InfoHub Logo

ءۇي جاعدايىندا قولدانۋعا ارنالعان شاشتاراز زاتتارىن شىعارىپ، كوسمەتيكا نارىعىندا ريەۆوليۋسيا جاساعان كومپانيانىڭ تابىستى جولى جايلى ايتپاقپىز.

گانس شۆارسكوپتىڭ العاشقى قادامدارى

شاشقا ارنالعان قۇرالداردى شىعاراتىن ايگىلى وندىرۋشىلەردىڭ ءبىرى گانس شۆارسكوپف اتا-باباسىنان كەلە جاتقان حيميك جانە فارماسيەۆت بولعان. اۋەلدە ول ءبارى بىلەتىن قۇرالداردى ساتۋمەن اينالىستى. 1898-جىلى شۆارسكوپف بەرليندە «بوياۋلار، دارىلەر، اتىرلەر» دەگەن شاعىن دۇڭگىرشەك اشتى.

تاريحقا ۇڭىلسەك، ونىڭ انگليادان كەلگەن كليەنتتەرىنىڭ ءبىرى لوندونعا بارعاندا قولدانۋعا بولاتىن شاعىن پاكەتكە سالىنعان سۋسابىن ساتۋىن وتىنگەن. شۆارسكوپفتىڭ دۇڭگىرشەگىندە ونداي ەشنارسە تابىلا قويمادى. الايدا، دۇڭگىرشەك يەسىنە سونداي بىرنارسە جاساۋ تۋرالى وي كەلدى.

جاڭا ءونىم جاساۋ ءۇشىن فارماسيەۆتكە 5 جىل ۋاقىت كەرەك بولدى. اقىرى شەگىرگۇل يىسىمەن كۇلگىن ءتۇستى «Schaumpon» سۋدا ەريتىن العاشقى ۇنتاق سۋسابىن ساتىلىمعا شىقتى.

جاڭا تاۋار اۋقاتتى نەمىس ايەلدەرى پايدالاناتىن قىمبات مايلار مەن شاشقا ارنالعان قاتتى سابىندارعى مىقتى باسەكەلەس بولىپ، تەز ارادا ايگىلى بولدى. ول شاشتارىن تابيعي ونىمدەر — جۇمىرتقا، ءسۇت جانە سىرامەن جۋاتىندار ءۇشىن دە كومەككە كەلدى.

العاشىندا جاڭا سۋسابىن شۆارسكوپفتىڭ دۇڭگىرشەگىندە عانا ساتىلىپ، ءبىر قاپتاماسى 20 پفەننينگ (سەنت) تۇردى. ءبىراق ءبىر جىلدان كەيىن ۇنتاقتى سۋسابىن بەرليننىڭ بارلىق ءدارىحانالارىندا ساتىلىپ، كوپ ۇزاماي حالىقارالىق نارىققا دا شىقتى. العاشقى جەتكىزىلىم گوللانديا مەن رەسەيدە بولدى.

1903-جىلى جاڭا برەندتىڭ اتاۋ مەن لوگوتيپى پايدا بولدى. گانس شۆارسكوپف نەمىس تىلىنەن اۋدارعاندا «قارا باس» دەگەن ماعىنانى بىلدىرەتىن ءوز تەگىن ساۋدا بەلگىسى رەتىندە قولدانباق بولىپ شەشىتى. ۇنتاقتى سۋسابىن سۇلۋلىق نارىعىندا ۇسىنىلعان العاشقى فيرمالىق ءونىم بولدى. ال «Schwarzkopf» — گەرمانياداعى العاشقى كوسمەتيكالىق برەند ەدى.

نەمىستەردەن بۇرىن ۇنتاقتى سۋسابىندى ويلاپ تاپقان ەسىمى بەلگىسىز اعىلشىندىقتان ايىرماشىلىعى، شۆارسكوپف اۋەل باستان-اق ماركەتينگكە بەيىمدىلىك تانىتىپ، ءوز ءونىمىن پاتەنتتەپ الدى. وسىلايشا ونىڭ تاۋارى رەسمي تۇردە الەمدەگى العاشقى ۇنتاقتى سۋسابىن بولدى. سونىمەن قاتار دارىندى ونەرتاپقىش ءوز كومپانياسىنىڭ «سىزدەردىڭ شاشتارىڭىز ءۇشىن ەڭ جاقسىسى!» دەگەن ۇرانىن دا ويلاپ تاپتى. ءبىر قىزىعى، قانشا جىل وتسە دە، وسى سويلەم برەندتىڭ ەڭ باستى ۇرانى بولىپ قالا بەردى.

