InfoHub Logo

ەكسسۋداتيۆتى پليەۆريتتىڭ، ياعني وكپە قابىنىڭ جالقاقتى قابىنۋىنىڭ، تۋىنداۋ سەبەپتەرى قۇرعاق پليەۆريتكە ۇقساس كەلەدى. شامامەن 90 پايىز جاعدايدا ونىڭ پايدا بولۋىنا تۋبەركۋلەز سەبەپشى. تاعى ءبىر ەسكەرەتىن جايت، اۋرۋدىڭ بەلگىلەرى اراسىندا ەڭ الدىمەن وكپە ىسىگى سالدارىنان پايدا بولاتىن اۋرۋلارعا ەرەكشە نازار اۋدارۋ قاجەت. ەكسسۋداتيۆتى پليەۆريت جاعدايىندا وكپە قابى قۋىسىنان بىرنەشە كۋب سانتيمەتردەن باستاپ، بىرنەشە ليترگە دەيىن (شامامەن 5-6 ل) سۇيىقتىق (وكپە قابى جالقىعى) بولىنەدى. ال وكپە قابى قۋىسىنا جينالعان سۇيىقتىق كولەمىنىڭ وكپە قابىنىڭ شامالى زاقىمدانۋىنا سايكەس كەلمەۋى تۇسىنىكسىزدەۋ جايت. بۇل، بالكىم، ەكسسۋداتيۆتى پليەۆريتتى اللەرگيالىق جاۋاپتىڭ ءورشىتىپ جىبەرەتىندىگىنەن بولسا كەرەك.

بەلگىلەرى

باستاپقى ساتىسىندا ناۋقاس كوكىرەگىنىڭ قىسىپ اۋىراتىندىعىنا شاعىمدانادى، ءبىراق كەيىنىرەك بۇل قىسىم وكپە قابى جاپىراقشالارىنىڭ اراسى اشىلۋى سالدارىنان ازايادى.

جوتەل العاشىندا ىلعالدى بولىپ كەلەدى دە جالقىق پايدا بولعاننان كەيىن جوعالادى.

تىنىس الۋدىڭ قيىنداۋى كەڭتارالعان بەلگىلەرىنىڭ ءبىرى. باستاپقى كەزدە اۋىرسىنۋ پايدا بولىپ، كەيىن وكپە قابى سۇيىقتىعى سالدارىنان وكپەنىڭ تىنىس الۋشى اۋماعىنىڭ ازايۋى سەبەپتى اۋرۋ ودان ءارى دامي تۇسەدى. العاشىندا پايدا بولعان كۇشتى اۋىرسىنۋ كەزىندە ەمدەلۋشى ءبىر ءبۇيىرى قىسىپ اۋىراتىندىقتان، ەكىنشى بۇيىرىنە اۋدارىلىپ جاتادى، بۇل كەزدە وكپە قابى قۋىسىنا سۇيىقتىق مولىنان جينالىپ، وكپەنىڭ ساۋ جاعى كەدەرگىسىز كەڭەيۋى ءۇشىن ناۋقاس اۋىرعان بۇيىرىنە قاراي جاتۋعا ءماجبۇر بولادى.

ەگەر جالقىق تىنىس الۋ مەن قان اينالىمىن قيىنداتاتىنداي دارەجەدە جينالسا، پاسيەنت قينالماي تىنىس الۋ ءۇشىن تىكتەلىپ وتىرۋعا نەمەسە تىك تۇرۋعا ىڭعايلانادى.

مۇنداي قىسىلۋ جاعدايى تۇراقتى قايتالانىپ، اۋرۋدىڭ اۋىرلىعى مەن مەرزىمىنىڭ ۇزاقتىعىنا بايلانىستى كۇشتى قۇبىلىپ تۇرادى. وكپە قابى سۇيىقتىعىنىڭ كولەمى ەڭ جوعارعى شەككە جەتكەندە دەنە قىزۋى كوتەرىلىپ، ال بىرتىندەپ سورىلىپ، ازايعان كەزدە تومەندەيدى.

ناقتاما

ناقتاما اۋرۋعا ءتان كوپتەگەن بەلگىلەردى انىقتاۋدا جەڭىلدىك تۋعىزادى، ءبىراق دۇرىس بولجام جاساۋ جانە وڭتايلى ەمدەۋ شارالارىن تاڭداۋ ءۇشىن ەكسسۋداتيۆتى پليەۆريتتىڭ سەبەپتەرىن تانىپ-بىلۋگە نازار اۋدارۋ كەرەك. سوندىقتان ەكسسۋداتيۆتىڭ فيزيكالىق، حيميالىق، سيتولوگيالىق جانە باكتەريالىق قاسيەتتەرىن زەرتتەۋ اسا قاجەت. ول ءۇشىن وكپە قابىنا پۋنكسيا جاساپ، قابىنعان جەرىنەن شامالى وكپە قابى سۇيىقتىعىن الادى.  بۇل پۋنكسيا (توراكوسەنتەز) جەرگىلىكتى ناركوز جانە ارنايى ينە ارقىلى جاسالادى.

