InfoHub Logo

كەيدە باسقا تۇسكەن قيىندىقتار مەن ساتسىزدىكتەر تاۋداي بولىپ جينالادى. مۇنداي جاعدايدا قولدى ءبىر سىلتەپ، ءارى قاراي العا ۇمتىلۋدىڭ ءمانى قالماعانداي كۇي كەشەسىز. ءبىراق ەشقاشان مويىماۋ كەرەك.

العا قويعان ماقساتىمىزعا قاراي ءار دايىم ۇمتىلۋ كەرەكتىگىن دالەلدەگەن تۇلعالاردىڭ ومىرىنەن الىنعان قىسقا مىسالداردى نازارلارىڭىزعا ۇسىنامىز.

ۆۋدي اللەن

ەمتيحاننان وتپەي قالىپ، ۋنيۆەرسيتەتتەن شىعارىلدى

«وسكار» سىيلىعىنىڭ 4 دۇركىن يەگەرى، تانىمال رەجيسسەر ۆۋدي اللەن نيۋ‑يورك ۋنيۆەرسيتەتىندەگى وقۋىنان كينەماتوگرافيا بويىنشا ەمتيحاننان وتپەي قالعاندىقتان، وقۋدان ءبىرجولا شىعارىلىپ جىبەرىلدى. الايدا ۆۋدي بۇل ءۇشىن اسا ۋايىمدامادى دا، ويتكەنى ونداعى وقۋ ونى زەرىكتىرىپ جىبەرەتىن‑ءدى، ءبىراق ءبارىبىر دە ول ءوز الدىنا قويعان ماقساتىنا جەتە ءبىلدى.

ۋرسۋلا بەرنس

10 جىل بويى جۇمىستا مانسابىنىڭ كوتەرىلۋىن كۇتۋمەن بولدى

ۋرسۋلا بەرنس نيۋ‑يورك پوليتەحنيكالىق ۋنيۆەرسيتەتىن ءتامامداعان سوڭ، بىردەن امەريكاندىق Xerox كومپانياسىنا تاجىريبەلىك جۇمىسقا ورنالاستى. ونىڭ جۇمىسقا دەگەن ىنتاسى باعالانىپ، كومەكشى قىزمەتىن اتقاردى، ءبىراق ول 32 جاسقا دەيىن كىشىگىرىم قىزمەتتەردى اتقارۋمەن بولدى.

وسىلايشا، 10 جىل وتكەن سوڭ عانا ونىڭ ەڭبەگى اسا جوعارى باعالانىپ، الدىمەن جاھاندىق دامىتۋ بويىنشا ۆيسە‑پرەزيدەنت بولىپ تاعايىندالسا، ال بۇگىندە ول Xerox كومپانياسىنىڭ باس ديرەكتورى بولىپ تابىلادى.

گابريەل جەزۋس

فۋتبولدان الەم چەمپيوناتى الدىندا جاياۋجولدى بوياپ، اقشا تاپتى

برازيالىق فۋتبولشى، ايگىلى «مانچەستەر سيتي» كلۋبىنىڭ شابۋىلشىسى گابريەل جەزۋس 2014 جىلى فۋتبولدان الەمدىك چەمپيونات الدىندا جالاڭ اياق جولداعى بەلگىلەردى بوياپ، اقشا تاپتى. سول كەزدەرى ول تەلەديداردان ءوزىنىڭ سۇيىكتى كومانداسىنىڭ ماچىن تاماشالاپ ءجۇرىپ، ەلىنىڭ قۇراما كومانداسىندا ويناۋدى وزىنە باستى ماقسات تۇتتى. وسىلايشا، بۇگىندە ول ءوز ماقساتىنا جەتە ءبىلدى. قازىرگى تاڭدا گابريەلدىڭ تابىسى اپتاسىنا 80 مىڭ دوللاردى قۇرايتىن، بولاشاعى زور فۋتبولشىلاردىڭ قاتارىندا.