حيميك الدىنا شاشتى جۋىپ قانا قويماي، ەمدەي دە الاتىن سۋسابىن جاساۋ تۋرالى ماقسات قويىپ، ونىمدەرىن جەتىلدىرە بەردى. ول شاشتى جۋعاننان كەيىن جۇمسارتىپ، تەگىس ەتۋ ءۇشىن سۋسابىن قۇرامىنا بادام مايى مەن پانتەنول قوستى. ۇلكەن تابىسقا جەتكەن شۆارسكوپف ءدارىحاناداعى زاتتار مەن ىلەسپەلى تاۋارلاردىڭ بارىنەن باس تارتىپ، شاش كۇتىمىنە ارنالعان قۇرالداردى جاساۋعا تولىقتاي بەت بۇردى.

ءبىر جىلدان كەيىن فارماسيەۆت سۋسابىن شىعاراتىن زاۋىت اشتى. سۇرانىس بۇرىنعىداي ۇسىنىستان ارتىپ كەتتى. سوندىقتان ءتورت جىلدان كەيىن تاعى ءبىر زاۋىت اشىلدى. مۇنداي دۇركىرەگەن تابىستىڭ ەڭ باستى سەبەبى جاي عانا -  برەندتىڭ باسەكەلەسىنىڭ بولماۋىندا ەدى. Schwarzkopf كومپانياسى نارىقتا مونوپوليست بولدى.

اتاعىمەن قاتار كومپانيانىڭ اسسورتيمەنتى دە ارتا بەردى. حيميك ونىمگە ەمدىك شوپتەر مەن ءارتۇرلى يىستەردى كوپتەپ قوسا باستادى. وسىلايشا، تۇيمەداق، ءشوپ، اققايىڭ جانە بارلىعى 8 اتاۋلى باسقا سۋسابىندار پايدا بولدى.

دارىندى ونەرتاپقىش مۇنىمەن توقتاماس ەدى. الايدا، ءبىرىنشى دۇنيەجۇزىلىك سوعىس باستالىپ كەتتى دە، ءوندىرىس توقتاپ قالدى. نەمىستەردىڭ دە، باسقا ەۋروپالىقتاردىڭ دا بۇرىنعىداي شاشتارىنا مۇقيات قارايتىن اقشالارى دا، مۇمكىندىكتەرى دە بولمادى. ادامدار ءبارىن ۇنەمدەي باستادى. ەڭ الدىمەن كوسمەتيكاعا ۇنەمدەپ، سۋسابىن بۇرىنعىداي سۇرانىسقا يە بولماي قالدى.

ءبىراق سوعىس اياقتالا سالىسىمەن، فابريكالار قايتادان جۇمىس ىستەي باستادى. سول كەزدەرى گانس شۆارسكوپفتىڭ سۋسابىنىن پايدالانبايتىن نەمىستى تابۋ مۇمكىن ەمەس ەدى. بىرنەشە جىلدا كومپانيا ءوندىرىس كولەمىن ەكى ەسە ارتتىرىپ، ءبارىن قالپىنا كەلتىرىپ الدى. الايدا برەندكە باسقا ءبىر قيىندىق تۋىندادى – 1921-جىلى نەمىس حيميگى اياق استىنان جۇرەك ۇستاماسىنان كوز جۇمدى.

Shwarzkopf-تىڭ جاڭا ونىمدەرى

كومپانيا قوجايىنى قايتىس بولعاننان كەيىن ونى شۆارسكوپفتىڭ جەسىرى مەن ۇلكەن ۇلى كىشى گانس باسقاردى. ولار كۇيەۋى مەن اكەسىنىڭ ءىسىن ساقتاپ قانا قويماي، كاسىپتەرىن ودان ءارى دامىتتى. ونىمدەردى العا جىلجىتۋ ءۇشىن از اقشا بولىنبەدى —1925-جىلى Schwarzkopf كومپانياسى جارنامانىڭ وزىنە 3 ملن ماركاعا (€1،4 ملن) جۋىق قاراجات ءبولدى. 1927-جىلى برەندتىڭ ريەۆوليۋسيالىق جاڭا ءونىمى – الەمدەگى ەڭ العاشقى سۇيىق سۋسابىن شىقتى.

