InfoHub Logo

Google سەرۆيسىندەگى ءسىزدىڭ جەكە دەرەكتەرىڭىز كەنەتتەن باسقالار ءۇشىن قولجەتىمدى بولىپ قالۋى مۇمكىن. ءبىز سىزدەرگە مۇنداي كەلەڭسىزدىكتى قالاي تۇزەۋگە بولاتىنىن ايتامىز.

Google نەلىكتەن قولدانۋشىلار تۋرالى دەرەكتەردى جينايدى.

قازىرگى تاڭدا Google ءبىزدى باقىلاپ وتىراتىنى ەشكىم ءۇشىن قۇپيا ەمەس. ءبىزدىڭ مەكەن-جايىمىزدى باقىلاپ وتىراتىنى سياقتى عالامتورداعى ىس-ارەكەتىمىزدى دە نازارىنان تىس قالدىرمايدى. ءسىز جەلى ارقىلى قانداي دا ءبىر ءونىمدى ىزدەپ، ول تۋرالى مالىمەت وقىعاندا، YouTube سىزگە بىردەن وسىعان ۇقساس ءونىمنىڭ جارنامالارىن ۇسىناتىنىن بايقاعان بولارسىز. ەگەر Google ءوز پايدالانۋشىلارى جونىنە مالىمەتتەردى جيناماسا، دەربەس جارناما بولماي، جارنامالاردىڭ جۇمىسى توقتاپ قالار ەدى.

دەرەكتەردى جيناۋدىڭ ءقاۋپى نەدە؟

ءبىر قاراعاندا بۇندا تۇرعان جامان ەشتەڭە جوق سياقتى. ءبىز جايلى Google دەرەكتەر جيناسا نەسى بار، ەندى كومپانيانىڭ قىزمەتىن پايدالانباۋىمىز كەرەك پە؟ قايتا وسى قىزمەتتىڭ كومەگىمەن عالامتور قىزىقتى ءارى پايدالى: ءسىزدىڭ قىزۋعىشىلىقتارىڭىزدى قاناعاتتاندىرادى، كەرەكتى كەڭەستەر بەرەدى.

الايدا Google Docs يندەكساسياسىمەن ورىن العان جۋىرداعى وقيعانى ەسكە الساق، وندا Google-دان باسقاسى ءسىزدىڭ مەكەن-جايىڭىز جايلى، نەمەن اينالىساتىنىڭىز تۋرالى دەرەكتەردى ءبىلىپ الۋى مۇمكىن دەگەن كۇمان تۋاتىنى انىق. كەپىلدىك بولماعاندىقتان ءوز قامىڭىزدى ءوزىڭىز جاساۋىڭىزعا تۋرا كەلەدى.

Google ءسىز جايلى نە بىلەدى؟

ورنالاسقان جەرىڭىز جايلى اقپاراتتار

ءبىرىنشى جانە ەڭ باستىسى — بۇل ءسىزدىڭ گەولوكاسياڭىز. سول ارقىلى Google ءسىزدىڭ ورنالاسقان جەرىڭىزدى باقىلاپ، مەكەن-جايلاردى جازىپ وتىرادى. سودان سوڭ سول اقپاراتتاردى نەگىزگە الا وتىرىپ دەربەس جارنامالاردى ۇسىنادى. سىلتەمە ارقىلى جۇرسەڭىز، Google، ءتىپتى، ءسىز ءوزىڭىز ۇمىتىپ قالعان مەكەندەرىڭىز جايلى اقپاراتتاردى ەسىندە ساقتاپ تۇراتىنىنا كوز جەتكىزە الاسىز.

سول جاق جوعارعى بۇرىشىنان كەز-كەلگەن كۇندى تاڭداساڭىز، كارتادان قاي جەردە بولعانىڭىز، ساعات نەشەدە، ءتىپتى قانداي كولىكپەن  قوزعالعانىڭىزعا دەيىن اقپاراتتار شىعا كەلەدى.

