InfoHub Logo

بۇل باباي تۇكتى شاشتى ءازيز زامانىندا بۇرقىراعان ديۋانا بولعان ەكەن. قاراتاۋدا «مىڭجىلقى» دەگەن تاۋىنىڭ باۋىرىندا ءبىر بۇلاقتى مەكەن جاي قىلىپ ءجۇرىپ، كۇندە تاڭ نامازىن كۇن شىعارماي، سول بۇلاقتىڭ باسىندا وقيدى ەكەن. ءبىر كۇن[ءى] الاگەۋىمنەن كەلسە، جالاڭاش ءۇش قىز سۋدا ويناپ ءجۇر ەكەن. سونىڭ بىرەۋىنە ديۋانانىڭ نازارى ءتۇسىپ، ديۋانا دا ەسى اۋىپ تالىپ قالىپتى، قىز دا قالپاقتاي ءتۇسىپتى. سويتسە دە ولار پەرى قىزدارى ەكەن. جانىنداعى ەكى ساۋ قىز تالىپ قالعان قىزدى كوتەرىپ الا جونەلىپ، وزدەرىنىڭ جۇرتىنا الىپ بارىپتى. قىز ەسىن جيا الماپتى. پەرىنىڭ پاتشاسىنىڭ قىزى ەكەن. پاتشا بالگەر، باقسىلارىن جيدىرىپ، بال اشتىرىپتى، سوندا باقسىلارى ايتىپتى:

— ادامزاتتان شىققان ءبىر اۋليەنىڭ نازارىنا ۇشىراعان ەكەن. سول اۋليەنىڭ ءوزى ۇشكىرىپ جازباسا، باسقادان جازىلمايدى، — دەپتى.

سونان سوڭ پەرى پاتشاسى كۇشتى ۇشقىر ۇشقىشتارىن جىبەرىپ، باباي تۇكتى شاشتى ءازيزدى الدىرىپتى:

— مىنا بالامدى وڭالتىپ، ساۋىقتىرىپ بەرىڭىز! — دەپ جالىنىپ- جالپايىپتى.

— بۇلار مەنىڭ دارەت الاتۇعىن سۋىما بارىپ، جالاڭاشتانىپ سۋعا تۇسكەندىگىنەن مەنىڭ ەسىم اۋىپ، ءبىر نامازىم قازا بولدى. سول نامازىمنىڭ ورىنى قيامەتكە شەيىن تولمايدى. سونى قايتەسىڭ؟! — دەگەن سوڭ:

— وسى بالامدى باسى ءبۇتىن الىڭىز! — دەپ، قىزىن بەرىپتى. پەرىلەرگە بۇيىرىپ، بۇلاقتىڭ باسىنا اپارىپ سالدىرىپتى. قىز ومىرىندە ديۋاناعا جالاڭاش دەنەسىن كورسەتپەپتى. ءبىر كۇن[ءى] ديۋانا:

— جالاڭاشتان، دەنەڭدى كورەمىن! — دەپ، قيعىلىقتى سالىپتى. قىز:

— بولمايدى، ونان سوڭ ەكەۋمىزدىڭ جولداستىعىمىز ادا-كۇدە تاۋسىلادى! — دەپتى.

ديۋانا دا ديۋاناشىلىق مىنەزى قىسىپ:

— جالاڭاشتانىپ، ماعان ءبىر كورىن! — دەپ قويماعان سوڭ، قىز:

— ەندى مەن ساعان جوقپىن. مەن سەنەن ەكىقابات بۋاز ەدىم، ەر ۇل تاپسام كەرەك ەدى. سونان سوڭ كورىنۋىمە دۇرىس ەدى. وعان شىداماي، اسىقتىڭ. قوي، حوش امان بول! مىنا ىشىمدەگى بالاڭدى تۋعان سوڭ، وسى بۇلاقتىڭ باسىنا اپ كەلىپ تاستاپ كەتەم. بەلگىسى — التىننان شۇمەگى، كۇمىستەن تۇبەگى بولار! — دەپ، جونەلە بەرىپتى.

سونان سوڭ ديۋانا قاڭعىپ كەتىپتى. سول بالانى قىز ايتقان كۇنىندە اپ كەلىپ، سۋ باسىنا تاستاپ كەتكەن ەكەن. بەيۋاز بىرەۋ تاۋىپ الىپ، التىننان شۇمەگى، كۇمىستەن تۇبەگى بولعان سوڭ، تۇركىستانداعى توقتامىس حانعا اپارىپ بەرىپ، توقتامىس اسىراپ، بالا قىلىپ وستىرگەن ەكەن. قازاقتان شىققان ەر ەدىگە وسى ەكەن. اكەسى — باباي تۇكتى شاشتى ءازيز اۋليە، شەشەسى پەرى قىزى ەكەن. باباي تۇكتى شاشتى ءازيز اۋليە ءوزىن سول بۇلاقتىڭ باسىنا قويدىرعان ەكەن دە، ەر ەدىگە دە ءوزىن سول باباي تۇكتى شاشتى ءازيزنىڭ قاسىنا قويدىرىپتى. ولاردىڭ سول ورىندا ەكەندىگىن جالاڭ اياق ءاشدۇر سويلەپ، ول اۋليە دە ءوزىن سوندا قويدىرعان ەكەن. مۇنىڭ ءبارىن باستان-اياق سويلەپ اڭگىمە قىلعان — قۋاندىقتان شىققان ارىق قوڭىرباي.
اقپان، بايىشتىڭ اقپانىن ءھام ءوزىن سول اراعا قويدىرىپ ەدى دەسەدى. ەر ەدىگەنىڭ ەرتەگىسىن سەيلەيمىن دەۋشىگە ءبىر قاپ جان كەرەك بولسا كەرەك.

---