اۋىل اكىمدەرىن سايلاۋ: سەنىم مەن سىننىڭ اراسىندا

سوڭعى جاڭارتۋ

(وزگەرتىلگەن ۋاقىتى 10 ساعات بۇرىن)

04 ءشىل. 2025 20:44
136

اۋىل اكىمدەرىن سايلاۋ: سەنىم مەن سىننىڭ اراسىندا

2021 جىلدان باستاپ قازاقستاندا اۋىل اكىمدەرىن تىكەلەي سايلاۋ جۇيەسى ەنگىزىلگەن بولاتىن. بۇل وزگەرىس مەملەكەتتىك باسقارۋدى ورتالىقتان وڭىرلەرگە ىسىرۋ جولىنداعى ماڭىزدى قادام رەتىندە باعالاندى. سودان بەرى ەل بويىنشا ەكى جارىم مىڭنان استام اۋىل اكىمى تۇرعىنداردىڭ تىكەلەي داۋىس بەرۋى ارقىلى سايلاندى.

باستاپقىدا بۇل باستاما دەموكراتيالىق مادەنيەتتى نىعايتادى، جەرگىلىكتى بيلىك وكىلدەرىنىڭ حالىق الدىنداعى جاۋاپكەرشىلىگىن ارتتىرادى دەگەن ۇمىتپەن قابىلداندى. راسىمەن دە، كەيبىر وڭىرلەردە بەلسەندى ازاماتتار بيلىككە كەلىپ، ءوز اۋىلىنىڭ جاعدايىن تۇزەۋگە كىرىستى. الايدا بۇل ءۇمىت اركەزدە اقتالا بەرمەيدى.

سوڭعى جىلدارى اۋىلدىق وكرۋگتەردە سايلانعان اكىمدەردىڭ بىلىكتىلىگى مەن تاجىريبەسىنە قاتىستى كۇمان ءجيى ايتىلا باستادى. سەبەبى ءوزىن-وزى ۇسىنعان ۇمىتكەرلەردىڭ ءبارى بىردەي مەملەكەتتىك باسقارۋ ىسىنەن حاباردار ەمەس. بۇل جاعداي كەي اۋىلداردا اكىمدىكتىڭ تيىمدىلىگىنە نۇقسان كەلتىرىپ وتىر.

ماسەلەن، اتىراۋ وبلىسى يندەر اۋدانىنداعى ءبىر اۋىلدا اكىمدىككە ءوز كانديداتۋراسىن ۇسىنعان، ءبىراق مەملەكەتتىك باسقارۋ تاجىريبەسى جوق ازامات سايلانىپ، نەبارى ءبىر جىل ىشىندە بىرنەشە ورەسكەل قاتەلىك جىبەرگەن. ناتيجەسىندە ول قىزمەتىنەن مەرزىمىنەن بۇرىن بوساتىلدى. بۇل وقيعا تەك ءبىر اۋىلعا ەمەس، تۇتاس رەفورمانىڭ بەدەلىنە كولەڭكە تۇسىرگەنى انىق.

دەمەك، سايلاۋ تەتىگىنىڭ ءوزى ەمەس، ونى جۇزەگە اسىراتىن كادرلىق قۇرام سىن كوتەرمەيتىن جاعدايلار ءجيى كەزدەسۋدە. سوندىقتان تەك حالىقتىڭ تاڭداۋىنا ارقا سۇيەپ قويماي، ۇمىتكەرلەرگە قويىلاتىن تالاپتار مەن دايىندىق دەڭگەيىنە دە ءمان بەرۋ — كەزەك كۇتتىرمەيتىن ماسەلە.