ءبىر ادام جاس بالاسىن جانىنا الدى،
ەكەۋى سايران ەتىپ كەتىپ قالدى.
قىدىرىپ ارلى-بەرلى ءجۇردى داعى،
ەگىنشى ەگىن ەككەن جەرگە باردى.
ارالاپ ءار ەگىندى قاراپ ءجۇردى،
كەز ەدى ءپىسىپ بولعان ەگىن ءتۇرلى.
باستارىن دانگە تولعان تومەن سالىپ،
بيدايلار بەينە تاعزىم ەتىپ تۇردى.
جالعىز-اق ءبىر بيداي تۇر كوككە قاراپ،
بەينە ءبىر جالعىز ءوزىن كوپكە بالاپ.
بالانىڭ سول بيدايعا كوزى ءتۇسىپ،
بىلمەككە كەتتى كوڭىل ءجونىن سۇراپ:
«قۇبىلىپ بيدايلار تۇر باسىن سالىپ،
جىبەرگەن مىرزا قۇداي نۇرعا قانىپ.
«ءاي، اكە، مۇنىڭ ءمانىن ءتۇسىندىرشى،
ءبىر ىسكە تۇرمىن ءوزىم قايران قالىپ.
بۇل بيداي كوتەرىپ تۇر باسىن كوككە،
قارايدى شەكىرەيىپ ءوزى كوپكە.
وزىنە وزگەلەردى تەڭگەرمەيتىن،
سونشاما بۇل بيدايدىڭ ءدانى كوپ پە؟»
«ايتايىن مۇنىڭ ءمانىن، بالام، ساعان،
شىراعىم، ءتۇرىن كورىپ تاڭدانبا وعان.
وزگەسى تومەن قاراپ بۇگىلگەندە،
ويلاما كەم ەكەن دەپ ءبارى سونان».
جانە دە اكەسى ايتتى بالاسىنا:
«سۇقتانبا قۇر سورايعان قاراسىنا.
قۇدايىم وزگەسىنە ءدان بەرگەندە،
بۇل بيداي ءدانسىز قاپتى اراسىندا.
بيدايلار باسى تولىق ءيىلىپ تۇر،
ءدان بەرگەن قوجاسىنا سىيىنىپ تۇر.
باسىندا بۇل بيدايدىڭ ءدانى بولماي،
كەكىرەيىپ، كوككە قاراپ، ءبۇلىنىپ تۇر.
«ەلدە كوپ بۇل بيدايداي ادام، - دەيدى،
تاكاپپار، ونى حالىق، جامان، - دەيدى.
- قالپى ەمەس تاككاپارلىق دانىشپاننىڭ،
تۇتىنبا بۇل مىنەزدى، بالام»، - دەيدى.

---