InfoHub Logo

ءسىڭىر سوزىلعاندا بۋىندى قۇراستىرىپ تۇرعان سۇيەكتەردىڭ بىر-بىرىنەن ىعىسۋىنا اكەلىپ سوعادى. ءبىر جاعىنا تارتىلىپ كەتكەن بۋىندا تەك ءسىڭىر سوزىلىپ قويماي، بۋىن قابى، شەمىرشەك، تارامىس، اينالاسىن قورشاعان بۇلشىق ەتتەر مەن تامىرلار، جۇيكە تالشىقتارىنىڭ ءبارى بۇلىنەدى.

بۋىن زاقىمدانعاندا ءسىڭىر تەك سوزىلىپ قانا قويماي، كەيدە ءتىپتى سۇيەككە بەكىگەن جەرىنەن ءۇزىلىپ تە كەتەدى. سول كەزدە سۇيەككە اقاۋ تۇسەدى. ونىڭ ءبىر بولشەگى ءبولىنىپ كەتەدى نەمەسە جارىقشاقتانىپ ايىرىلىپ كەتەتىن كەزدەرى دە بولادى. وسىلاي جاراقاتتانعان بۋىن ءىسىپ، جانعا باتىپ اۋىرادى. البەتتە ادام ول بۋىندى، ءتىپتى سول بۋىنعا جاقىن اياقتى، نە قولدى قوزعاي المايدى. بۋىن قاتتى زاقىمدانسا، قابىنىپ، ءتىپتى قوزعالماي قالۋى دا مۇمكىن.

ەكىنشى نە ءۇشىنشى كۇننەن باستاپ سىلاپ-سيپايدى. جاراقاتتانعان قولدى نەمەسە اياقتى جوعارى ۇستاپ تاڭىپ تاستايدى، ودان سوڭ بۋىننان جوعارى ماسساج جاسايدى: الدىمەن سيپايدى، ءۇستىرتىن ىسقىلايدى، كەيىن بۇلشىق ەتتەردى قول باتىرا جۇمسارتادى. وسىلاي دەنەنى سىلاپ-سيپاۋعا ماشىقتاندىرعان سوڭ ءۇش كۇننەن كەيىن بۋىننىڭ ءوزىن، سىڭىرلەرىن، ەتپەن جالعاسىپ جاتقان تارامىستارىن ۇلكەن ۇقىپتىلىقپەن قولدىڭ ساۋساقتارىمەن سيپاپ شىعادى. بۇل كەزدە ساۋساقتاردى بۋىنعا تەرەڭ باتىرىپ ابدەن سيپايدى. ماسساج بۋىندى بۇگىپ-جازاتىن قيمىلدارمەن اياقتالادى.

ءۇشىنشى-تورتىنشى كۇندەردەن باستاپ ىسقىلاۋ، قيمىلداۋ تاسىلدەرىن قولدانىپ، 5-6 كۇننەن كەيىن بۋىننىڭ تولىق بۇگىلىپ-جازىلۋىن جۇزەگە اسىرادى. ەگەر ادام ءوزى اياعىن نە قولىن قيمىلداتا الماسا، سىلاپ-سيپاۋشى كومەكتەسەدى. تەك قول نە اياقتى ءبىر باعىتتا عانا ەمەس، بارلىق جاعىنا شىر اينالدىرىپ، باتىلىراق ۋقالايدى.

بۋىنداردىڭ ىشىندەگى ەڭ قيىن ماسساجدالاتىنى – تىزە بۋىنى. ونىڭ قۇرىلىسىنىڭ كۇردەلىلىگىنەن بە، نەمەسە قورشاعان ءسىڭىر-تارامىستاردىڭ ءجيى جاراقاتتالۋىنان با، ايتەۋىر، تىزەنى سىلاپ-سيپاۋ ءبىراز قيىندىقكا تۇسەدى.

كىشكەنە بالا بولسىن، ەگدە تارتقان قاريالار بولسىن، ابايسىزدا ءسۇرىنىپ كەتسە، تىزە زاقىمدالادى. كوبىنەسە تىزە بۋىنىنىڭ ىشىندە كرەسكە ۇقساعان تارامىس نە ەكى جاعىنداعى تارامىستار مىجىلىپ، ءبولىنىپ كەتەدى. ول كەزدە ادام اياعىن باسا الماي قالادى. اياقتىڭ ءوزى جىلجىمالى جاشىك سياقتى العا نە ارتقا ەرىكسىز كەتىپ قالادى. ەگەر تارامىس ۇزىلسە، تەك حيرۋرگيالىق كومەك كەرەك. ياعني، ولاردى بىرىكتىرىپ تىگۋ قاجەت. سودان سوڭ فيزيوتەراپيا، ماسساج، ەمدىك گيمناستيكانى قولدانادى.

تىزەنى بۇگۋ ءۇشىن اۋرۋ اياقتى ءبىر نارسەنىڭ ۇستىنە نەمەسە سىلاپ-سيپاۋشىنىڭ تىزەسىنە نە سانىنا قويادى. وسىلاي ءتۇزۋ اياقتى، تىزەنى بىرنەشە رەت سيپاعان سوڭ ەپتەپ تىزەنى بۇگەدى. ەندى بۋىننىڭ اينالاسىن بۇگەدى. تىزە توبىعىن جەكە سيپاپ بولعاننان كەيىن ەكى جاعىنان تاقىمعا دەيىن جانە كەرىسىنشە قيمىلدار جاساپ، ورتان جىلىكتىڭ تومەنگى جاعىنداعى بۇدىرعا دەيىن بارادى. وسىلاي تىزە توبىعىنىڭ اينالاسىن سىڭىرلەر تارامىستارى بەكىگەن جەرلەرىن مەيلىنشە تەرەڭدەتە سيپايدى. مۇنداعى ماقسات – بۇرىنعى جينالعان سارىسۋدى تومەن ىعىستىرۋ. بۋىنعا سارىسۋ كوپ جينالسا، كومپيىپ ءىسىپ كەتەدى. سوندىقتان ساۋساقتاردىڭ ۇشىمەن بۋىنداعى سۋدى سىعىپ العانداي بولەدى. وسىلايشا سيپايدى، ىسقىلايدى، ەڭ اقىرىندا سىلاپ-سيپاۋشىنىڭ كومەگىمەن نە مۇمكىندىگىنشە ءوزى تىزەنى اۋىرتپاي قيمىل جاسايدى.

ەگەر بۋىن قاتتى اۋىرىپ، ءىسىپ كەتسە، وندا قيمىل-قوزعالىستى باسقا بۋىندارعا جاسايدى. ونىڭ ءوزى دە ۇلكەن پايدا، ويتكەنى، اياقتىڭ قان اينالىسى جاقسارادى. ال جاراقاتتانعان بۋىندى ۋاقىتشا قوزعاماي تاڭىپ تاستايدى.

بۋىن زاقىمدانعان كەزدە، وقىستا ورنىنان تايىپ كەتسە، ماماندار الدىمەن ونى ورنىنا سالۋى كەرەك. سودان سوڭ عانا بەلگىلى ءبىر ادىسپەن سىلاپ-سيپايدى.

گۇلبارشىن يكىمانوۆا، مەديسينا عىلىمدارىنىڭ كانديداتى، دوسەنت.

---