InfoHub Logo

شاعىن اس ءۇيدى بەزەندىرۋگە شىعارماشىلىق تۇرعىدا قاراپ، ءار نارسەسىن جاقسىلاپ ويلاستىرسا، ونى ناعىز ونەر تۋىندىسىنا اينالدىرۋعا بولادى. ءبىز كەز كەلگەن اس ءۇيدى ءسانى مەن جايلىلىعىن بۇزباستان قالاي قايتا جاساپ شىعۋعا بولاتىنى تۋرالى كەڭەستەرمەن بولىسەمىز.  

1. جارىق كوبىرەك بولۋ كەرەك

قاراڭعى بۇرىشتار كورەر كوزگە كەڭىستىكتى تارىلتىپ تاستاعانداي كورىنەدى. سوندىقتان اس ءۇي كەڭ ءارى جارىق كورىنۋ ءۇشىن تابيعي جارىقتانۋ ماسەلەسىن شەشىپ العان ماڭىزدى. اشىق ءتۇستى بەزەندىرۋلەرگە تاڭداۋ جاساۋعا كەڭەس بەرەمىز. سوندا كەڭىستىك كەڭ سياقتى كورىنىپ، ءسىز قيالىڭىزعا ەرىك بەرىپ، ءتۇس اكسەنتتەرىن تالعامىڭىزعا قاراي ورنالاستىرا الاسىز. مىسالى، گارنيتۋرانى قابىرعانىڭ تۇسىنە سايكەس، تابيعي ماتەريالداردىڭ اسا قانىق ەمەس رەڭدەرىنەن تاڭداۋعا بولادى.

2. جىلتىر جانە اينالى بەتتەر

كەڭىستىك ماسەلەسىن شەشۋدەگى كەلەسى كومەكشىڭىز – جارىقتى شاعىلىستىراتىن بەتتەر. جىلتىر قاسبەتتەردى (فاساد) پايدالانۋ ارقىلى ءسىز تار اس ءۇيدىڭ ءوزىن ۆيزۋالدى تۇردە كەڭ ەتىپ كورسەتە الاسىز.

اس ۇيدە اينالى بەتتەر ءتىپتى ەرەكشە كورىنەدى. بۇل ۇلكەن اينا، اينالى فارتۋك نەمەسە اينالى ءبىر قابىرعا بولۋى مۇمكىن. بولمەنىڭ ءپىشىنى مەن ولشەمىن وزگەرتىپ كورسەتۋگە كومەكتەسەتىن كەز كەلگەن شاعىلىستىراتىن بولىكتەر ورىندى جانە سونى شەشىم بولماق.

3. تۇستەر گامماسىن ويلاستىرۋ

اس ءۇي بولمەسىن سۇيىكتى رەڭدەرىڭىزبەن قورىقپاستان بەزەندىرە بەرۋگە بولادى. ءبىراق ەسىڭىزدە بولسان، ءۇش-تورت تۇستەن ارتىق رەڭدەردى پايدالانباڭىز. ايتپەسە ديزايننىڭ نەگىزگى يدەياسى «جوعالىپ كەتۋى» مۇمكىن.

ۇستەلدىڭ ۇستىڭگى تاقتايى جانە قابىرعا پانەلى كەرەعار تۇستەرمەن ەرەكشە كورىنەدى. وسىلايشا ءسىز كەڭىستىكتى ۆيزۋالدى تۇردە ايماقتارعا ءبولىپ، قاجەتتى اكسەنت بەرە الاسىز. اس ۇيىڭىزدەگى قانداي ەلەمەنت نەگىزگى ءرولدى اتقاراتىنىن انىقتاپ الىڭىز. بۇل پەردەلەر، ورىندىقتارعا ارنالعان قاپتامالار، داستارحان جاپقىش نەمەسە ۇستەل بولۋى مۇمكىن. ەگەر اس ءۇيدىڭ قابىرعالارىن اشىق تۇسپەن بوياعىڭىز كەلسە، گارنيتۋرالارعا جۇمساق رەڭ بەرۋگە تىرىسىڭىز.

ەسىڭىزدە بولسىن، قابىرعاداعى مايدا سۋرەتتەر بولمەنى كەڭ كورسەتەدى. ال ءىرى سۋرەتتەر كەرىسىنشە، ونىڭ ولشەمىن كىشىرەيتەدى. ەگەر ءسىز توبەنىڭ بيىك كورسەتكىڭىز كەلسە، تىك گەومەتريالىق سۋرەتتەردى تاڭداڭىز.

