InfoHub Logo

"ءىلىم، ونەر مەن عاشىقتىق ەگىز ۇعىمدار" دەيدى شىعىستىڭ ويشىلى يكبال. ياعني، ەكەۋىنىڭ ماقساتى ءبىر، ول اقيقاتىن تانۋ مەن سەزىنۋ. شەكسىزدىككە سەرپىلتەتىن رۋحاني قۇبىلىس.

عاشىق ادام عاشىعىنا جۇرەك كوزىمەن قاراسا، سىرتتاعى ادام ماتەريالدىق ەكى كوزىمەن عانا قارايدى. سوندىقتان سىرتتاعى ادام عاشىق بولعان جاننىڭ عاشىعىنىڭ ناپسىلىك كەمشىلىگىن كورىپ، عاشىق جانعا "جىندى" دەگەن اتاۋ بەرەدى. دۇرىسىندا عاشىق ادامعا جىندىلىق سيپاتىن تاڭادى.
ىلىمگە جۇرەك كوزىمەن ۇمتىلىپ، سول جولدا ۇزاق ساياحاتقا شىققان عالىمنىڭ ءحالى سەكىلدى.

ءناپسىنىڭ تاربيەلەنەتىنىن كوكىرەك كوزى اشىلعان قاي ءىلىم يەلەرىن وقىساڭدا تۇسىنىكتى جايت. ال، ءار ادامنىڭ وزىنە ءتان رۋحاني بولمىسى مەن ءمولدىر تازا رۋحى بار. عاشىق ادام عاشىعىنىڭ تاربيەلەنەتىن ناپسىلىك كەمشىلىكتەرىن تەسىپ ءوتىپ، كوڭىل كوزىمەن رۋحاني بولمىسىن كورەدى.
اقيقاتتى عالىمنىڭ بايقاۋى مەن ونەر ادامىنىڭ سەزىنۋى سەكىلدى قۇبىلىس.

عاشىق ادام عاشىعىنا قاراعاندا ءوزىنىڭ رۋحاني بولمىسىن اينادان كورگەندەي سيپاتتا بولادى دەيدى. ياعني، "اينا" ۇعىمى، "ءمۇمين ءمۇميننىڭ ايناسى" ءپالساپاسى. رۋحاني بىرلىك ارقىلى شەكسىزدىككە جالعانۋ. حاكىمدەر ايتقان، اقيقاتتى سەزىنگەن جاننىڭ رۋحاني شالقۋى. سەبەبى تاريحتىڭ رۋحاني قاباتىنا زەر سالساڭ، ادامنىڭ اقىلىنا ماڭگىلىك پەن شەكسىزدىك الىس، الايدا ادامنىڭ جاندۇنيەسى وعان ىشتەي جاقىن، سەزىنىپ ءومىر سۇرەدى. ادام ءوزىنىڭ بار بولۋىن شەكىزدىكتەن الىپ كەلەدى، ءبىراق وعان جەتە المايتىن قۇبىلىس.

بۇل قۇبىلىس اقىلدىلار ءۇشىن تاريحتا دەنى دۇرىستىق، ناداندار ءۇشىن جىندىلىق سيپات بولعان.

عاشىقتىقتىڭ قۇبىلىپ، جۇرەك كوزىنىڭ جابىلۋى ماتەريالدىق قۇبىلىستىڭ ىقپالىنان بولادى دەۋدە. دەمەك، عاشىقتىقتىڭ نازىك حالدەن - سۋىق حالعا ءوتۋى، كوڭىل كوزىنىڭ ىشكى ايناعا قاراعان قۇبىلىسى ەمەس، ەكى كوزدىڭ سىرتقا ۇمتىلعان قۇبىلىسى. ابايشا، "عاشىقتىق، قۇمارلىق پەن - ول ەكى جول".

شىن عالىمنىڭ نۇرلى اقىلى، ونەرشىنىڭ سەزىمدىك تانىم تۇيسىگى، عاشىقتىڭ كوڭىل كوزى، يبن سينا ىلىمىندە ءبىر ۇعىم. ياعني، "كيەلى اقىل". عازاليشە، جۇرەكتىڭ كوزى بولعان "تۇيسىك"ء-تىڭ اشىلۋ قۇبىلىسى. ءارى قاراي ابايشا، "جۇرەكتىڭ كوزى اشىلسا، حاقتىڭ تۇسەر ساۋلەسى!" عاشىقتىقتىڭ ەكىنشى قۇبىلىسى كەۋدەنى رۋحاني تازالاۋ قۇبىلىسى. مەيلى ىلىمگە، مەيلى جارعا عاشىق بولۋ قۇبىلىسى بولسىن. عاشىق ادامنىڭ وزگەرىپ كەتەتىن ءحالى سودان دەيدى دانالار. تاعى دا ابايمەن ورنەكتەسەك، "كەۋدەدەگى كىردى قاشىرساڭ، ادامنىڭ حيكمەت كەۋدەسى".

سوندا جىندى كىم بولدى؟

جاراس احان، «Muğla Sıtkı Koçman» ۋنيۆەرسيتەتىنىڭ PhD دوكتورانتى

---