ايالى الاقان
«سوسياليستىك قازاقستان» گازەتىنىڭ قوستاناي وبلىسىنداعى ءتىلشىسى بولىپ ءبىر جىل جۇمىس ىستەگەندە. گازەت ءۇشىن حابار-وشار، وچەركتەردەن باسقا بىتىرگەن شارۋام — «تابىلعان تەڭىز» اتتى پوۆەست جازدىم. ونىم «ارقالىق» دەگەن اتپەن قوستاناي وبلىستىق گازەتىندە ءبىرشاما جاريالاندى.
كەيىن الماتىعا كەلگەن سوڭ سونى ماشينكاعا كايتا باستىرىپ، جازۋشىلار وداعىنا بارايىن. ءابۋ اعا سارسەنبايەۆ كونسۋلتانت ەكەن. سالەمدەسىپ، قولجازبانى سول كىسىگە تاپسىردىم.
اراعا ءبىرشاما ۋاقىت سالىپ، الدىنا قايتا بارىپ ەدىم، قولىمدى ءۇن - ءتۇنسىز الىپ، ورنىنان تۇردى. ءبىر ءتۇرلى كەمسەندەگەن سياقتى. كۇدىكتەنىپ قالدىم. «جاراتپاعان ەكەن-اۋ» دەدىم.
سويتسەم، موينىمنان قۇشاقتاپ تۇرىپ، ارقامنان قاقتى دەرسىڭ.
سەن جاي جۋرناليست پە دەسەم، جازۋشى ەكەنسىڭ عوي. ادەبيەتىمىزگە جاڭا ءبىر جاس تالانت كەلدى، سوعان قۋاندىم، — دەسىن ابەكەم.
كوپ ۇزاماي سول پوۆەست ءابدىجامىل نۇرپەيىسوۆتىڭ يلەۋىنەن ءوتىپ، «جۇلدىز» جۋرنالىندا باسىلدى.
ارادا تالاي جىلدار ءوتتى. مەن «قازاق ادەبيەتى» گازەتىنىڭ، باس رەداكتورىمىن. كابينەتكە ءابۋ اعا كەلدى.
— استراحان وبلىسىنا ءجۇرىپ بارا جاتىرمىن. ساعان ماتەريال .الا كەلەمىن. باساسىڭ عوي؟
— جاقسى بولسا، باسامىز.
ۋادەسىندە تۇردى. الىپ كەلدى.
استراحان وبلىسىندا قازاقتار كەپ ەكەن. قارنى توك، كويلەگى كوك. ءبىراق قازاقشا مەكتەپ، تەاتر جوق. بۇل ۇلكەن ماسەلە. ءوزى رەسەيگە قارايتىن وبلىس. قۇرمانعازىنىڭ بەيىتى سوندا. باسىنداعى بەلگى جۇپىنى. تاماعى توك بولعانمەن ۇلتتىق رۋحاني ازىعى جوق بولسا، ول قازاق قايدا بارادى؟
ءابۋ سارسەنبايەۆ وسىنى اسا ءبىر جاناشىرلىقپەن، جان كۇيزەلىپ اياۋشىلىقپەن جازعان ەكەن.
جاقسىلاپ جاريالادىق.
سودان سوڭ قازاقستاننان تىسقارى جۇرگەن اعايىن اراسىنداعى جانسىز تامىرعا قان جۇگىرە باستادى. مەكتەپتەر اشىلىپ، بۇل جاقتان ول جاققا قازاقشا وقۋلىقتار، ادەبيەت، كىتاپتار جىبەرىلدى.
وسىدان ەكى جىل بۇرىن استراحان وبلىسىنداعى التىنجار دەگەن جەردە ۇلى قۇرمانعازىنىڭ باسىنا اق ورداداي كۇمبەز تۇرعىزىلىپ، ول وراسان جيىن-توي رەتىندە سالتاناتپەن اشىلدى.
اشىلۋىنا مەن دە قاتىستىم. سوندا ءابۋ اعانى ەسكە الدىم.
وتاندى، ۇلتتى، ادەبيەتتى، ونىڭ بولاشاعىن ءسۇيۋ ءۇشىن كوپ ايقايدىڭ كەرەگى جوق. ابەكەڭدىكىندەي تىنىمسىز، جاناشىر، تاباندى ارەكەت كەرەك.
ءقازىر كوزى ءتىرى جۇرگەن اقىن-جازۋشىلاردا ءابۋ سارسەنباي ۇلى ماڭدايىنان ءسۇيىپ، باسىنان سيپاماعانى كەمدە-كەم.
«جاقسى ادام قارتايسا — قازىنا» دەگەن وسى. توقساننان اسىپ كوز جۇمعان ابەكەم قازىنا ەدى.
1999 جىل
You Might Also Like
-
2022 جىلدىڭ 30 ناۋرىزىندا روسكوسموس عارىشكەرلەرى انتون شكاپلەروۆ پەن پەتر دۋبروۆ، سونداي-اق NASA استروناۆتى مارك ۆاندە حاي مىنگەن «سويۋز مس-19» باسقارىلاتىن عارىش كەمەسىنىڭ ەكيپاجى جەرگە...
-
كازىرگى ءىرى-ىرى مامان عالىمداردىڭ ءوزى ءۇشىن كونە ەگيپەت پاپيرۋستارىن، نەمەسە جۇڭگو يەروگليفتەرىن وقۋ قانداي قيىن بولسا، ارابشا قادىم جازۋىن وقۋ دا سونداي كۇردەلى.
