InfoHub Logo

حوۆارد كەدەي وتباسىنان شىققان بالا ەدى. مەكتەپكە كەرەك كىتاپ-داپتەرىن الۋ ءۇشىن كوشەدە ءجۇرىپ ۇساق-تۇيەك زاتتار ساتاتىن. كۇندەردىڭ بىرىندە ەشنارسە ساتا المايدى. ونىڭ ۇستىنە ابدەن شولدەپ، قارنى اشادى. بۇدان كەيىن ءبىر ءۇيدىڭ ەسىگىن قاعىپ، جۇرەك جالعايتىن ازىق سۇراۋدى ءجون كورەدى. ءبىراق ەسىكتى جاس كەلىنشەك اشادى. ول ۇيالعاننان:

- كەشىرىڭىز، ىشەتىن سۋ بەرەسىز بە؟ – دەپ سۇرايدى.

جاس كەلىنشەك بالانىڭ قارنى اشىپ قالعان شىعار دەپ ۇلكەن ستاقانعا ءسۇت قۇيىپ اكەلىپ بەرەدى. بالا ءسۇتتى اسىقپاي، ءار جۇتىمىن سىڭدىرە ءىشىپ الىپ:

- كوپ راحمەت! ءسۇت ءۇشىن سىزگە قانشا قارىزبىن؟ – دەپ سۇرايدى.

- ەشقانداي قارىز ەمەسسىڭ! – دەپ كەلىنشەك كۇلىمسىرەپ:

- انام كورسەتكەن جاقسىلىق پەن جاساعان كومەگىڭنەن اقى تالاپ ەتپە دەپ ۇيرەتكەن بولاتىن،- دەيدى. بالا:

- ەندەشە سىزگە تاعى دا ۇلكەن راحمەت ايتامىن! – دەپ كەتىپ قالادى.

حوۆارد كەللي ول ۇيدەن شىققان كەزدە ءوزىنىڭ تويعانىن عانا ەمەس، رۋحاني جاعىنان اسەرلەنگەنىن دە سەزەدى.

ارادان كوپ جىلدار وتەدى. الگى ايەل سيرەك كەزدەسەتىن ءبىر اۋرۋعا شالدىعادى. جەرگىلىكتى دارىگەرلەر ەمدەي الماي، ونى ۇلكەن قالاعا جىبەرەدى. كەڭەس بەرۋگە شاقىرىلعان دارىگەردىڭ ءبىرى حوۆارد كەللي ناۋقاستىڭ قاي جاقتان كەلگەنىن ەستىپ، ونى كورۋگە اسىعادى. ءبىر كەزدەرى وزىنە مەيىرىمدىلىك تانىتىپ ءسۇت بەرگەن ايەلدى كورگەن بويدا بىردەن تانىپ، ونىڭ ءومىرى ءۇشىن قولىنان كەلگەندى ايانباۋعا تىرىسادى.

ۇزاق ۋاقىت ايەل ەم الىپ جازىلىپ شىعادى. اۋرۋحانادان شىعار الدىندا دوكتور كەلليدىڭ الدىنا ايەلدىڭ ەسەپشوتى كەلەدى. ول ونى تەكسەرىپ، ۇستىنە ءبىر نارسەلەر جازىپ، حاتقا سالىپ ناۋقاسقا بەرىپ جىبەرەدى.

ايەل ەسەپشوتتى الىپ كورۋگە قورقىپ دىرىلدەپ تۇرادى. سەبەبى ونىڭ باعاسىنىڭ قىمبات ەكەنىن، ءومىر بويى جۇمىس ىستەۋ كەرەكتىگىن ويلاپ تۇرادى. نە كەرەك حاتتىڭ ءىشىن اشىپ كورەدى. ەسەپشوتتىڭ استىنداعى جازۋدى كورگەن بويدا ول كوزىنە ەرىكسىز جاس الادى. ويتكەنى ول جەردە:

- «ەمدەلۋگە كەتكەن شىعىندار تولىعىمەن ءبىر ستاقان ءسۇتتىڭ اقىسىنا تولەندى»،- دەپ جازىلعان ەدى.  

---