«بولاشاق»: قاي ماماندىقتار بويىنشا ءبىلىم الۋعا جەڭىلدىك قاراستىرىلعان
«حالىقارالىق باعدارلامالار ورتالىعى» اق "بولاشاق" حالىقارالىق ستيپەندياسى ارقىلى ماگيستراتۋرا مەن دوكتورانتۋرادا وقۋدا جانە تاعىلىمدامادان وتۋدە ارنايى جەڭىلدىكتەر قاراستىرىلعان ماماندىقتار ءتىزىمىن جاريالادى.
"2017 جىلعا «مەملەكەتتىك قىزمەتشىلەر»، «عىلىمي جانە پەداگوگ قىزمەتكەرلەر»، «ينجەنەرلىك-تەحنيكالىق قىزمەتكەرلەر»، «مادەنيەت قىزمەتكەرلەرى»، «مادەنيەت ۇيىمدارىنىڭ شىعارماشىلىق قىزمەتكەرلەرى»، «بۇقارالىق اقپارات قۇرالدارى رەداكسياسىنىڭ قىزمەتكەرلەرى» ساناتتارى بويىنشا ماگيستر دارەجەسىن الۋعا جانە تاعىلىمدامادان ءوتۋ ۇمىتكەرلەرى ءۇشىن جەڭىلىدكتەر بار. ولار ءۇشىن IELTS 5.5 دەڭگەيىندەگى كورسەتكىش جەتكىلىكتى جانە تىلدىك كۋرستاردان ءوتۋ مۇمكىندىگى قاراستىرىلعان"، - دەپ جاۋاپ بەردى «حالىقارالىق باعدارلامالار ورتالىعى» اق باسپا ءسوز قىزمەتى.
سونىمەن بىرگە، باسپا ءسوز قىزمەتى 2018 جىلدىڭ باسىم ماماندىقتار تىزبەسىنىڭ قاراستىرىلىپ جاتقانىن حابارلادى. جاقىن ارادا بەكىتىلگەن تىزبە رەسمي سايتتا كورسەتىلەدى.
«بولاشاق» حالىقارالىق ستيپەندياسى - قازاقستان رەسپۋبليكاسى ازاماتتارىنىڭ وزىق شەتەلدىك جوعارى وقۋ ورىندارىندا كۇندىزگى وقۋ فورماسى بويىنشا وقۋى ءۇشىن نەمەسە شەتەلدىك ۇيىمداردا عىلىمي، پەداگوگيكالىق، ينجەنەرلىك-تەحنيكالىق جانە مەديسينالىق قىزمەتكەرلەردىڭ تاعىلىمدامادان ءوتۋى ءۇشىن قۇرىلعان حالىقارالىق ستيپەنديا.
ستيپەنديا تۇلەكتەرى مەملەكەتتىك قىزمەتتە، مەملەكەتتىك جانە حالىقارالىق ۇيىمداردا، اكسيونەرلىك قۇرىلىمداردىڭ جاۋاپتى سالالارىندا، مەملەكەتتىك جانە حالىقارالىق جوبالاردا جۇمىس ىستەپ ءجۇر. ايتا كەتسەك، الماتى اكىمى باۋىرجان بايبەك پەن بقو اكىمى التاي كولگىنوۆ، سونداي-اق "نۇر وتان" پارتياسىنىڭ حاتشىسى عابيدۋللا ءابدىراحىموۆ وسى باعدارلامانىڭ العاشقى تۇلەكتەرى.
قازاقپارات
You Might Also Like
-
ەڭ كىشكەنتاي قۇس — كوليبري، كولەمى 5 سم-دەن اسپايدى، سالماعى - 1،6-1،8 گرامم، ەڭ ۇلكەن قۇس — افريكالىق تۇيەقۇس، ولار 2،7 مەترگە دەيىن ءوسىپ، 175 كيلوگرامعا دەيىن سالماق جينايدى.
-
«حالىقارالىق باعدارلامالار ورتالىعى» اق "بولاشاق" حالىقارالىق ستيپەندياسى ارقىلى ءبىلىم الۋدا ۇمىتكەرلەر تاراپىنان سۇرانىسقا يە بولىپ وتىرعان ماماندىقتاردى اتادى.