ۇنتاقتىڭ ايگىلى بولعانىنان قاراماستان، تۇتىنۋشىلار ونى پايدالانۋدىڭ ىڭعايسىز جاقتارىن ايتىپ، ءجيى شاعىمدانا باستادى. الدىڭعى تۇرىنە قاراعاندا سۇيىق سۋسابىن اللەرگيالىق رەاكسيالار تۋدىرمادى جانە كوپىرشىدى. ءبىراق ەڭ باستىسى، جاڭا قۇتىنىڭ مولشەرلەۋىشى بار ەدى. بۇل سۋسابىندى پايدالانۋدى ۇنەمدى ەتتى. مۇنى ەسەپشىل نەمىستەر بىردەن بايقادى. ءبىر جىل ىشىندە Schwarzkopf تۇىنۋشىلارىنا جاڭا سۋسابىننىڭ بىردەن بىرنەشە نۇسقاسىن ۇسىندى.

كوسمەتيكا نارىعىندا وزىنە جاڭاشىل رەتىندە كورسەتە بىلگەن برەند بەرليندە «شاش كۇتىمىنە ارنالعان ينستيتۋت» دەگەن شاشتارازشىلارعا ارنالعان العاشقى وقۋ ورتالىعىن اشىپ، جاڭا وندىرىستىك كۇشتەر قۇردى. كومپانيا بولىمشەلەرى بۇكىل الەمدە اشىلا باستادى.

سۇيىق سۋسابىننىڭ نارىققا شىققانىنا كوپ بولا قويماستان كومپانيا كەلەسى جاڭا ءونىمى — العاش رەت شاشقا ارنالعان كونديسيونەردى شىعارىپ، پاتەنتتەپ الدى. 1930-جىلدىڭ باسىندا برەند ءوز تاۋارلارىن دۇكەندەردە عانا ساتىپ قويماي، شاشتارازدارمەن جانە سۇلۋلىق سالوندارىمان تىعىز قارىم-قاتىناس ورناتا باستادى. بۇگىنگى كۇنگە دەيىن كومپانيا ونىمدەرى كاسىبي ماماندار اراسىندا ەڭ كوپ سۇرانىسقا يە.

وسىنداي زور تابىستارىنا قاراماستان برەند العان اسۋىندا توقتاپ قالمادى — Schwarzkopf ىشىندە بۇرىنعىداي زەرتتەۋ جۇمىستارى جالعاسىن تاۋىپ جاتتى. 1933-جىلى كومپانيا شاشقا ارنالعان جاڭا Onalkal قۇرالىن — نارىقتاعى العاشقى ءسىلتىسىز سۋسابىندى ۇسىندى.
اۋەلدە ول سۋعا وننىڭ بىرگە قاتىناسىنداي مولشەردە ارالاستىراتىن قۇرعاق جانە كونسەنتراتتى ەكى نۇسقادا شىعارىلدى. بۇل جاڭالىق قازىرگى سۋسابىنداردىڭ نەگىزى.

برەند شاش كۇتىمىنە ارنالعان ەڭ ءىرى ءوندىرۋشى بولا وتىرىپ الەمدىك نارىقتى بەلسەندى تۇردە جاۋلاي باستادى. ءدال وسى ۋاقىتتاردا كومپانيا ارنايى سۇلۋلىق سالوندارىنا ارنالعان بولەك تاۋارلار شىعارا باستادى.

ءتىپتى ەكىنشى دۇنيەجۇزىلىك سوعىستىڭ ءوزى Schwarzkopf-تى توقتاتا المادى. سوعىس اياقتالعاننان كەيىن كومپانيا ەكسپروپرياسيا (بۇرىنعى الەۋەتىنەن ايىرىلۋ) جانە ونىمدەردى پايدالانۋعا سالىنعان تيىمنان كەيىن الەمنىڭ 27 ەلىندەگى 200-دەن اسا ساۋدا بەلگىسىن جوعالتتى. الايدا وسى جىلدارى برەند قىزمەتكەرلەرى جاڭا ونىمدەردى، كوبىنەسە شاشتى حيميالىق بۇيرالاۋعا ارنالعان قۇرالداردى شىعارۋمەن اينالىستى.

