ۋاقىتىنان بۇرىن شاتتانۋ: ساتتىلىككە اپارار جولىڭىزدا كەدەرگى بولاتىن ادەت ەكەن. كاسىپكەر دجون ماشني وسى ادەتتەن قۇتىلعان سوڭ، ءىسى العا جىلجي باستاعان. دجوننىڭ ماقالاسىنىڭ اۋدارماسىن نازارلارىڭىزعا ۇسىنامىز.

 

*******

جەڭىمپازدار الدىمەن جەڭەدى، تەك سودان كەيىن سوعىسقا بارادى، ال جەڭىلگەندەر شابۋىلداعان سوڭ جەڭىستى ىزدەي باستايدى.

سۇن زى

وسى ادەتىم جايلى كوپ جىلدار بويى بىلمەگەن ەكەنمىن. بۇل ادەت ماعان كوپ جاعدايدا كەدەرگى بولعان. ءتىپتى كەز-كەلگەن باعىتتا دامۋىمدى تەجەدى دەۋگە بولادى.

ەندى، بۇل ادەت جايلى بىلگەننەن بەرى، ونى بارلىق جەردە بايقاپ قالامىن. دوستارىمنىڭ، ارىپتەستەرىمنىڭ، تانىستارىمنىڭ وسى ادەتكە بوي الدىراتىنىن ءجيى كورەمىن.

وسى جايلى بۇرىن-سوڭدى كوپ ويلانباعان ەكەنمىن. الايدا، وسى ادەتتەن قۇتىلساق، تۇراقتىلىق پەن جۇيەلىلىكتىڭ كىلتىن تابا الاتىنىمىزعا سەنىمدىمىن.

ەگەر وسىنى ۇيرەنىپ الساڭىز، ەشقاشان جەڭىلىس كورمەيسىز.

شىندىققا ۇڭىلسەك

ءتارتىپ ەركىندىكپەن پارا-پار.

فرەنك گەربەرت، «ديۋنا»

ادامداردىڭ باسىم بولىگى ۋاقىتىنان بۇرىن شاتتاناتىنى راس.

مەن وسى ومىرلىك ساباقتى بالالارعا ارنالعان كىتاپتان ۇيرەندىم. مەنىڭ دوسىم ليۋك مارديگيان وسى كىتاپتى ۇلىممەن بىرگە وقۋىمدى ۇسىندى: «جاۋىنگەر بوبەكتىڭ ءومىر جولى» دجوكو ۆيللينك.

كىتاپتىڭ مازمۇنى قاراپايىم: ءجۇزۋ بىلمەيتىن، ۇنەمى اينالاداعى بالالاردىڭ مازاعىنىڭ استىندا قالاتىن، كوبەيتۋ كەستەسىن بىلمەيتىن، ءبىر رەت تە تارتىلا المايتىن بالانىڭ ۇيىنە قوناققا اسكەري قىزمەت جاسايتىن اعاتايى كەلەدى. اعاسى بالاقايدىڭ وزگەرىپ، مىقتى بولۋى ءۇشىن شىنىعۋىنا كومەكتەستى.

بۇل بالالار مەن ەرەسەكتەرگە ارنالعان تاماشا وقيعا.

ۋاقىت وتە كەلە بالا بەلتەمىرگە بىردەن ءتورت مارتە تارتىلۋدى ۇيرەندى. ونىڭ قۋانعانى سونشا، شاتتانىپ، ماز-مەيرام بولدى. ول ومىرىندە وسىنداي كورسەتكىشكە قول جەتكىزبەگەن ەدى!

الايدا اعاسى اسا قۋانا قويمادى، سەبەبى، ءىس ءالى بىتپەگەن ەدى.

ماقسات — 10 مارتە تارتىلۋ. ال بالاقاي بار بولعانى تورتەۋىن عانا جاسادى.

شاتتانۋعا سەبەپ جوق، ءالى ۋاقىتى كەلمەدى.