ىزدەۋ تاريحى مەن جەلىدەگى ىس-ارەكەتتەر

Google تەك ءسىزدىڭ ىزدەۋ تاريحىن عانا ەمەس، سونىمەن قاتار ءسىز وقىعان ماقالالاردىڭ ءتىزىمى، الەۋمەتتىك جەلىدەگى ادامداردىڭ پروفيلدەرى، ءسىز كىرگەن جەلى پاراقشالارىن ساقتاپ تۇرادى. سىلتەمەگە ءوتىپ، ءوزىڭىز كوز جەتكىزە الاسىز.

ءسىزدىڭ قۇرىلعىڭىزدان الىنعان اقپاراتتار

سىزگە وزەكتى، ماڭىزدى جارنامالار ۇسىنۋ ءۇشىن Google ءسىزدىڭ بايلانىستارىڭىز جايلى دەرەكتەر، كۇنتىزبەڭىزدەگى جوسپارلارىڭىز، ءسىز قولداناتىن قوسىمشالار مەن تىڭدايتىن اۋەندەرىڭىز، ءتىپتى باتارەيا زاريادىنىڭ دەڭگەيى جايلى دەرەكتەردى ساقتاپ وتىرادى. بارلىق دەرەكتەر ءتيىزىمىن وسى جەردەن كورە الاسىز.

دىبىستىق سۇرانىمدار جانە سمارتفوندى دىبىستىق باسقارۋ

ەگەر سىزگە «وكەي، Google» تىركەسى تانىس بولسا، قۇتتىقتايمىز: ءسىزدىڭ سمارتفونىڭىزدى باسقارۋداعى دىبىستىق بۇيرىقتارىڭىز جانە دىبىستىق ىزدەۋ سۇرانىمدارى Google سەرۆەرلەرىندە ساقتالادى. ولاردى مىنا سىلتەمە ارقىلى تىڭداي الاسىز

ءسىز جايلى جارنامالىق اقپارات

Google ءۇشىن قولدانۋشىلار جايىندا دەرەكتەردى جيناۋداعى نەگىزگى ماقسات — جارنامانى دەربەستەندىرۋ. سەبەبى وسى جارنامالار ارقىلى كومپانيا اقشا تابادى. ءسىزدىڭ مۇددەڭىز بەن قىزىعۋشىلىقتارىڭىز جايلى جارناما بەرۋشى حاباردار ەكەنىن وسى جەردەن ءبىلىپ، ءبىر كەزدەرى كەزدەيسوق عالامتوردان ىزدەستىرگەن ءونىم جايلى «مازا بەرمەيتىن» جارنامالاردان وڭاي قۇتىلا الاسىز.

ءسىزدىڭ سمارتفونىڭىزداعى فوتوسۋرەتتەر

ەگەر ءسىز Android نەگىزىندەگى سمارتفون قولداناتىن بولساڭىز، ءسىزدىڭ فوتوسۋرەتتەرىڭىز Google بۇلتتى مۇراعاتىندا ءقازىردىڭ وزىندە ساقتالىپ تۇرعان بولار. ال ءسىز بۇل جايلى بىلمەۋىڭىز دە عاجاپ ەمەس، سەبەبى، اۆتوجۇكتەۋ ادەپكى قالپى بويىنشا قوسىلۋى مۇمكىن. Google Photo قوسىمشاسىن وشىرۋگە اسىقپاڭىز — بۇل جاعدايدى رەتتەمەيدى. بۇدان ءسىزدىڭ بارلىق فوتوسۋرەتتەرىڭىز ساقتالۋىن توقتاتپايدى، ءارى بارىنە قولجەتىمدى — «اشىق» كۇيدە قالىپ قويۋى مۇمكىن. Google ءوزى ءار ءتۇرلى قۇرىلعىلارداعى فوتوسۋرەتتەر مەن بەينەجازبالاردىڭ اۆتوجۇكتەلۋىن قالاي وشىرۋگە بولاتىنىن مىنا نۇسقاۋلىقتا جازعان.