بۇل دا دەر كەزىندە جاسالعان قادام بولدى. سول جىلدارى شاش بۇيرالاۋ سانگە كىردى دە، الەمنىڭ بارلىق قىزدارى شاشتارىنا زيان كەلتىرمەستەن ءتۇرلى شاش ۇلگىلەرىن جاساۋدىڭ امالدارىن ىزدەستىرە باستاعان ەدى. 1947-جىلى شىعارىلعان Onaltherma قۇرالى شاشتى بۇرىنعىداي 100 گرادۋسقا قىزدىرماي-اق، شاشتى قالاعاندارىنشا بۇيرالاۋعا مۇمكىندىك بەردى.

سالقىن حيميالىق بۇيرالاۋعا ارنالعان ءونىم قوراپتارى دۇكەن سورەلەرىندە سىرەسىپ تۇردى. سونىمەن قاتار شاشتىڭ ءتۇسىن ءۇي جاعدايىندا وزگەرتۋگە مۇمكىندىك بەرگەن Poly Color شاشقا ارنالعان بوياۋى دا پايدا بولدى. بۇل قۇرالدار تۇتىنۋشىلاردىڭ عانا ەمەس، كوپتەگەن كوسمەتيكا كورمەلەرىندە مامانداردىڭ دا كوڭىلىنەن شىقتى. وسىنىڭ ءبارى برەندتىڭ شاشقا ارنالعان قۇرالداردىڭ بەدەلدى، ەۋروپالىق ءجاڭاشىل-وندىرۋشى دەگەن اتاعىن تولىقتاي ايقىنداپ بەردى.

ال باسەكەلەستەر بولسا سەرگەلدەڭگە ءتۇستى، ولار Schwarzkopf-تىڭ سوڭىنان ىلەسۋگە ۇلگەرە الماي قالعان ەدى. كوسمەتيكا نارىعىن ەندى ەشنارسەمەن تاڭقالدىرۋ مۇمكىن ەمەستەي كورىنگەن كەزدە، نەمىس برەندى كەزەكتى نوۋ-حاۋىن ۇسىندى. 1949-جىلى كومپانيا الەمدەگى ەڭ العاشقى سىقپاداعى Shauma كرەم-سۋسابىنىن شىعاردى.

بۇل قۇرال تاريحتاعى ەڭ ايگىلى سۋسابىنداردىڭ ءبىرى جانە باتىس گەرمانياداعى ەڭ كوپ ساتىلىمعا يە بولعان سۋسابىن بولدى. جاڭا ءونىمنىڭ ماڭىزدىلىعى جايلى گەرمانيادا جانە نەمىس ءتىلدى ەلدەردە shauma ءسوزى «سۋسابىن» ءسوزىنىڭ ءسينونيمى بولدى دەپ، ول لەكسيكونعا دەندەپ ەنىپ كەتتى.

الايدا ەلدەگى ەكونوميكالىق جانە ساياسي قايشىلىقتار كومپانياعا اسەر ەتپەي قالمادى. سوندىقتان 1950-جىلى برەندتىڭ شتاب-پاتەرى بەرليننەن گامبۋرگكە اۋىستى. 1963-جىلى كومپانيادا گەرمانيانىڭ 2800-گە جۋىق قىزمەتكەرى جۇمىس ىستەدى.

20-عاسىردىڭ ورتاسىندا جاڭا ءسان كەلدى. روك-ن-رولل ءداۋىرى جارقىراعان جارقىن بەينەلەردى تالاپ ەتتى. بۇل تەك كيىمگە عانا ەمەس، شاشقا دا قاتىستى ەدى. بۇل باعىتتاعى العاشقى تاۋار اينەك بوتەلكەلەردە شىعارىلعان Gliss سپرەي-تونيگى بولدى. بۇرىككىشتىڭ كومەگىمەن شاش ۇلگىسىن جىلتىراتۋعا بولاتىن ەدى. بۇل تەك ءبارىنىڭ باسى عانا بولدى.

