InfoHub Logo

جالبىر — ءبورىباي باتىردىڭ كەنجە بالاسى. جالبىر تۋعاندا وتە كىشكەنتاي بولىپ تۋىلىپتى. ءبورىباي بالانىڭ وراسان نازىك كىشكەنتاي بوپ تۋعانىنا كوڭىلى تولماي، ءوزىنىڭ قارتتىعىن ەسەپكە الىپ: (ءبورىبايدىڭ جاسى 82-دە ەكەن) «ءاي، ءتىرى بولسا، بۇل دا ءبىر ادام بولىپ شىعادى دا» دەپ، اتىن بايسال قويىپتى. جالبىر تۋعاننان كۇن ساناپ ءوسىپ، بەس جاسىندا جيىرما جاستاعى جىگىتتەي الىپ دەنەلى بولادى. ول كەزدە قازاق ەلى «جەڭگەن الدى» جاۋگەرشىلىك زامان. ەل شەتىنە جاۋ ءتيىپ، «اتتان!» دەگەن قورقىنىشتى ۇران شىقسا، حالىقتىڭ ىسكە جارايتىن ەر-ايەلدەرى تەگىس اتتانىپ، جاۋعا قارسى سوعىسقا شىعادى ەكەن. جالبىر ون جاسىندا-اق كوپتەن قالماي، قولىنا تۇسكەن تاي-تۋلاقتى ۇستاپ، جايداق ءمىنىپ جاۋعا قارسى شابا بەرىپتى.

بالانىڭ الىپ دەنەلى، ايبارلى تالابىنا ريزا بولعان اكەسى ءبورىباي باتىر جالبىردى ون ەكى جاسىندا ارناۋلى اتقا مىنگىزىپ، تال جىبەكتەن تىعىزداپ توقىعان، اسىل تەمىردەن ويماقتاتىپ جەڭىل ساۋىت كيگىزىپتى. شەشەسى جىلقىدان اقبوز ات الدىرىپ مىنگىزىپ، ءۇش قۇلاش قىل شىلبىر ەسىپ بايلاپتى.

«بالام جاۋدان جارالى قايتسا، اققان قىزىل جاراستىق، بالام اتتان قۇلاسا، ۇزىن شىلبىردىڭ ءبىر شەتىن بەلىنە بايلاسا، سۇيەگى جاۋدا قالماس» دەپ. جالبىر قارۋ-جاراق ۇستاۋعا ۇقىپسىز. «اتتان!» دەگەن داۋىس شىققاندا، ورنىنان تۇرىپ اتقا قونىپ جۇرە بەرەدى ەكەن. «باتىر، قولىڭا قارۋىڭدى السايشى!» دەۋشىلەرگە: «سول شىركىننىڭ وزدەرى دە قۇر قول كەلمەس»، — دەپ جاۋدىڭ ءوز قارۋىن وزىنە جۇمسارمىن دەگەن ويمەن كەتە بەرەدى ەكەن. ايتقانىنداي، سوعىسقا كىرگەندە، قارسىلاسقان جاۋدىڭ نايزاسىن تارتىپ الىپ، قايىرا جاۋدىڭ وزىنە جۇمسايدى ەكەن. ءبىر قاتتى سوعىستا جالبىر اۋىر جارالى بولىپ كەلگەندە، اكەسى قارت ءبورىباي:

— جالبىردىڭ جاراقاتى الدىنان بولسا اۋىلعا الىپ كەل، ارتىنان بولسا اكەلمەڭدەر، دالاعا تاستاڭدار، ول جاۋدان تايىپ، قاشقان قورقاق نەمە تۋماي كەتسىن! — دەپتى. حابارشى جىگىت:

— باتىر، اتا، ومىراۋىندا ءۇش نايزا ۇڭعىسىنان سىنىپ، قادالىپ تۇر، — دەپتى. ءبورىباي باتىر:

— جارايدى، وڭاشا ۇيگە كىرگىزىپ جاتقىزىڭدار، ءوزىم بارىپ كورەمىن، — دەپتى.

جالبىردى اكەلىپ جاتقىزعان سوڭ، سەكسەن التى جاستاعى قارت ءبورىباي بارىپ قادالعان نايزالاردىڭ ۇڭعىسىن، قىل شىلبىردى مىقتاپ بايلاپ، قول كۇشىمەن بىرتىندەپ سۋىرىپ تاستاعاندا، جالبىر قاباعىن شىتپاپتى.

وقۋعا كەڭەس بەرەمىز:

ناۋشا باتىر تۋرالى

سىرىمنىڭ نۇرالى حاندى شابۋى (ءىى نۇسقا)

بايماعامبەت سۇلتان مەن سىرىم باتىر

---