InfoHub Logo

قازاقستاندا 737 مىڭنان استام مۇگەدەكتىگى بار ادام تۇرادى. ەرەكشە قاجەتتىلىكتەرى بار ادامداردىڭ ءومىر ساپاسىن جاقسارتۋ مەن الەۋمەتتىك قولداۋ كورسەتۋ – مەملەكەت ساياساتىنىڭ نەگىزگى باعىتتارىنىڭ ءبىرى سانالادى. بۇل سالادا ەڭبەك جانە حالىقتى الەۋمەتتىك قورعاۋ مينيسترلىگى (ەحاقم) بەلسەندى جۇمىس جۇرگىزۋدە.

بۇگىنگى كۇنى مۇگەدەكتىگى بار ادامداردىڭ ىشىندە 415،9 مىڭى ەڭبەككە قابىلەتتى جاستاعىلار (56،4%)، 206،8 مىڭى زەينەت جاسىنداعى ازاماتتار (28،0%)، ال 114،7 مىڭى – 18 جاسقا دەيىنگى بالالار (15،6%) قۇرايدى.

ەلىمىزدە مۇگەدەكتىگى بار جانداردى قولداۋ ءۇشىن كەشەندى الەۋمەتتىك قورعاۋ جۇيەسى قالىپتاسقان. بۇل جۇيە جاردەماقىلار، وڭالتۋ شارالارى مەن ارنايى الەۋمەتتىك قىزمەتتەردى قامتيدى. مەملەكەتتىك بيۋدجەت ەسەبىنەن پروتەزدىك-ورتوپەديالىق كومەك، تيفلو-سۋردوتەحنيكالىق قۇرالدار، كرەسلو-اربالار، ساناتوريي-كۋرورتتىق ەم، جەكە كومەكشىلەر مەن ىمداۋ ءتىلى ماماندارىنىڭ قىزمەتتەرى ۇسىنىلادى.

مەملەكەت بارلىق ايماقتاردا مۇگەدەكتىگى بار ادامدار ءۇشىن كەدەرگىسىز ورتا قۇرۋدى جۇيەلى تۇردە جۇزەگە اسىرىپ جاتىر. سونىمەن بىرگە، ەڭبەكمينىنىڭ جانىنان قۇرىلعان ۇيلەستىرۋ كەڭەسى ەرەكشە قاجەتتىلىكتەرى بار ازاماتتاردىڭ ماسەلەلەرىن شەشۋ ءۇشىن جۇمىس ىستەيدى.

2023 جىلعى 1 شىلدەدەن باستاپ الەۋمەتتىك كودەكس اياسىندا مۇگەدەكتىگى بار ازاماتتاردى قولداۋ شارالارى ايتارلىقتاي كەڭەيتىلدى. 2024 جىلى قازاقستان بۇۇ-نىڭ مۇگەدەكتەردىڭ قۇقىقتارى تۋرالى كونۆەنسياسىن جۇزەگە اسىرۋ بويىنشا العاشقى ۇلتتىق بايانداماسىن ءساتتى قورعادى. كوميتەت ەلىمىزدىڭ قادامدارىن وڭ باعالاپ، ماڭىزدى ۇسىنىمدار بەردى.

2024 جىلدىڭ جەلتوقسانىندا مەملەكەت باسشىسىنىڭ تاپسىرماسىمەن 2025–2030 جىلدارعا ارنالعان ينكليۋزيۆتى ساياسات تۇجىرىمداماسى قابىلداندى. ول ەرەكشە قاجەتتىلىكتەرى بار ازاماتتاردىڭ الەۋمەتتىك-ەكونوميكالىق مۇمكىندىكتەرىن كەڭەيتۋگە باعىتتالعان.

بۇگىنگى تاڭدا 541،1 مىڭ ازامات مۇگەدەكتىگى بويىنشا مەملەكەتتىك الەۋمەتتىك جاردەماقى الادى. 2025 جىلدىڭ ءقاڭتار-ساۋىر ايلارىندا بۇل ماقساتقا 126 ملرد تەڭگە ءبولىندى. ورتاشا جاردەماقى كولەمى 78 763 تەڭگەنى قۇرادى. بۇعان قوسا، ەڭبەككە قابىلەتتىلىگىنەن ايىرىلعان ازاماتتارعا مەملەكەتتىك الەۋمەتتىك ساقتاندىرۋ قورىنان قوسىمشا تولەمدەر جۇرگىزىلەدى.

مۇگەدەكتىگى بار ادامدار ءۇشىن 2020 جىلدان بەرى جۇمىس ىستەپ كەلە جاتقان الەۋمەتتىك قىزمەتتەر پورتالى ۇلكەن جەڭىلدىك اكەلدى. جىل باسىنان بەرى پورتال ارقىلى 211،6 مىڭنان استام تاپسىرىس ورىندالدى. سونىمەن قاتار، ءونىم مەن قىزمەت ساپاسىن ارتتىرۋ ءۇشىن ءبىرقاتار جاڭاشىلدىقتار ەنگىزىلدى.

مۇگەدەكتىكتى راسىمدەۋ پروسەسىنىڭ اشىقتىعى مەن قولجەتىمدىلىگىن ارتتىرۋ ماقساتىندا سىرتتاي پرواكتيۆتى مەديسينالىق-الەۋمەتتىك ساراپتاما جوباسى ىسكە اسىرىلىپ جاتىر. 2025 جىلعى 1 ساۋىرگە دەيىن 24،5 مىڭنان استام ءوتىنىم قارالدى.

ارناۋلى الەۋمەتتىك قىزمەتتەر دە دامىپ كەلەدى. 2025 جىلدان باستاپ بۇل قىزمەتتەر ليسەنزيالاناتىن بولادى. بۇگىندە 500-دەن استام ۇيىمعا ليسەنزيا بەرىلدى، بۇل كورسەتىلەتىن قىزمەت ساپاسىن ارتتىرۋعا سەپتىگىن تيگىزەدى.