Schwarzkopf-تىڭ كەلەسى ريەۆوليۋسيالىق ءونىمى Taft — لاك نەمەسە شاشقا ارنالعان سۇيىق تور دەپ اتالعان قۇرالى بولدى.

شاشتاراز سالوندارىندا جاڭا ءونىم 1955-جىلى پايدا بولا باستادى. ال ءبىر جىلدان كەيىن ول بارلىق دۇكەندەردەن تابىلدى. اڭىزعا سۇيەنسەك، لاك ءوزىنىڭ مۇنداي اتاۋىن سەپكەن كەزدە شىعاراتىن «tffft» دىبىسىنا بولا العان. سول ساتتەن باستان نەمىس تىلىندە تاعى ءبىر جاڭا — شاش ۇلگىسىن لاكتىڭ كومەگىمەن قاتىرۋ دەگەن ماعىنانى بىلدىرەتىن taften ءسوزى پايدا بولدى.

ون شاقتى جىلدان كەيىن Schwarzkopf الەمدەگى ەڭ العاشقى فرەونسىز اەروزول ءوندىرۋشىسى بولدى. جاڭا ءونىم قورشاعان ورتانى قورعاۋعا باعىتتالعان ەدى.

برەند ۇنەمى زامان اعىمىنان قالماۋعا تىرىستى. سوندىقتان 1960-جىلدارى حيپپي باعىتى ايگىلى بولا باستاعاندا، كومپانيا تەز ارادا شاشقا ارنالعان Igora Royal كاسىبي بوياۋىن شىعاردى. ونىڭ كومەگىمەن شاشتىڭ ءتۇسىن تەز ارادا، ەش ءقاۋىپسىز وزگەرتۋگە بولاتىن ەدى. ءقازىر ساۋدا بەلگىسىنىڭ كاتالوگىندا كەز-كەلگەن تالعامعا سايكەس 120-دان استام رەڭ بار.

ءبىراق بىرنەشە جىلدان كەيىن شىعارىلعان Igora Toning قۇرالى كوبىرەك ايگىلى بولدى. ول جاستاردىڭ ءۇي جاعدايىندا شاشتارىنىڭ ءتۇسىن وزگەرتىپ، تاجرىيبە جاساۋىنا مۇمكىندىك بەردى. شاش ۇلگىسىنىڭ رەڭىن وزگەرتەتىن كوپىرشىك ەۋروپاداعى وسىنداي العاشقى قۇرال ەدى. سونداي-اق، دۇكەن سورەلەرىندە رەڭ بەرەتىن Palette سۋسابىندارى پايدا بولدى.

برەند شاش بوياۋ سالاسىنداعى كوشباسشىلاردىڭ ءبىرى بولدى. 1975-جىلى Schwarzkopf-تىڭ ساتىلىمى 468 ميلليون نەمىس ماركاسىن  (€227 ملن-عا جۋىق) قۇرادى.

ولاردىڭ تاعى ءبىر جاڭاشىلدىعى — ونىمدەردى تۇرلەرى بويىنشا ءبولۋ بولدى. كومپانيا ماماندارى ءبىر سۋسابىننىڭ شاشتىڭ ارتۇرىنە ءارقالاي اسەر ەتەتىنىن العاش بولىپ انىقتادى. ءدال وسى Schwarzkopf كومپانياسى ادامداردىڭ شاشىن قۇرعاق، قالىپتى جانە مايلى شاش دەپ ءبولدى. جانە ءار تۇرگە ارنالعان قۇرالدار شىعارا باستادى.

Schwarzkopf-تىڭ جاڭا بىعىتى

كومپانيا ۇيرەتۋ ورتالىقتارىن دامىتا وتىرىپ، اعارتۋ ىستەرىن دە ۇمىتپادى. 1972-جىلى برەند شاشتارازدارعا ارنالعان ءار كليەنتكە كەشەندى جانە جەكە جاعداي جاساۋدى بىرىكتىرگەن «Schwarzkopf ءادىسىن» ۇسىندى. شەبەرلەرگە سالونداردا كاسىبي قۇرالداردى پايدالانباس بۇرىن ءۇي جاعدايىندا شاش كۇتىمىنە ارنالعان قۇرالداردى تاڭداۋدى ۇيرەتتى.