فيزيكالىق زەرتتەۋ (سالىستىرمالى تىعىزدىعى، ءالبۋميننىڭ بولۋى) سۇيىقتىقتىڭ سيپاتىن ياعني ەكسسۋداتيۆتى مە الدە ءترانسسۋداتيۆتى مە، سول جاعىن انىقتايدى. ترانسسۋداتقا ءنارۋىزدىڭ، ەريتروسيتتىڭ جانە لەيكوسيتتىڭ وتە از بولۋى، سونداي-اق وكپە قابى شىرىشتى قابىعىنىڭ قانداي دا ءبىر دارەجەدە وزگەرۋى ءتان. مۇنداي زەرتتەۋ وتە ماڭىزدى، ويتكەنى ەكسسۋدات تەك وكپە قابى قابىنعان جاعدايدا عانا پايدا بولادى، ال ترانسسۋدات بولسا قابىنباعان اۋرۋدىڭ ناتيجەسى بولىپ تابىلادى.

حيميالىق تالداۋ ارقىلى ماي نەمەسە حولەستەرين سياقتى بەلگىلى سۋبستانسيالار انىقتالادى.

سيتولوگيالىق زەرتتەۋ وكپە سۇيىقتىعى انىقتالىپ، پاپانيكول بويىنشا بويالعاننان كەيىن ميكروسكوپ ارقىلى جۇرگىزىلەدى جانە بولۋى مۇمكىن كورپۋسكۋليارلىق بولشەكتەر انىقتالادى، بۇل ىسىكتەن تۋىندايتىن پليەۆريت جاعدايىندا ەرەكشە ماڭىزدى. جانە، اقىر اياعىندا، باكتەريولوگيالىق زەرتتەۋ ارقىلى باكتەريالىق فلورانىڭ دارىگە جاۋابىن، بەلگىلەرىن جانە ءتۇرىن انىقتايدى.

ەمى

ەمدەۋدىڭ دۇرىس جولىن تاڭداۋ وتە ماڭىزدى. ەگەر جالقىق تولىق سورىلىپ كەتسە، وندا وكپە قايتادان تولىق كەڭەيەدى، وكپە قابى تەگىستەلىپ، تىنىس جولدارىندا زاقىمدانعان جەر قالمايدى.

ءبىراق كوپ جاعدايلاردا فيبريندىك تورشا وكپە قابى جاپىراقشالارىن جابىستىرىپ، وكپە قابىنىڭ فيبريندىك نىعىزدانۋىنا، كوكىرەك قۋىسى قابىرعاسىنىڭ جيىرىلۋىنا نەمەسە وكپە قابى قالتالارىنىڭ پايدا بولۋىنا الىپ كەلەدى.

تىنىس الۋعا كەرى اسەر ەتەتىندىگى ايقىن: وكپە قابى جاپىراقشالارى بۇدان بىلاي كەدەرگىسىز قوزعالا المايدى، وسىنىڭ سالدارىنان اسىرەسە جاپپاي جابىسۋ جاعدايىندا وكپە تولىق كەڭەيە المايدى، وكپەدەگى اۋا اينالىمى كۇشتى شەكتەلەدى. سوندىقتان اۋرۋدان تۋىندايتىن تۇراقتى وزگەرىستەردىڭ الدىن الۋ ءۇشىن دۇرىس ەمدى مۇمكىندىگىنشە ەرتە باستاعان ءجون.

توسەك رەجيمىن ساقتاۋمەن بىرگە اۋىرسىنۋدى باساتىن ەم-شارالار دا وتە ماڭىزدى. اۋىرسىنۋدى كۇن سايىن ءۇش-تورت رەت 0،5 گ اسەتيلساليسيل قىشقىلىن (اسپيرين) قابىلداۋ ارقىلى باسۋعا بولادى.

ەكسسۋداتيۆتى پليەۆريتكە تۋبەركۋلەز، وكپە قابىنۋى جانە ت.ب. باستاپقى اۋرۋلاردان كەيىن ەم جاسالادى. توراكوسەنتەز ارقىلى ەكسسۋداتيۆتى بىرنەشە رەت جويۋ پاسيەنتتىڭ جاعدايىن جاقسارتىپ، ەمدەلۋ مەرزىمىن قىسكارتادى.

س.يزگالييەۆا، تەراپيەۆت-دارىگەر

---