بىلىكتىلىك تەستىلەۋدەن وتكەن مۇعالىمدەردىڭ جالاقىسى 1 قىركۇيەكتەن باستاپ كوتەرىلەدى
بيىل ۇلتتىق بىلىكتىلىك تەستىلەۋدەن 160 مىڭ ءمۇعالىم وتەدى. بۇل تۋرالى ءبىلىم جانە عىلىم ۆيسە-مينيسترى شولپان قارينوۆا ءمالىم ەتتى.
ۇلتتىق بىلىكتىلىك تەستىلەۋدى وتكىزۋ ماسەلەلەرى بويىنشا بعم وتكىزگەن ونلاين باسپا ءسوز ءماسليحاتىندا شولپان قارينوۆا بۇل سىن - جالپى ءبىلىم سالاسى، مۇعالىمدەر مەن پەداگوگيكالىق ماماندار ءۇشىن وتە ماڭىزدى سۇراق ەكەنىن اتاپ ءوتتى.
«بارشاڭىز بىلەتىندەي، ەلىمىزدە «پەداگوگتار مارتەبەسى تۋرالى» زاڭ قابىلدانىپ، مۇعالىمدەردىڭ ناقتى مىندەتتەرى ايقىندالعانىن، جۇكتەمەلەرىن ازايتۋعا بايلانىستى ءمينيستردىڭ بىرنەشە ۇستانىمىن بۇعان دەيىن جەتكىزگەن ەدىك. زاڭ اياسىندا بىرنەشە نورماتيۆتىك-قۇقىقتىق قۇجاتتار قابىلداندى.
ۇلتتىق بىلىكتىلىك تەستىلەۋ – جالپى ءمۇعالىمدى اتتەستاتتاۋدىڭ ەكى كەزەڭىنىڭ ءبىرىنشىسى. ءبىرىنشى كەزەڭى – ادەتتەگىدەي تەستىلەۋ ارقىلى وتكىزىلەدى. تەستىلەۋ كەزىندە مۇعالىمدەر ءوز پاندەرىنە بايلانىستى بىلىكتىلىگىن كورسەتەدى. ادىستەمە بويىنشا سۇراقتارعا جاۋاپ بەرىپ، اتتەستاتتاۋدىڭ ەكىنشى كەزەڭىنە جولداما الادى»، — دەدى ۆيسە-مينيستر.
ونىڭ ايتۋىنشا بيىل ۇلتتىق بىلىكتىلىك تەستىلەۋگە 160 مىڭعا جۋىق ءمۇعالىم قاتىسادى.
«بيىلدان باستاپ جوو-لاردىڭ پەداگوگيكالىق ماماندىقتارى بويىنشا تۇلەكتەرى وسى تەستىلەۋگە قاتىسا الادى. تەستىلەۋدىڭ ەكىنشى كەزەڭى ءمۇعالىمنىڭ ەڭبەگىن كەشەندى تالداۋ بويىنشا وتكىزىلەدى. ونىڭ ناتيجەسىندە مۇعالىمدەردىڭ ءبارى دە ءوز ەڭبەكاقىلارىن 1 قىركۇيەكتان باستاپ 30-دان 50 پايىزعا دەيىنگى ارالىقتا وسىرە الادى. بۇل – ءمۇعالىمدى قولداپ، ەڭبەگىن باعالاۋعا بايلانىستى جۇمىستار. سوندىقتان ۇلتتىق بىلىكتىلىك تەستىلەۋدىڭ ماڭىزى جوعارى. ۇستىمىزدەگى جىلدىڭ 2 ماۋسىمى كۇنى ءۇردىس بارلىق وڭىردە باستالدى»، — دەدى ول.
You Might Also Like
-
ق ر ءبىلىم جانە عىلىم ءمينيسترى اسحات ايماعامبەتوۆ پەداگوگتاردى ارتىق شارۋادان بوساتۋ جۇمىستارى تۋرالى ايتىپ بەردى.
