مەن وقۋ-ادىستەمەلىك قۇرالدارى جاڭارتىلاتىن بولادى. وسىعان وراي، 3،6،8-سىنىپ وقۋشىلارىن جاڭارتىلعان وقۋلىقتار جانە وقۋ-ادىستەمەلىك قۇرالدارىمەن قامتاماسىز ەتۋ ءۇشىن وبلىس بويىنشا بارلىعى 1674،0 ملن تەڭگە قارجى بولىنگەن.
قازىرگى تاڭدا بولىنگەن قارجى شەگىندە اۋداندىق جانە قالالىق ءبىلىم بولىمدەرىمەن باسپالارعا تاپسىرىس بەرۋ جانە شارت جاساسۋ جۇمىستارى ۇيىمداستىرىلۋدا.
ايتا كەتەلىك، «سيفرلىق قازاقستان» مەملەكەتتىك باعدارلاماسى اياسىندا «اقىلدى قالالاردىڭ» تيپتىك تۇجىرىمداماسى ۆيسە-پرەمەر مينيستر اسقار جۇماعالييەۆتىڭ باستاماسىمەن اقپارات جانە كوممۋنيكاسيالار مينيسترلىگى جانە «زەردە» ۇلتتىق ينفوكوممۋنيكاسيا حولدينگىمەن جۇزەگە اسىرىلۋدا.
You Might Also Like
-
پايعامبار زامانىندا ءاعا-ىنى — ءبىر تۋىسقان ەكى جىگىت بولدى. بىرەۋىنىڭ اتى — ھامزا، بىرەۋىنىڭ اتى — لۋمزا. وزدەرى جالاڭاش، كەدەي: ىشەر اس، كيەر كيىم از. ءبىراق مىنەزدەرى وڭدى، قىزدان...
-
مەملەكەت باسشىسى پاۆلودار وبلىسىنا جۇمىس ساپارى بارىسىندا سيفرلاندىرىلعان پاۆلودار مۇناي حيمياسى زاۋىتىنىڭ جۇمىسىمەن تانىسىپ، «سيفرلىق قازاقستان» باعدارلاماسى اياسىندا جاسالىپ جاتقان مەك...