4. جارىقتاندىرۋدى كەمشىلىكسىز جاساڭىز

اس ۇيدە جاساندى جارىقتاندىرۋدان ماڭىزدى ەشنارسە جوق. اس ءۇيدى جارىقتاندىرۋداعى ەڭ باستى قاعيدا — كوپ دەڭگەيلىلىك. دەمەك، ءاربىر فۋنكسيونالدى ايماق ءوزىنىڭ جارىق كوزىمەن جابدىقتالۋى قاجەت. ايتپەسە اس ءۇي قاراڭعى ءارى جايسىز بولىپ قالادى.

اس ءۇيدى جالپى جارىقتاندىرۋدىڭ ەڭ ءساتتى شەشىمى — توبەنىڭ قاق ورتاسىنداعى ءبىر ليۋسترانىڭ ورنىنان توبەگە ورناتىلعان شامدالداردى پايدالانۋ. ەگەر ءسىز جارىقتىڭ جارىعىن رەتتەيتىن قوسقىش ورنالاستىرساڭىز، ودان ەش ۇتىلمايسىز.

جۇمىس ايماعىن وتە ساۋاتتى تۇردە جارىقتاندىرۋ قاجەت. بۇل جارىق ديودتى كومەسكى جارىق ورناتىلعان اينەك فارتۋك، پلاستيك پىشىندەگى جارىقديودتى تاسپا نەمەسە ءىلىنىپ تۇرعان اس ءۇي شكافتارىنىڭ تومەنگى جاعىنا ورناتىلعان قاراپايىم جيھاز شامدالدارى بولۋى مۇمكىن.

5. تەرەزە الدىنداعى ايماققا نازار اۋدارىڭىز

كوپتەگەن اس ۇيلەردە تەرەزە ورناتىلعان قابىرعا پايدالانىلمايدى. ماسەلە مىندەتتى تۇردە تەرەزەنىڭ استىنا ورناتىلاتىن باتارەيادا.

باتارەيانى «جاۋىپ تاستايتىن» ەڭ قاراپايىم ءارى ءتيىمدى ءادىس — بوس كەڭىستىكتى تولىقتاي پايدالانۋ. تورلامانى مەتاللپروفيلدەن جاساپ، ءبارىن گيپسوكارتونمەن تارتىپ تاستاۋ كەرەك.

وسىلايشا قابىرعا جيناقى كورىنەدى. ال ءسىز تەرەزەنىڭ الدىڭعى جاعىنا جيھاز نەمەسە ءتىپتى اس ىشەتىن ۇستەلدى قويۋىڭىزعا بولادى. ەگەر تەرەزەڭىزدەن ادەمى كورىنىستەر كورىنەتىن بولسا، كۇن ساۋلەسىنە بولەنىپ، اسەم تابيعاتقا تامسانىپ تاڭعى اس ءىشۋدىڭ ءوزى ءبىر عانيبەت.

6. ساقتاۋ جۇيەسىن ويلاستىرىڭىز

اس ءۇي كەڭىستىگىن ساۋاتتى ۇيىمداستىرۋ — رەتسىزدىكتەن قاشىپ، بولمەنى كەڭ جانە ەڭ باستىسى جايلى ەتۋدىڭ جالعىز امالى. ساقتاۋ جۇيەسىن ويلاستىرۋ ارقىلى كۇندەلىكتى پايدالاناتىن ىدىستار مەن قۇرالداردى قالاي الاتىنىڭىزدى قايتا قاراستىرىڭىز. بۇرىشتاعى شكافتار، اشىق اسپالى سورەلەر، كونتەينەرلەر مەن ورگانايزەرلەردىڭ بارلىعى سىزگە وسى ماسەلەنى شەشۋگە كومەكتەسەدى.

قابىرعالاردى دا پايدالانىڭىز: ىلگەكتەر مەن رەيلينگتەر (شارباقتار) از ورىن الادى. ءبىراق ولار اس ءۇيدىڭ كوپ زاتتارىن ساقتاۋعا جاقسى كومەكشى بولادى.

7. ىقشام ورناتىلعان تەحنيكانى تاڭداڭىز

التىن ۋاقىتىڭىزدى ۇنەمدەۋگە ورناتىلعان تەحنيكالار كومەكتەسەدى. سول كەزدە ءسىزدىڭ بوس ۇستەل بەتى سياقتى قوسىمشا جۇمىس كەڭىستىگىڭىز بولادى. ءسىز ورناتىلعان تاماق پىسىرەتىن بەتتەردى (نەمەسە اس پىسىرەتىن پەشتى) جانە ىدىس جۋاتىن ماشينانى تاڭداۋ ارقىلى اس ءۇيىڭىزدى ىقشامدى ەتە الاسىز. گارنيتۋراعا ورناتىلعان توڭازىتقىش ەرەكشە ءساندى كورىنەدى.

