بىرەۋى - جاتىر، بىرەۋى - قايتتى...
سارىاعاش شيپاجايىندا دەمالىپ، اۋىلعا قايتاتىن كەزدە ءبىر مەدبيكە: "اعا، قايتىس قاشان؟" — دەپ سۇرادى. "ولاي دەپ ايتپا، اعا اۋىلىڭىزعا قاشان قايتاسىز، دەسەڭىز، تۇسىنىكتىرەك بولادى"، — دەدىم كۇلىپ. سونان كەيىن وسى سوزگە بايلانىستى بولعان ءبىر وقيعانى ايتىپ بەردىم.
الىستاعى تەمىرجول ستانساسىنىڭ ەكى جۇمىسشىسى ەل استاناسىنداعى تەمىرجولشىلاردىڭ ورتالىق اۋرۋحاناسىندا ەمدەلىپ جاتادى. ول كەزدە قازىرگىدەي بايلانىس جوق. ستانسانىڭ كەزەكشىسى استاناعا دەيىنگى ستانسالاردىڭ كەزەكشىلەرىنە وتىنە وتىرىپ قانا ورتالىق اۋرۋحانانىڭ بولىمدەرىمەن بايلانىسا الادى. ەكى ارالىقتاعى اڭگىمەنى جولداعى بارلىق ستانسالاردان تىڭداپ وتىرۋعا بولادى. الگى ەمدەلىپ جاتقانداردىڭ تۋىستارىنىڭ وتىنىشىمەن ستانسا كەزەكشىسى اۋرۋحانامەن بايلانىسقا شىعادى. ەكى جەرلەسىنىڭ ءاتى-جونىن ايتىپ، جاعدايلارىن سۇرايدى. "ولاردىڭ بىرەۋى ءازىر جاتىر، ال ەكىنشىسى قايتىپ كەتتى"، — دەيدى دارىگەر. ستانسا كەزەكشىسى "قايتىپ كەتتى" دەگەندى بايلانىستىڭ ناشارلىعىنان "قايتىس بولدى" دەپ تۇسىنەدى.
سودان اۋىل اقساقالدارى جيىلىپ، ۇيىنە ەستىرتىپ، جامانات حاباردىڭ جاتپايتىنى بەلگىلى عوي جەر-جەردەگى اعايىن-تۋىس قۇلاقتانىپ قالادى. باسقا كولىكتىڭ رەتى جوق ەرتەڭگى پوەزبەن بارىپ "مارقۇمدى" الىپ قايتۋعا قامدانا باستايدى.
ال، "باقيلىق بولدى" دەگەن ادام استانا جاقتان تاڭ اتا وتەتىن پويىزدان ءتۇسىپ ۇيىنە بارادى. سودان جۇرت ءبىر دۇرلىگىپ باسىلىپ، بۇل وقيعا كوپكە دەيىن اڭگىمە بولدى.
— سوندىقتان دا ءار ءسوزدى ورنىمەن قولدانعان ءجون، — دەدىم. بۇعان مەدبيكە قىز دا كۇلىپ، كەشىرىم سۇراپ جاتىر. مەن دە وعان ساباق بولسىن دەگەنىم عوي.
You Might Also Like
-
اقتاۋدا حالقىمىزدىڭ اتاقتى اقىن-جىراۋى قاشاعان كۇرجىمان ۇلىنىڭ 150 جىلدىق تويى ءوتىپ جاتقان-دى. جاڭاوزەننەن كەپ، قوناقجاي ىزدەپ سابىلماي-اق بۇرىننان تانيتىن ءارى باجالىعى بار بەردىباي دەگەن ازاماتتىڭ ...
-
2006 جىلدىڭ سوڭعى كۇنى كەنەتتەن مۇزعا تايىپ جىعىلىپ، ورتان جىلىگىم وپىرىلىپ، اۋرۋحانادان ءبىر-اق شىقتىم. جيىرما كۇننەن كەيىن گيپس سالىپ ۇيگە شىعاردى، ەكى ايدان كەيىن گيپستى الدى. بالداقپەن ءۇيدىڭ ءىشى...