ءسىزدىڭ cookie-فايلدارىڭىز

ءسىزدىڭ كومپيۋتەرىڭىزدىڭ كوپتەگەن رەسۋرستارىن Google Chrome «جەپ قوياتىنىن» بايقاعان بولارسىز؟ براۋزەر ءسىز جايلى مالىمەتتەردى جيناپ، ءتىپتى تولىعىمەن جابىلعان كەزدىڭ وزىندە، فون كۇيىندە جۇمىس ىستەپ تۇرادى، سونىمەن قاتار ءسىزدىڭ cookie فايلدارىڭىزدى دا ساقتايدى. Google بۇل فايلداردى قالاي جانە نە ءۇشىن قولداناتىنىن مىنا سىلتەمە ارقىلى تۇسىنە الاسىزدار.

 ەگەر ءسىز قوسىمشا بەتتەر فون كۇيىندە جۇمىسىن جالعاستىرعانىن قالاماساڭىز، Chrome براۋزەرىنىڭ باپتاۋىنا ءوتىپ «سيستەما» بولىمىندەگى «براۋزەر جابىلعان كەزدە فون كۇيىندە جۇمىس ىستەيتىن سەرۆيستى وشىرمەۋ» پۋنكتىنىڭ قارسىسىنداعى بەلگىنى باسىڭىز. بۇل Windows-نۇسقالارىنا عانا قول جەتىمدى، macOS قولدانۋشىلارىندا جوق. ەگەر ءوزىڭىز جايلى دەرەكتەردى جيناۋدى، ءارى cookie فايلدارىن قولدانۋدى وشىرگىڭىز كەلسە پاراقشانىڭ تومەنگى جاعىندا «قوسىمشا باپتاۋلار» باتىرماسىن باسىپ، ءوزىڭىز جايلى، ءوزىڭىزدىڭ ىس-ارەكەتتەرىڭىز جايلى جاريا قىلعىڭىز كەلمەيتىن اقپاراتتى وشىرە الاسىز.

ءوزىڭ جايلى مالىمەتتەردى قالاي وشىرۋگە، ءارى كەلەشەكتە جينالۋىن قالايشا تىيۋعا بولادى؟

اۋەلى ءسىز مىنا سىلتەمەگە ءوتىپ Google-گە جانە جارناما بەرۋشىلەرگە جىبەرگىڭىز كەلمەيتىن اقپاراتتاردى ءوشىرۋىڭىز كەرەك. بارلىق پۋنكتتەر ءبىر جەردە ورنالاسقاندىقتان، قولدانۋ وتە ىڭعايلى.

سودان كەيىن ءسىز تۋرالى بۇرىن جينالعان دەرەكتەردى ءوشىرىڭىز. ول ءۇشىن كەلەسى سىلتەمەگە ءوتىڭىز (بارلىق اقپاراتتى بىردەن جويۋ ءۇشىن «بارلىق كەزدەگى» پۋنكتىن تاڭداۋىڭىزعا بولادى)، سەرۆيستەردى بىرتىندەپ نەمەسە Google سەرۆيستەرىنىڭ بارلىعىن تاڭداپ قورىقپاستان «جويۋ» باتىرماسىن وسى جەردە وزگەرتە الاسىز.

سونداي-اق ەگەر ءسىز بايلانىسسىز تولەمدەر ءۇشىن Google Pay–ءدى قولدانباساڭىز، ءارى Google Play قوسىمشاسىن ساتىپ الماساڭىز، Google-دا تولەم جايلى اقپاراتتارىڭىزدىڭ قالماعانىن تەكسەرىڭىز، قاجەت دەپ تاپساڭىز ونى دا وشىرە الاسىز.

---