اسحات ايماعامبەتوۆ: كوللەدج پەداگوگتەرى بىلىكتىلىك ساناتتارى ءۇشىن قوسىمشا اقى الادى
وسى جىلدان باستاپ كوللەدج وقىتۋشىلارى بىلىكتىلىگىن كوتەرىپ، بىلىكتىلىك ساناتى بەرىلگەننەن كەيىن لاۋازىمدىق جالاقىسىنىڭ 30-دان 50 پايىزىنا دەيىن قوسىمشا اقى الاتىن بولادى.
بۇل تۋرالى ق ر ءبىلىم جانە عىلىم ءمينيسترى اسحات ايماعامبەتوۆ تەحنيكالىق جانە كاسىپتىك ءبىلىم بەرۋدىڭ 80 جىلدىعىنا ارنالعان ءىس-شارا بارىسىندا مالىمدەدى.
ۆەدومستۆو باسشىسىنىڭ ايتۋىنشا، بۇعان دەيىن بىلىكتىلىك ساناتتارى ءۇشىن قوسىمشا تولەمدەردى تەك مەكتەپ مۇعالىمدەرى العان بولاتىن. «پەداگوگ مارتەبەسى تۋرالى» زاڭنىڭ قابىلدانۋىمەن كوللەدج پەداگوگتەرى دە بىلىكتىلىك ساناتى بەرىلگەننەن كەيىن اي سايىن قوسىمشا اقى الاتىن بولادى.
«مەملەكەت باسشىسىنىڭ قولداۋىمەن 2020 جىلدىڭ قاڭتار ايىنان باستاپ كوللەدج پەداگوگتەرىنىڭ جالاقىسى ارتتى، الداعى جىلدارى دا ارتا تۇسپەك. بىلىكتىلىك ساناتى ءۇشىن پەداگوگتەرگە قوسىمشا اقى تولەۋ ماسەلەسى كوپ جىلدار بويى كوتەرىلگەن بولاتىن. ەگەر مەكتەپتەردە مۇعالىمدەر بىلىكتىلىك ساناتتارى ءۇشىن قوسىمشا اقى السا، كوللەدجدەردە مۇنداي ءۇردىس بولعان جوق. ەندى كوللەدج پەداگوگتەرى دە اي سايىن لاۋازىمدىق جالاقىسىنىڭ 30-دان 50 پايىزىنا دەيىن قوسىمشا اقى الاتىن بولادى. ءوز كەزەگىندە كوللەدج ديرەكتورلارى مەن ديرەكتور ورىنباسارلارىنىڭ اتقارعان جۇمىسىنىڭ تيىمدىلىگىنە بايلانىستى ءوز جالاقىسىنىڭ 100 پايىزىنا دەيىن قوسىمشا اقى الۋ مۇمكىندىگى بار. بۇل ارىپتەستەرىمىزدىڭ جۇمىسقا دەگەن ىنتا-جىگەرى مەن جۇمىستىڭ تيىمدىلىگىن ارتتىرا تۇسپەك»، — دەپ اتاپ ءوتتى مينيستر.
كوللەدجدەردى سۇرانىسقا يە 100 ماماندىق بويىنشا جاڭعىرتۋ جانە بىلىكتى ماماندار دايارلاۋدىڭ حالىقارالىق تاجىريبەسىن ەنگىزۋ ماقساتىندا «جاس مامان» رەسپۋبليكالىق جوباسى ىسكە اسىرىلىپ جاتقانى بەلگىلى.
ءمينيستردىڭ ايتۋىنشا، اتالعان باعدارلاما شەڭبەرىندە قازاقستاندىق كوللەدجدەرگە تەحنيكالىق قۇرال-جابدىقتار ساتىپ الىپ قانا قويماي، ءبىلىم بەرۋ باعدارلامالارىن دا جاڭارتۋ جوسپارلانعان.
«جاس مامان» — ەلباسىنىڭ باستاماسىمەن جۇزەگە اسىرىلىپ جاتقان تەڭدەسسىز باعدارلاما ەكەنىن ايتا كەتكەن ءجون. ول ەلىمىزدىڭ 180 كوللەدجىندە جۇزەگە اسىرىلا باستادى. وسى رەتتە تەك تەحنيكالىق قۇرال-جابدىق ساتىپ الۋ عانا ەمەس، سونىمەن قاتار ءبىلىم بەرۋ باعدارلامالارىن جاڭارتۋ دا جوسپارلانعان»، — دەدى ۆەدومستۆو باسشىسى.
