InfoHub Logo

قازاقستاننىڭ مەملەكەتتىك كەڭەسشىسى ەرلان قارين الەۋمەتتىك جەلىدەگى پاراقشاسىندا قوعامدا قىزۋ تالقىعا تۇسكەن مەملەكەتتىك ءتىل ماسەلەسىنە قاتىستى پىكىر ءبىلدىردى.

«كەشەدەن بەرى الەۋمەتتىك جەلىلەردە مەملەكەتتىك ءتىلدىڭ مارتەبەسىنە قاتىستى ءتۇرلى پىكىرلەر ايتىلىپ، قىزۋ تالقىعا اينالعانىن بايقاپ وتىرمىز. اركىمنىڭ وي ءبولىسۋى، كوزقاراسىن اشىق ءبىلدىرۋى — قۇپتارلىق جاعداي. دەگەنمەن، "بيلىك قازاق تىلىنە قيانات جاسادى" دەۋ – بوس اڭگىمە، داۋرىقپا ءسوز. اتتانعا سالىپ، ايعايعا باسىپ، جوق جەردەن داۋ شىعاراتىنداي ەش نەگىز جوق. مەملەكەتتىڭ تىلگە قاتىستى ۇستانىمى وزگەرمەدى. قازاق ءتىلىن ەلىمىزدەگى ەتنوسارالىق قاتىناس تىلىنە اينالدىرۋ باعىتىنداعى جۇمىستار تۇراقتى تۇردە جالعاسىپ كەلەدى»، — دەپ جازدى ەرلان قارين.

مەملەكەتتىك كەڭەسشى اسسامبلەيا سەسسياسىندا مەملەكەت باسشىسىنىڭ وسى ۇستانىمدى تاعى ءبىر مارتە ناقتى جەتكىزگەنىن اتاپ ءوتتى. سونىمەن قاتار، قازاق ءتىلىنىڭ بولاشاعىنا قاتىستى پەسسيميستىك كوزقاراستان ارىلاتىن ۋاقىت جەتكەنىن ايتتى.

«كەرىسىنشە، قازاق ءتىلىنىڭ قوعامداعى ورنى جىل سايىن كۇشەيىپ كەلەدى. ەڭ باستىسى — قازاق ءتىلى جاستاردىڭ تىلىنە اينالدى. بۇگىندە جاس عالىمدار، ونەرپازدار، كاسىپكەرلەر انا ءتىلىمىزدى بەلسەندى تۇردە قولدانىپ، ءوز سالالارىندا دامىتۋدا. سوندىقتان "قازاق ءتىلىنىڭ بولاشاعى جوق" دەۋ ەش قيسىنعا كەلمەيدى»، — دەدى ەرلان قارين.

سونىمەن بىرگە، ول مەملەكەتتىك ءتىل مارتەبەسىن كوتەرۋ «ۇر دا جىق» ادىسپەن جۇزەگە اسپايتىنىن، پوپۋليزمگە بوي الدىرماي، بۇل باعىتتا جۇيەلى ءارى ناقتى جوسپارمەن جۇمىس ىستەۋ قاجەتتىگىن باسا ايتتى.

«قازاق ءتىلىن جەلەۋ ەتىپ، ساياسي ۇپاي جيناۋعا تىرىساتىن ارەكەتتەر ناعىز جاناشىرلىق ەمەس. قازىرگى كۇردەلى كەزەڭدە مۇنداي ۇرانشىلدىق ەلدىڭ تىنىشتىعىنا كەرى اسەر ەتۋى مۇمكىن»، — دەدى ول.

ەرلان قارين مەملەكەتتىك ءتىلدىڭ مارتەبەسىن ارتتىرۋ — ۇزاق مەرزىمدى، ماقساتتى جۇمىستى قاجەت ەتەتىن مىندەت ەكەنىن اتاپ ءوتتى.