باتىستى جاۋلاعان Schwarzkopf برەندى ەندى شىعىسقا جىلجىپ، كەڭەس وداعىنىڭ نارىعىن مەڭگەرۋگە كىرىستى. 1970-جىلداردىڭ باسىندا ءونىم العاش رەت چەحوسلوۆاكيادا پايدا بولدى. الايدا بۇل نارىقتا تامىر جايۋ ءۇشىن بىرنەشە جىل كەرەك بولدى. تەك 1978-جىلى عانا كەڭەس وداعىنىڭ «سۆوبودا»، «لاتبىتحيم» كاسىپورىندارى جانە كراسنودارداعى زاۋىت Schwarzkopf ونىمدەرىن شىعارا باستادى. 1980-جىلداردىڭ سوڭىندا برەند ساتىلىمى 622 ميلليون نەمىس ماركاسىنا (€301 ملن) جۋىقتادى.

1995-جىلى برەندتىڭ 77%-نا يەلىك ەتكەن Hoechst كونسەرنى ءوز ۇلەسىن الپاۋىت Henkel-گە ساتتى. كەلىسىم سومماسى قۇپيا تۇردە قالدى. ال كومپانيانىڭ 23%-ىنا گانس شۆارسكوپفتىڭ مۇراگەرلەرى يەلىك ەتتى. سول ساتتە برەندتىڭ ساتىلىمى 1،1 ميلليون نەمىس ماركاسىنا (€533 ملن) جۋىق بولعان ەدى.

جاڭا باسشىلىقپەن Schwarzkopf جاڭاشىل ونىمدەرىن شىعارۋدى جالعاستىردى. 21-عاسىردىڭ باسىندا كاسىبي ستيليستەر ءۇشىن شاش ۇلگىلەرىن جاساۋعا ارنالعان Osis باعىتى قولعا الىندى. ال 2004-جىلى ەۋروپا نارىعىندا جاڭا Got2b ساۋدا بەلگىسى پايدا بولدى.

بۇل باعىت كوشە ءسانىنىڭ اسەرىمەن اقش-تا پايدا بولدى. Schwarzkopf ءۇشىن بۇل جاستاردى تارتۋ ارقىلى اۋقىمىن كەڭەيتۋدىڭ جاقسى مۇمكىندىگى ەدى.

برەند جارناما جاساۋدا جۇلدىزدارمەن، ەڭ اۋەلى نەمىس جۇلدىزدارىمەن تىعىز بايلانىستا بولادى. 2006-جىلى Taft لاگىنىڭ بەينەسى بولعان حايدي كلۋمدى جانە شاش بوياۋلارىن جارنامالاپ قانا قويماي، برەندپەن بىرگە شاش كۇتىمىنە ارنالعان ءوز ءونىمىنىڭ جەلىسىن قۇرعان كلاۋديو شيففەردى ايتۋدىڭ ءوزى جەتكىلىكتى.  

2018-جىلى 120-جىلدىق مەرەيتويىن تويلاعان كومپانيا Taft برەندىنىڭ جاڭا بەينەسىن تانىستىردى. ول نەمىس توپ-مودەلى توني گارنن بولدى.

قازىردە Schwarzkopf ونىمدەرى الەمنىڭ 50 ەلىندە بار. برەند ونىمدەرىن ەكى باعىتقا بولۋگە بولادى: ماسسماركەت (كوپشىلىككە ارنالعان) جانە شاشتاراز سالوندارىنا ارنالعان كاسىبي قۇرالدار.

“European Trusted Brands” زەرتتەۋىنە سايكەس، Schwarzkopf-تى Reader’s Digest جۋرنالىنىڭ (جىل سايىن تۇتىنۋشىلار سەنىمىن اقتايتىن برەندتەردى تاڭدايدى) وقىرماندارى 11 رەت «ەڭ سەنىمدى» دەپ اتاعان. نەمىس حالقى Schwarzkopf-تىڭ Shauma سۋسابىنىن بۇرىنعىداي سەنىمدى تۇردە كەڭىنەن قولدانىپ كەلەدى.

---