InfoHub Logo

ەرتە زاماندا ءبىر كەدەي ەتىكشى بولىپتى. بالا-شاعاسى كوپ ەكەن. ءۇي-ىشىن اسىراۋ ءۇشىن ول ەل ارالاپ، قوبديىن قۇشاقتاپ ءجۇرىپ، ەتىك تىگىپتى.

         كۇندەردىڭ كۇنىندە قوبديىن قولتىقتاپ، تانىس ەمەس ءبىر اۋىلعا اتتانادى. بۇرىن جۇرمەگەن جولى بولعان سوڭ، ەتىكشى اداسىپ كەتەدى. ءتۇن بولادى. اقىرىندا، ەتىكشى دالادا جالعىز تۇرعان يەسىز ۇيگە كەزدەسەدى. يەسىز قىستاۋدىڭ ىشىنە كىرگەن ەتىكشى پەشتىڭ ۇستىنە شىعىپ، قوبديىن باسىنا توسەپ جاتا كەتەدى.

         ءبىر ۋاقىتتا سالدىر-گۇلدىر ەتكەن ءبىر نارسەنىڭ داۋسى شىعادى. ەتىكشى ەسىككە قاراسا ماڭدايىندا جارقىراعان جالعىز كوزى بار، ءبىر ەڭگەزەردەي ءداۋ كىرىپ كەلە جاتىر ەكەن.

         — پەش ۇستىندە جاتقان قانداي ادام؟ – دەپ سۇرايدى ءداۋ. ەتىكشى:

         — بۇل - ەتىكشى، – دەپ جاۋاپ بەرەدى.

         ءداۋ:

         — بىزگە كەرەك شەبەر ەتىكشىمىسىڭ؟ – دەيدى. سونان سوڭ ءداۋ بۇيىرىپ:

         — كانە، بەرى كەل، شەبەر، مىنا ۇيگە كىر. ەگەر ەرتەڭگە دەيىن ءبىر كەرەمەت ەتىك تىكسەڭ، جانىڭ امان قالادى. ال، ەگەر ورىنداماساڭ، باسىڭدى الامىن، – دەيدى دە ەتىكشىنى ىشكە كىرگىزەدى.

         ءداۋدىڭ ءوزى ەسىكتىڭ الدىنا جاتىپ ۇيقىعا كىرىسەدى. ەتىكشى ىشىنەن:

         — ەندى ءومىرىم جويىلدى، ءولىپ كەتسەم، بالا-شاعامدى كىم اسىرار ەكەن؟ – دەپ ۇرەيلەنەدى.

         امالى تاۋسىلعان ەتىكشى تاڭ اتقانشا وتىرىپ عاجايىپ ەتىك تىگەدى. ەتىكتىڭ سىرتقى كورىنىسىنىڭ باسقا ەتىكتەردەن ايىرماشىلىعى - ۇشى تىپ-تىك ءسۇيىر، جوعارى كوتەرىلىپ تۇرادى. ال ونىڭ ءبىر كەرەمەت قاسيەتى - اياعىنا كيگەن ادام اسپانعا قالىقتاپ ۇشىپ، باراتىن جەرىنە لەزدە جەتىپ بارادى. ءبىراق ول ءداۋدىڭ ونى وڭاي ۇيىنە جىبەرە قويماسىن ءبىلىپ:

         — ءبارىبىر ءداۋ قولىنان ولەمىن. ودان گورى بۇل ءداۋدى ءوزىم ولتىرەيىن، – دەپ، وتكىر پىشاعىن الادى.

         ءداۋ ۇيقىعا كەتتى-اۋ دەگەن كەزدە، ەتىكشى ەتىگىن كيىپ، سىرتقا شىعادى. قالىقتاپ ۇشقان كۇيى قولىنداعى پىشاعىمەن ءداۋدىڭ جالعىز كوزىن تۇيرەپ الادى. ءداۋ باقىرىپ:

         — ەر بولساڭ، ەكى سوق، – دەيدى.

         ەتىكشى:

         — ءبىر دە جەتەر، – دەپ، ءداۋدىڭ ۇستىنەن ۇشىپ وتەدى. ال، ءداۋ جاراقاتتان تاباندا ولگەن ەكەن دەيدى.

         ەتىكشى سىرتتا تۇرىپ ءارى ويلاپ، بەرى ويلاپ، يەسىز ءۇيدىڭ توبەسىنە شىعىپ تۇنەيدى. تاڭ اتقان سوڭ، ءداۋدىڭ ءۇيىن ارالاپ، قاراپ شىعادى. ءۇيدىڭ ءبىر قاراڭعى جەرىندە تەمىر ساندىق تۇر ەكەن. ەتىكشى تەمىر ساندىقتى ازەر دەگەندە اشادى. ونىڭ ءىشى تولعان التىن-كۇمىس ەكەن. بۇدان كەيىن ەتىكشى التىن مەن كۇمىستى كەرەگىنشە الىپ، عاجايىپ ەتىگىن كيىپ، ۇيىنە ۇشىپ كەلەدى.

         داۋدەن العان بايلىعىنىڭ جارتىسىن ەلىندەگى جەتىم-جەسىرلەرگە تاراتىپ بەرەدى.

         وسىلاي، ەتىكشى تۇراتىن اۋىلدىڭ تۇرمىستارى جاقسارىپ، مۇراتتارىنا جەتەدى. ال، قارتايعان كەزىندە ەتىكشىنى بالالارى اسىراپتى.

---