بالىق جەككەن جۇمەكەن
جۇمەكەن ەرتەمەن ۇيدەن شىقتى دا، سۋ سورىپ اقجەم بولعان قاراعاي ەسكەكتى الىپ، ەسىلگە قاراي اياڭدادى. جارقاباقتاعى ۇيەڭكىنىڭ ىرگەسىنەن قىپ-قىزىل بولىپ جالىن اتىپ كۇن شىعىپ كەلەدى. كۇن ساۋلەسى شاشىراي توگىلىپ تۇر. بالا بالشىقتى قىزىل جاردان سىرعاناپ تومەن ءتۇستى.
جۇمەكەن كىشكەنە قايىعىنا ءمىنىپ، تومەن قاراي ىقتى. تومەنگى جاقتا قۇرىپ قويعان اۋى بار ەدى. ەسكەكتى سيرەك سەرمەپ، اۋ قازىقتارىن ۇزاق ىزدەپ، ءشوپ اراسىنان بىرەۋىن تاپتى. سىرەسىپ قاتىپ قالىپتى. شەتىنەن تارتىپ ەدى، الدەقانداي مىقتى كۇش قازىقتى قولىنان سۋىرا بەردى. جۇمەكەن شيىرشىقتالىپ قالعان اۋدى وزىنە قاراي تارتقاندا قايىق شاپشاڭ ىلگەرى سىرعي جونەلدى.
كۇرەكتەي قوڭىر قۇيرىق جارق ەتتى. جۇمەكەننىڭ بەتىنە مۇزداي سۋ شاشىرادى. قايىقتىڭ ىستىك تۇمسىعىن ەڭكەيتىپ، شايقاپ-شايقاپ قالدى. ءبىر ساتتە سۋ بەتىنە قايتا شىعىپ قاراكوك ارقاسىن كورسەتتى دە، زور كۇشپەن بويلاي جونەلدى. كىشكەنە قايىقتى شاپشاڭ قوزعاپ، اعىنمەن تومەن ىقتى.
— جۇمەكە-ەن، بوسا-ات، سۋعا كەتىرەدى، ءولدىڭ… ءولدىڭ… — دەپ ءدوڭ باسىنان ايقايلاعان داۋىس ەستىلدى. بالا قايسارلانىپ العان ەدى. قايىقتىڭ تەكپىشىنە اياقتارىن تىرەپ، سىرەسىپ قاتىپ قالدى. اۋداعى الىپ بالىق كوك ەسىلدىڭ ايدىنىندا بىرەسە جاعاعا سوعىپ، قايتا تەرەڭگە تارتىپ، دامىلسىز جانتالاسادى. جۇمەكەننىڭ ماڭداي تەرى بۇرشاقتاپ كوزىنە قۇيىلىپ، تۇك كورسەتپەيدى. جەڭىمەن سيپاپ تاستاۋعا دا ۋاقىت جوق، قولى سىرەسىپ قاتىپ قالعان.
قانشا ۋاقىت وتكەنىن كىم ءبىلسىن، ءبىر كەزدە بالىق سايابىرسي باستادى. ءجۇرىسى باياۋلاپ، السىرەي بەردى. سۋ ىشىندە يرەلەڭدەپ باياۋ جىلجىدى. بالىق تىك جاردىڭ استىمەن كەلەدى. توبەگە تونە ءتۇسىپ بۇيرا تالدار تۇر. «بىرىنە قولىم ىلىكسە ەكەن» دەيدى جۇمەكەن. ءبىر كەزدە جاعاداعى كوك تالدان ۇستاي الدى. بالىق قايتا تۋلادى. ءبىراق العاشقىداي بۇلقىنىس جوق ەدى، جەلبەزەكتەرىن جەلپىپ تۇرىپ قالدى…
اعىندى بويلاي دابىرلاسىپ جۇرت جەتكەندە، جۇمەكەن ءنان شورتاندى قايىققا اۋدارىپ سالىپ، تەرىن ءسۇرتىپ وتىر ەدى. كوپشىلىك جىرتقىشتىڭ كۇمىستەي جارقىراعان باۋىرىنا قاراپ، قۋانا تاڭىرقاسىپ تۇردى.
— ءاي، وركەنىڭ ءوسسىن، بالىق جەككەن جۇمەكەن! — دەسىپ، قوشەمەت سوزدەرىن جاۋدىرسىن كەلىپ…
You Might Also Like
-
جاكىش اياعىن ىقىلاسسىزداۋ باسىپ كەلەدى. وسىلاي قاراي جۇرسە، بەتىنەن وتى شىعادى. قۇلاعى قىپ-قىزىل بولىپ كەتەدى. اۋلاعا كىرە بەرىپ، موينىن سوزىپ قوراعا قارادى. رىسباي اتاي ءشوپ ءۇيىپ جاتىر ەكەن، جانىنا ...
-
جاباي ءالى كىشكەنتاي بولاتىن. مۇرنى شوشايعان تيتىمدەي سارى بالا كوكشىل كوزدەرىمەن سوزىلىپ جاتقان دالاعا قارادى. بوزتورعايلار شىرىلدايدى. تراكتورلار قازداي ءتىزىلىپ كەلەدى. «تىڭعا العاش جول تارت...