حارلاند ساندەرس

ءوز مەيرامحاناسىن ساتسىزدىككە ۇشىراتتى

پولكوۆنيك ساندەرستىڭ العاشقى مەيرامحاناسى باسەكەلەستىككە توزبەگەندىكتەن ويرانعا ۇشىرادى. وسىعان قاراماستان، حارلاند 65 جاسىندا اقش‑تىڭ بۇكىل مەكەمەلەرىن شارلاپ، ءوزىنىڭ ۇنعا اۋناتىلىپ پىسىرىلگەن ءدامدى تاۋىق قاناتشالارىن ۇسىنۋمەن بولدى. ال، ودان باس تارتقانداردىڭ سانى تۋرا 1008‑گە جەتتى. الايدا، ول مۇنىسىمەن مويىماي، ودان ءارى ءوزىنىڭ تاۋىق ەتىنىڭ بىرەگەي دامىنە سەنۋدى جالعاستىرىپ، ناتيجەسىندە KFC (كەنتۋككيدىڭ قۋىرىلعان تاۋىق ەتى) جەلىسىنىڭ الەمگە كەڭىنەن تارالۋىنا سەبەپ بولدى.

يلون ماسك

جۇمىسىنان قۋىلدى

امەريكالىق ميللياردەر ەستيار شاعىندا ساتسىزدىككە ۇشىرادى. PayPal-دىڭ تاقىرعا وتىرىپ قالۋىنا سەبەپشى بولعاندىقتان، كەزەكتى دەمالىسقا شىعىپ، ۇشاق بورتىندا بولعان كەزىندە ديرەكتورلار كەڭەسىنىڭ شەشىمىمەن جۇمىستان بوساتىلدى.

اراعا 16 جىل سالىپ، ول بۇرىن ءوزىنىڭ يەلىگىندە بولىپ، PayPal-دى قۇرۋعا نەگىز بولعان x.com دومەنىن كومپانيادان 5 ملن $‑عا ساتىپ الدى.  ماسكتىڭ بۇل مىسالى، ومىردەگى بارلىق قيىنشىلىقتار، بيىك بەلەستەرگە جەتۋ ءۇشىن سەبەپ ەكەنىن كورسەتەدى.

اننا ۆينتۋر

ءسان الەمى جۋرنالىنداعى جۇمىسىنان شىعارىپ جىبەردى

جارتى جىلدان استام ۋاقىت جۇمىس جاساعان اننا ۆينتۋر رەداكتورمەن پىكىرى ءبىر جەردەن شىقپاعانى سەبەپتى Harper’s Bazaar جۋرنالىنىڭ ءسان شولۋشىسى قىزمەتىنەن بوساتىلدى.

امەريكاندىق Vogue جۋرنالىنىڭ باس رەداكتورى اننانىڭ ومىرىندەگى بۇل وقيعا وعان بۇدان دا ۇلكەن تابىسقا جەتۋىنە ستيمۋل بەردى دەپ سيپاتتايدى. ال، سول كەزدەن باستاپ اننا: «ەگەر ءسىز ءبىر نارسەگە سەنىمدى بولساڭىز نەمەسە قانداي دا ءبىر نارسەمەن كەلىسپەيتىن بولساڭىز، وندا ءوز پىكىرىڭىزدى ساقتاپ قالعانىڭىز دۇرىس، ويتكەنى جۇمىس بارىسىندا ويلاۋ ەرەكشەلىگى ءارقاشان باعالانادى» ‑ دەپ سەنەدى.

گوۆارد شۋلس

ءوزىنىڭ يدەيالارىن ودان ءارى جۇزەگە اسىرۋعا مۇمكىندىك بەرمەگەنى سەبەپتى جۇمىستان بوساتىلدى

گوۆارد ءشۋلستى Starbucks كومپانياسىندا كوفە داندەرىن ساتۋمەن اينالىسىپ جۇرگەن كەزىندە جۇمىستان شىعارىپ جىبەردى. كومپانيادان بوساتىلۋىنىڭ سەبەبى، باسشىلىق ونىڭ كوفە جەلىسىن ودان ءارى دامىتۋ جونىندەگى يدەيالارىن جۇزەگە اسىرۋدى قولدامادى. گوۆارد ساپالى كوفە مەن جايلى جيھازدى مەكەمەنى بىرىكتىرىپ، ادامدار وندا قايتىپ بارعىسى كەلىپ تۇراتىن ەرەكشە نارسە جاساۋدى ارماندادى.

