InfoHub Logo

قالا جانە اۋىل مەكتەپتەرى اراسىندا ءبىلىم ساپاسى بويىنشا ايىرماشىلىق ءالى دە بار. بۇل تۋرالى ۇكىمەت وتىرىسىندا ءبىلىم جانە عىلىم ءمينيسترى ەرلان ساعادييەۆ ءمالىم ەتتى.

«ورتا بىلىمگە توقتالساق، جاڭارتىلعان ءبىلىم مامۇنىنا كەزەڭ-كەزەڭمەن كوشۋدى جالعاستىرىپ جاتىرمىز. وسى جىلى 1، 2، 5 جانە 7ء-شى سىنىپتار ءوتتى. بۇل رەتتە ساباقتار جاڭا وقۋ باعدارلاماسىمەن، جاڭا وقۋلىقتارمەن جۇرگىزىلەدى. سونىمەن قاتار سىنىپتاردىڭ 85 پايىزى 5 كۇندىك وقۋعا تولىعىمەن كوشتى. قازىرگى ۋاقىتتا گيمنازيا مەن ليسەيلەر تيپتىك وقۋ جوسپارىن قاراستىرۋ بويىنشا ءمۇعالىم قاۋىمداستىعى جان-جاقتى تالقىلاۋعا ءتۇستى. 70 مىڭنان استام ءمۇعالىم وقۋدىڭ جاڭا مازمۇنى تۇرعىسىندا بىلىكتىلىگىن كوتەردى. 10،11 سىنىپتاردا فيزيكا، حيميا، بيولوگيانى اعىلشىن تىلىندە وقىتۋ بويىنشا قاناتقاقتى جوبا باستالدى. بيىل جانە الداعى جىلى ون مىڭ اعىلشىن تىلىندە ءبىلىم بەرەتىن ۇستازدار ءتىل كۋرستارىمەن قامتىلادى»، - دەدى مينيستر.

ونىڭ سوزىنە قاراعاندا، مۇعالىمدەر اراسىنداعى جاستار سانى كوبەيىپ كەلەدى. 2016 جىلمەن سالىستىرعاندا جاس ۇستازدار ۇلەسى 2،5 ەسەگە ارتقان. ءبىراق كورسەتكىشى تومەن وڭىرلەر دە بار ەكەن. وسى ورايدا باتىس قازاقستان مەن قىزىلوردا وبلىستارىندا جاس مۇعالىمدەردىڭ سانى كەمشىن.

«قالا جانە اۋىل مەكتەپتەرى اراسىندا ءبىلىم ساپاسى بويىنشا ايىرماشىلىق ءالى دە بار. ورتا ءبىلىم ساپاسىن ارتتىرۋ ءۇشىن ءبىز ەىدۇ-نىڭ PISA زەرتتەۋىنە قاتىسامىز. بيىل  PISA -2018 زەرتتەۋىنە 65 مەكتەپ پەن 3 مىڭنان استام وقۋشى قاتىستى. ونى مينيسترلىكتىڭ ءوزى ۇيىمداستىرىپ وتىر. 2018 جىلى PISA وتە كۇردەلى بولادى، ياعني كومپيۋتەرلىك فورماتتا وتەدى. سوندىقتان اكىمدەردەن الداعى جىلى مەكتەپتەردى تولىقتاي كومپيۋتەرلەندىرۋ ءۇشىن جەرگىلىكتى بيۋدجەتتەن قاراجات قاراستىرۋدى سۇرايمىن»، - دەدى ەرلان ساعادييەۆ.

قازاقپارات

---