مينيستر ءوز سوزىندە ق ر پارلامەنتى ءماجىلىسى دەپۋتاتتارى توبىنىڭ باستاماسىمەن تجكبب جۇيەسىن دامىتۋ ءۇشىن نورمالار ەنگىزىلگەن زاڭ جوباسى قارالىپ جاتقانىنا توقتالىپ ءوتتى.
اتاپ ايتساق، مامانداردى دايارلاۋ بارىسىندا ەڭبەك نارىعى مەن جۇمىس بەرۋشىلەردىڭ سۇرانىستارىن ەسكەرۋ ءۇشىن كوللەدجدەرگە اكادەميالىق ەركىندىك بەرىلەدى.
«اقشا ستۋدەنتپەن بىرگە جۇرەدى» ءپرينسيپى بويىنشا قابىلداۋ تەتىگىن ەنگىزۋ كوللەدجدىڭ باسەكەگە قابىلەتتىلىگىن جانە كوللەدجدەر اراسىنداعى باسەكەلەستىكتى ارتتىرۋعا مۇمكىندىك بەرەدى. ەگەر ءقازىر وڭىرلىك ءبىلىم باسقارمالارى كونكۋرس وتكىزىپ، مەملەكەتتىك ءبىلىم بەرۋ تاپسىرىسى بويىنشا كوللەدجدەرگە قانشا ورىن بەرىلەتىنىن انىقتاسا، بولاشاقتا بۇل شەشىمدى ستۋدەنتتەردىڭ وزدەرى قابىلدايتىن بولادى. ستۋدەنتتەر قاي كوللەدجدىڭ باسەكەگە قابىلەتتى جانە جاقسى ءبىلىم بەرەتىنىن وزدەرى تاڭدايدى»، — دەدى ءبىلىم جانە عىلىم ءمينيسترى.
ءوز كەزەگىندە «قازاقمىس» كورپوراسياسى» ج ش س باسقارما ءتوراعاسىنىڭ ورىنباسارى ادىلەت بارمەنقۇلوۆ كوللەدج پەداگوگتەرىنە جان-جاقتى قولداۋ كورسەتىلەتىنىن اتاپ ءوتتى. وسىلايشا، «ۇزدىك پەداگوگ» رەسپۋبليكالىق كونكۋرسىنا قاتىسقان پەداگوگتەردىڭ ءارقايسىسى كورپوراسيا تاراپىنان 200 مىڭ تەڭگە كولەمىندە سىياقى بەرىلەدى.
سونداي-اق قاراعاندى وبلىستىق ءماسليحاتىنىڭ دەپۋتاتى، مەسەنات بەكزات التىنبەكوۆ ءوز سوزىندە «ق ر كوللەدجدەرىنىڭ توپ 100 ستۋدەنتى» بايقاۋىنىڭ جەڭىمپازدارىن 100 مىڭ تەڭگەگە دەيىنگى اقشالاي سىيلىقتارمەن جانە «WorldSkills» الەم چەمپيوناتىنىڭ جەڭىمپازىن ءبىر ميلليون تەڭگە كولەمىندەگى سىياقىمەن ماراپاتتاۋعا دايىن ەكەنىن جەتكىزدى. ەلىمىزدەگى كوللەدجدەردىڭ ۇزدىك پەداگوگتەرىنە قازاقستاندىق سالالىق ءبىلىم جانە عىلىم قىزمەتكەرلەرى كاسىپوداعىمەن ساۋىقتىرۋعا ارنالعان 17 جولداما بەرىلگەنىن دە ايتا كەتكەن ءجون.
You Might Also Like
-
1951 جىلدىڭ 1952 جىلعا قاراعان قىسى ايرىقشا قارلى بولدى. كۇندىز دە، تۇندە دە جاۋعان قار كوز جەتەر جەردى تۇگەل باسىپ قالعان. تاۋ دا قار، دالا دا قار... ال اسپاندا ءتىپتى قاردان وزگە ەشتەڭە جوق د...