2 جىل ۋاقىت وتكەن سوڭ، گوۆارد Starbucks كومپانياسىن ساتىپ الدى دا، كوفە بەلگىسىن اقش اۋماعىندا تانىتىپ، بۇكىل الەمگە ايگىلى كوفە جەلىسىنە اينالدىردى.

ستەن سميت

ويىنشىلارعا دوپ بەرۋشى رەتىندە قابىلدانبادى

كاسىبي تەننيسشى ستەنلي رودجەر سميت ءوز مانسابىن باستاعان شاعىندا ديەۆيس كۋبوگى ۇيىمداستىرۋشىلارى مۇقيات ەمەسسىڭ، جيناقى ەمەسسىڭ دەگەن سەبەپپەن ويىنشىلارعا دوپ بەرۋشى قىزمەتىنە قابىلدامادى. ءبىراق، سميت، تەننيس – ول ءوزىنىڭ سۇيىكتى ءىسى ەكەندىگىنە سەندى. ول ودان ءارى ءوزىنىڭ دىتتەگەن ماقساتىنا جەتۋگە تىرىسىپ باقتى، ناتيجەسىندە اقش قۇراماسى كۋبوگىنىڭ 8 دۇركىن يەگەرى اتانىپ، ءوزى جايىندا ولاردىڭ قاتتى قاتەلەسكەنىن دالەلدەپ بەردى.

نيك ۆۋدمان

كومپانيانى تاقىرعا وتىرعىزدى

نيك ۋنيۆەرسيتەتتى ءتامامداعان سوڭ، ءوزىنىڭ ونلاين ويىن-سايت Funbug اتتى كومپانياسىن اشتى، ءبىراق ۇلكەن تابىسقا قول جەتكىزگەنىنە قاراماستان، اقىرى ساتسىزدىككە ۇلاسىپ تىندى.

وسىنداي قۇلدىراۋىنان كەيىن ءوز وزىنە كەلۋ ماقساتىمەن دوستارىمەن بىرگە اۆسترالياعا اتتاندى. ول وندا ءوزىنىڭ سۇيىكتى ەكسترەمالدى سپورت ءتۇرى – سەرفينگپەن اينالىستى. ول ونداعى كاسىبي سەرفينگشىلەرگە قاراپ وتىرىپ، ونىڭ ويىنا ىڭعايلى ءارى شاعىن ەكشەن GoPro كامەراسىن ويلاپ تابۋ تۋىپ، بۇل يدەياسى ونىڭ ميللياردەر بولۋىنا ىقپال ەتتى.

نيك «ەگەر سول كەزدە ساتسىزدىككە ۇشىراماعاندا، مەن ءوزىمنىڭ سۇيىكتى ءىسىمدى ومىرلىك كاسىبىمە اينالدىرا الماس ەدىم» ‑ دەيدى.

سويتيرو حوندا

جوعارى ءبىلىمى جوق

سويتيرو وتە كەدەي وتباسىندا ءوستى، سوندىقتان دا ول بالا كەزىنەن اكەسىنە كومەكتەسۋگە ءماجبۇر بولدى. مەكتەپ بىتىرگەن سوڭ، ءارى قاراي جوعارى ءبىلىمىن شىڭداۋدىڭ ورنىنا قاراپايىم مەحانيك بولىپ جۇمىس اتقاردى. ول ۆەلوسيپەدتەرگە ەسكى موتورلاردى ورناتىپ، كۇندەردىڭ ءبىر كۇنى قىمبات بولشەكتەردەن، حرومدالعان ديسكىلەرمەن جابدىقتالعان جانە بىلعارى ورىندىقپەن قاپتالعان ءوز موتوسيكلىن جاساپ شىعارۋدى ارماندادى.

ەگەر ءوز ماقساتتارىڭىزعا جەتۋدە تاباندىلىق تانىتساڭىز، البەتتە، ارماندار ورىندالادى. ۋاقىت وتە كەلە، سويتيرو الەمدەگى ەڭ مىقتى موتوسيكل شىعاراتىن Honda كومپانياسىن اشتى.

---