جۇمىسىڭدى ورىنداپ بىتپەيىنشە، ەرتە شاتتانبا

تۇزاقتىڭ قايدا ورنالاسقانىن ءبىلۋدىڭ ءوزى — ونى اينالىپ وتۋدەگى العاشقى قادام بولىپ ەسەپتەلەدى.

دجوكو ۆيللينك

ادام ومىرىندە ءبىر جاقسىلىق ورىن العان كەزدە پسيحولوگيالىق جەڭىلدىك سەزىنە باستايدى. قانداي دا ءبىر سەبەپتەن تالپىنىسى ازايىپ، بوساڭسۋ پايدا بولادى. كوپ ادامدار ءۇشىن ۋاقىتىنان ەرتە قۋانۋ ادەتكە اينالىپ كەتكەن.

دجوكو ۆيللينك بىزگە ماڭىزدى ۇندەۋ جىبەرۋدە: جۇمىسىڭدى اياقتاماي، شاتتانبا. جولدارىڭداعى كىشكەنتاي جەڭىستەر — بۇل جاقسى، الايدا سەندەرگە ءالى تالاي مايداندا جەڭىسكە جەتۋ كەرەك.

ماڭىزدى ىستەرگە بارار جولدا كىشكەنتاي جەڭىستەردىڭ كەدەرگى بولۋىنا جول بەرمەڭدەر.

ۆيللينكتىڭ كىتابىنداعى كىشكەنتاي بالاقاي ءوزىنىڭ كىشكەنتاي جەڭىسىنە قۋانىپ جاتقاندا، اعاسى جاي عانا «جاقسى» دەيدى دە، ءارى قاراي جۇمىسىن جالعاستىرا بەرەدى.

ەرەجەنىڭ بۇزىلۋى

دانىشپان بولۋ ونەرى — نەنى نازارعا الماۋ كەرەگىن تۇسىنۋدە.

ۋيليام دجەيمس

كوپ ادامدار تابىسقا جەتەلەيتىن قيىن جۇمىستاردى ۇناتا بەرمەيدى. سوندىقتان جەڭىستىڭ العاشقى ءدامىن، جۇمىستى وسىمەن ءتامامداۋعا بولادى دەگەن بەلگى دەپ قابىلدايدى.

بۇل — قاتەلىك. مەن دە وسى قاتەلىكتى تالاي رەت جاسادىم!

— كوپ جىل بۇرىن ءوزىمنىڭ اۋديو-ۆيدەو كاسىبىم ءۇشىن جاڭا قۇرىلعى ساتىپ العىم كەلدى. جۇمىستا پايدالانباعان دەمالىس كۇندەرىم جينالىپ قالعان ەكەن، باسشىدان سول كۇندەردىڭ اقىسىن تولەۋىن سۇرادىم. مەن ادەيى دەمالىس الماعان بولاتىنمىن، ويتكەنى كومپانيا سوت ءۇردىسىن جۇرگىزىپ جاتقاندىقتان ۋاقىتتى بەكەر جىبەرمەۋ كەرەك ەدى. باسشى بىردەن «ءيا» دەگەنىنە تاڭ قالدىم، قۋانىشىم قوينىما سيمادى. مەن $3000 الامىن دەپ ويلاپ، اقشا تابۋدىڭ باسقا جولدارىن ءتىپتى ىزدەمەيتىن بولدىم. ءبىراق، ەرتە قۋانىپ قويعان ەكەنمىن. باسشى مەنىڭ سۇرانىسىمدى جوعارعى جاققا جىبەرگەندە، ول جاقتان سۇرانىسىم قابىلدانبادى دەگەن جاۋاپ كەلدى. سول كەزدە قاتتى قامىقتىم. ۋاقىتىنان بۇرىن كەلگەن وسى قۋانىشىم، سول ۋاقىت اراسىندا اتقارىپ ۇلگەرەتىن جۇمىستارىمنىڭ بارلىعىن تەجەپ قويۋعا سەبەپشى بولدى.

