ءار ارىزدىڭ ارتىندا ادام تاعدىرى تۇر دەسەك، ءاربىر جاعداي – پوليسيا قىزمەتكەرىنىڭ كاسىبيلىگىن، سابىرىن جانە اداممەن قارىم-قاتىناس ورناتۋ شەبەرلىگىن تالاپ ەتەدى. اتىراۋ قالالىق پوليسيا باسقارماسىنىڭ №1 قالالىق پوليسيا ءبولىمىنىڭ ۋچاسكەلىك پوليسيا ينسپەكتورى پوليسيا كاپيتانى مارعۇلان مىنبايەۆ – وسى قىزمەتتىڭ ايقىن ۇلگىسىن كورسەتىپ جۇرگەن مامان.
– تاڭەرتەڭ ەرتە جيىنعا كەلىپ، باسشىنىڭ تاپسىرمالارىن الامىز، اكىمشىلىك اۋماقتاعى كريمينوگەندىك احۋالدى باياندايمىز. تاۋلىك بويى تىركەلگەن ءتۇرلى حابارلامالار مەن ارىزداردى تەكسەرىپ، شەشىم قابىلدايمىز. اكىمشىلىك اۋماقتى ارالاپ، قوعامدىق تىنىشتىقتى قامتاماسىز ەتەمىز. ارنايى پروفيلاكتيكالىق ەسەپتە تۇرعان تۇلعالاردى تۇرعىلىقتى مەكەنجايىنان تەكسەرەمىز، جايسىز وتباسىلاردىڭ تۇرمىس-تىرشىلىگىن باقىلاپ وتىرامىز. مەملەكەتتىك مەكەمەلەردەن، سوت جانە تەرگەۋ ورگاندارىنان تۇسكەن ءماجبۇرلى جەتكىزۋ حاتتارىن ورىندايمىز. جبو كەزەكشىسىنەن تۇسكەن حابارلامالارعا ارەكەت ەتەمىز. تۇرعىندارمەن كەزدەسىپ، اۋماقتاعى كريمينوگەندىك احۋال مەن جاسوسپىرىمدەرگە قاتىستى پروفيلاكتيكالىق تۇسىندىرمە جۇمىستارىن جۇرگىزەمىز، – دەيدى پوليسيا كاپيتانى.
مارعۇلان جاسەن ۇلى مىڭبايەۆ 1991 جىلى اتىراۋ قالاسىندا دۇنيەگە كەلگەن. ول – باتىس قازاقستان وبلىسىنداعى قازاقستان يننوۆاسيالىق جانە تەلەكوممۋنيكاسيالىق جۇيەلەر ۋنيۆەرسيتەتىنىڭ زاڭ فاكۋلتەتىن ءتامامداعان. ىشكى ىستەر ورگاندارىندا 2011 جىلدان بەرى قىزمەت ەتىپ كەلەدى. ول ۋچاسكەلىك پوليسەيدىڭ جۇمىسى – تۇرعىندار اراسىنداعى بىرلىكتى نىعايتۋ دەپ ەسەپتەيدى.
– مەن – ۋچاسكەلىك پوليسيا ينسپەكتورى پوليسيا كاپيتانىمىن. قۇقىق قورعاۋ سالاسىندا 14 جىلدان بەرى قىزمەتتەمىن. العاشقى ون جىل پاترۋلدىك پوليسيادا ەڭبەك ەتتىم. سوڭعى ءتورت جىلدان بەرى وسى اۋماقتا ۋچاسكەلىك ينسپەكتور رەتىندە جۇمىس ىستەپ كەلەمىن. ءبىزدىڭ اكىمشىلىك اۋماقتا 13 مىڭعا جۋىق حالىق تۇرادى. كۇندەلىكتى جۇمىسىمىز – وسى تۇرعىنداردىڭ الاڭسىز ءومىر سۇرۋىنە جاعداي جاساۋ. ايتپاقشى، مەنىڭ ارتىمنان ەرگەن باۋىرىم دا وسى سالادا. ەكەۋمىزدىڭ ارامىز – ءبىر جاس. ول قىزمەتكە 2015 جىلى ورنالاستى. قاجىمۇقان دا العاشقى قىزمەتىن ۋچاسكەلىك پوليسيادان باستاعان ەدى، – دەيدى ول.
مارعۇلان قۇقىق بۇزۋشىلىقتاردىڭ الدىن الۋ ماقساتىندا ەسەپتەگى تۇلعالاردى ۇنەمى تەكسەرىپ وتىرادى. وتباسىلىق-تۇرمىستىق قۇقىق بۇزۋشىلىقتارعا بەيىم وتباسىلاردى جۇيەلى تۇردە بايلانىستا بولادى. كامەلەتكە تولماعان بالالارىنىڭ جاي-كۇيىن دە ۇنەمى نازاردا ۇستايدى.
– كۇن سايىن ءبىز قوعام ءۇشىن اسا ماڭىزدى – تىنىشتىقتى ساقتاۋ جولىندا ءتۇرلى جاعدايلارعا ارالاسامىز. بۇگىنگى وقيعالار ەرتەڭ دە قايتالانۋى مۇمكىن. ءبىزدىڭ باستى ماقساتىمىز – ءار ازاماتتىڭ قاۋىپسىزدىگىن قامتاماسىز ەتۋ، – دەيدى پوليسيا كاپيتانى.
ۋچاسكەلىك ينسپەكتوردىڭ جۇمىسى ۇلكەن جاۋاپكەرشىلىك. ويتكەنى، بۇل قىزمەت حالىق اراسىنداعى سەنىم كوپىرى ىسپەتتەس.
