InfoHub Logo

بالالار بالاقتارىن ءتۇرىنىپ، جۋا تەرۋگە شىقتى. جاقىندا عانا تاسقىن ءجۇرىپ وتكەن كەڭ القادا سۋ تارتىلىپ، ءار جەردە قاقتار جىلتىراپ جاتقان. كۇن كوزى ساي-سالالى، توعايلى ولكەنىڭ ۇستىمەن بيىككە كوتەرىلىپ بارادى. بالالار شىلقىلداقتا بالبىراپ وسكەن جۋانى قۋانا تەرىپ ءجۇر.

— الاقاي، مەن جۇمىرتقا تاۋىپ الدىم! — دەدى ءجانيا دەگەن قىز بالا ايعايلاپ. بارلىعى سولاي قاراي جۇگىردى. ءجانيا تومارشانىڭ ۇستىنەن العان سوپاقتاۋ كوگىلدىر جۇمىرتقانى قولىنا ۇستاپ، كۇلىپ تۇر. بالالاردىڭ بارلىعى جىپ-جىلى جۇمىرتقانى ۇستاپ كورىپ، تاماشالادى. بارىلداۋىق ۇيرەك ۇزاپ كەتپەي، توڭىرەكتەپ ءجۇر.

— ءجانيا، جۇمىرتقانى ورنىنا سال، — دەپ اقىل ايتتى ءبىر بالا.

— نەگە؟

— كوكتەمدە قۇستىڭ  ۇياسىن بۇزۋعا بولمايدى. قۇس وسپەي قالادى.

— جوق، مەن ونى ۇيدەگى ۇيرەككە باستىرىپ وسىرەم! — دەدى ءجانيا جۇمىرتقانى ارتىنا جاسىرىپ.

ءجانيانىڭ ءۇيىنىڭ ۇلكەن قوڭىر ۇيرەگى بالاپان باسۋعا قامدانىپ جۇرگەن. مىنا جۇمىرتقا كىشىرەكتەۋ بولسا دا، ۇيرەك جاتسىنبادى. بەلگىسىز جىلجىپ كۇندەر مەن تۇندەر ءوتتى. ءبىر كۇنى ۇيادان ءالسىز شيقىل ەستىلدى. سارىۇرپەك شوجەلەر دۇنيەگە كەلدى. ءتۇز ۇيرەگىنىڭ بالاپانى قوڭىر جاعال ەكەن. انا ۇيرەك ءۇشىن بوتەندىگى جوق بولاتىن. بارلىعىن جىلى قاناتىنىڭ استىنا الدى.

— ەندى ءبىزدىڭ ۇيدە ءتۇزدىڭ ۇيرەگى وسەتىن بولدى! — دەپ قۋاندى ءجانيا. بالاپانعا «بارىلداۋىق» دەپ ات قويدى، ونىمەن دوستاسىپ كەتتى.

كۇز كەلدى. العاشقى ءسىلبى قار تۇسكەن كۇنى بارىلداۋىق اسپاندا تىزىلە ۇشقان كوپ ۇيرەكتەرگە قاراپ، قاتتى-قاتتى داۋىستاپ جىبەردى دە، جەڭىل كوتەرىلىپ ۇشا جونەلدى.

ول اسپانعا قاراي ورلەي ءتۇسىپ، قاناتتارى سۋىلداپ، ءۇي توبەسىن جايقاپ ءوتتى. ءسويتتى دە ءتۇز ۇيرەكتەرىنىڭ سوڭىنان ۇشىپ،  ۇزاي بەردى.

ءجانيا باقىرىپ جىلاپ تۇر.

— ۇيرەگىڭ كوكتەم تۋىسىمەن قايتا كەلەدى! — دەپ، اناسى ونى جۇباتۋمەن بولدى.

---