8. جيھازدى تاپسىرىسپەن جاساتىڭىز

ەگەر اس ۇيىڭىزگە ادەتتەگى جيھازداردى ورنالاستىرۋ مۇمكىن بولماسا، ەرەكشە شەشىم قابىلداۋدان قورىقپاڭىز. ونداي شەشىمدەردىڭ ءبىرى — جيھازدى تاپسىرىس بەرىپ جاساتۋ.

شكافتاردىڭ ەنى مەن بيىكىگىن ءوزىڭىز رەتتەي وتىرىپ، جيھازدى جايلى ورنالاستىرىپ، كەڭىستىكتى ءتيىمدى پايدالانا الاسىز. ال ەڭ كەرەمەتى — ءسىزدىڭ اس ءۇيىڭىز ەشكىمدىكىنە ۇقسامايتىنداي ەرەكشە بولادى.

9. مۋلتيفۋنكسيونالدى گادجەتتەردى ىزدەڭىز

قازىرگى اس ۇيلەردە ءسان مەن جايلىلىق ۇيلەسىم تابۋى كەرەك. بۇعان مۋلتيفۋنكسيونالدى گادجەتتەر كومەكتەسەدى. ولار اقشاڭىزدى عانا ەمەس، پايدالانىلاتىن كەڭىستىكتى ۇنەمدەپ، اس ءپىسىرۋدى قىزىقتى ءارى كوڭىلدى ەتەدى. مىسالى، نەگىزگى تۇرمىستىق تەحنيكالاردان وزگە قازىرگى اس ءۇي بيكەلەرى بلەندەرسىز، مۋلتيۆاركاسىز، ەلەكترلى ەتتارتقىشسىز جانە كوفەۋاتقىشسىز اس دايىنداي المايدى.

اس ۇيگە كوپفۋنكسيونالدى ۇساق-تۇيەكتەردى الۋ كەزىندە ءسىز ءتىپتى ديزاينىڭىزدى بايىتىپ، ينتەرەرگە جاڭا اكسەنتتەر قوساسىز. كەسكىش تاقتايلار، ىستىق تاماقتىڭ استىنا قوياتىن توزتاباندار، سۋ قۇياتىن ادەمى قۇمىرالار، ينتەراكتيۆتى اس ءۇي ديەۆايستارى — اس ءۇيىڭىزدى كەرەمەت ءارى جايلى ەتۋ ءۇشىن بارلىق مۇمكىندىكتى پايدالانىڭىز.

10. ىدىس-اياق تاڭداۋعا ەرەكشە نازار اۋدارىڭىز

اس ءۇي ينتەرەرىنىڭ اسەرىن كوبىنەسە ىدىس-اياقتار انىقتايدى. ءارتۇرلى پىشىندەر مەن تۇستەر ارمانىڭىزداعى اس ءۇيدى جاساۋدى اياقتاۋعا كومەكتەسەدى. ىدىستاردىڭ بىرنەشە ءتۇرى بولعانى دۇرىس. سوندا ءسىز ءساندى ساقتاپ قالاسىز، ءارى ءبىرسارىندىلىقتان جالىعىپ كەتپەيسىز. الاباجاق ەمەس اشىق ءتۇستى اس ۇيدە اشىق، ءبىرتۇستى سەرۆيزدەر ەرەكشە ءارى تارتىمدى كورىنەدى.

ىدىس-اياق تاڭداعان كەزدە جىلى رەڭدەردىڭ تابەتتى اشاتىنىن، ال احروماتيكالىق رەڭدەردىڭ ءساندى كورىنسە دە (مىسالى، قارا تارەلكەلەر) كەرىسىنشە، تابەتتى باساتىنىن ەستەن شىعارماڭىز. ويۋ-ورنەگى بار ىدىستار جاقسى اكسەنت بەرىپ، بولمەگە قوسىمشا جايلىلىق ورناتادى. ال كوگىلدىر جانە جاسىل رەڭدەر ادامدى تىنىشتاندىرىپ، اس ۇيدە ۇزاق وتىرۋعا ماجبۇرلەيدى.

---