— العاش رەت قوماقتى قارجىنىڭ چەگىن قولىما العاندا، قاتتى قۋاندىم. سونىمەن قاتار كەرەمەت وتكەن تەگىن ساياحاتقا جولداما الدىم. ازىن اۋلاق اقشام دا بار ەدى. اقىر سوڭىندا وسى قاراجات پەن ساياحاتقا قول جەتكىزۋگە كومەكتەسكەن ءىسىمدى جالعاستىرۋدى توقتاتاتىپ تاستادىم. تابىس پەن قۋانىش مەنىڭ ءارى قاراي دامۋىمدى تەجەپ قويدى. مەن ۋاقىتىنان بۇرىن قۋانعان ەكەنمىن. ماعان بۇرىن ىستەگەن جۇمىستارىمدى قايتا جاساۋىما تۋرا كەلدى.

— كوپ جىلدار بويى جازۋدى قالادىم. ءبىر نارسە جازسام قاتتى قۋاناتىنمىن. ءبىراق، تۇراقتى جازىپ جۇرمەدىم. مىنە، وسى نارسە مەنىڭ ارى ءارى قاراي دامۋىما كەسىرىن تيگىزدى.

سىيلىعىن ساتتى

ەگەر تۇزاقتى بايقاماي قالساڭىز، اڭشىنى كىنالاماڭىز.

ت. ت. ەسكۋرەل

كوپ جىل بۇرىن وليمپيادالىق ويىنداردان جەڭگەن سپارتالىق جىگىت تۋرالى وقىعان ەدىم. جەڭىسى ءۇشىن ول كەرەمەت سىيعا يە بولدى. بۇل — جەڭىستىڭ بەلگىسىن بىلدىرەتىن التىن مەن اسىل تاستار كومكەرىلگەن ونەر تۋىندىسى ەدى. جاۋىنگەر كەرەمەت سىيدى قۋانا قابىل الدى. بۇل بۇيىم ونىڭ جەڭىسىنىڭ عالامات كورسەتكىشىنە اينالدى.

جارىستان سوڭ، كەلەسى كۇنى جىگىت سىيلىعىن ساتىپ جىبەردى دە، ءارى قاراي جاتتىعۋىن جالعاستىرا باستادى.

سىيلىق — بۇل جاۋىنگەردىڭ جەتىستىگىن اينالاسىناعىلاردىڭ قابىلداۋى ءۇشىن قاجەتتى قۇرال عانا. شىن مانىندە جاۋىنگەر ءوزىنىڭ ىشكى جەڭىسىنە باسا ءمان بەرگەن ەدى.

كەز-كەلگەن جەڭىستى تويلاۋ كەزىندە باسقا دا ماڭىزدى ىستەردى نازاردان تىس قالدىرماڭىز. ەگەر بىرەۋلەر ءسىزدى كىشكەنتاي جەڭىسىڭىز ءۇشىن قۇتتىقتاپ، وعان تامسانىپ جاتقاندا، ۆيللينكتىڭ كەيىپكەرىن ەسىڭىزگە ءتۇسىرىڭىز. وزىڭىزگە «جاقسى» جەتىستىك دەڭىز دە، ءارى قاراي سول قارقىنمەن ءىسىڭىزدى جالعاستىرۋعا تىرىسىڭىز.

جۇيەلىلىك — ماڭىزدى ءمانى بار ادەت

جۇيەلىلىك — قارقىندىلىقتان دا ماڭىزدىراق.

كريستوفەر سوممەر

جۇيەلىلىك — كەمەلدىلىككە باستار جول. ۋاقىتىنان بۇرىن شاتتانۋ ادەتى ءسىزدى تىعىرىققا اكەپ تىرەۋى مۇمكىن. ودان قۇتىلىڭىز دا، العا قاراي جىلجىڭىز. جۇمىس اياقتالعاندا عانا شاتتانا ءبىلىڭىز. ءوز كاسىبىڭىزگە قامقورلىق جاساڭىز دا، ماقساتتارىڭىزعا قاراي ءجۇرىڭىز.

ويتكەنى، ەڭ ماڭىزدى نارسە — تويلاۋ ەمەس، جەڭىس!

---